Լուրջ խմորումներ

Ռուսաստանի արտգործնախարար Սերգեյ Լավրովը հայտարարել է, որ Ռուսաստանը պատրաստ է դիտարկել թուրքալեզու երկրների համագործակցության միությանը միանալու հարցը, դա հիմնավորելով Ռուսաստանում թուրքալեզու բնակչության առկայությամբ: Սակայն Ռուսաստան-Թուրքիա հարաբերություններում ոչ միայն տարբեր կազմակերպություններ մակարդակով փոխհարաբերություններ են ճշգրտվում, այլև պետական բարձր մակարդակով այդ հարաբերությունները նոր հիմքի վրա դնելու կոնկրետ քայլեր են իրականացվում: Թուրքիայի նախագահ Ռեջեփ Էրդողանը ակնկալում է օգոստոսի կեսերին հանդիպել Ռուսաստանի նախագահ Վլադիմիր Պուտինի հետ: Նա France-24 հեռուստաալիքին տված հարցազրույցում ասել է. «Ներկա պահին Թուրքիայի արտգործնախարարության աշխատակիցները այդ թեմայով բանակցություններ են վարում ռուս գործընկերների հետ: Իհարկե, Թուրքիայի վերջին իրադարձությունները, ըստ երևույթին, որոշ չափով կազդեն հանդիպման ժամկետի վրա: Սակայն համարում եմ, որ եթե ոչ մի անկանխատեսելի բան տեղի չունենա, Ռուսաստանի նախագահի հետ հանդիպումը կկայանա օգոստոսի կեսերին»: Ընդ որում, Անկարան հայտարարել է, որ Թուրքիան հայտարարել է, որ Ռուսաստանը մեծ աջակցություն է ցուցաբերել ապստամբության ժամանակ: Ռուսաստանը եղել է այն երկրների թվում, որոնք թուրքական ժողովրդավարությանը մեծ աջակցություն են ցուցաբերել ռազմական հեղաշրջում անցկացնելու փորձի ժամանակ, ասել է Թուրքիայի արտգործնախարար Մևլյութ Չավուշօղլուն: Թուրքիայի փոխվարչապետ Նուրեթթին Ջանիքլին ու էկոնոմիկայի նախարար Նիհաթ Զեյբեքջին հուլիսի 26-ի երեկոյան մասնավոր ինքնաթիռով կմեկնեն Մոսկվա: Հաղորդվում է, որ նրանք Ռուսաստանի մայրաքաղաքում կհանդիպեն իրենց ռուս գործընկերների հետ: Մասնավորապես, Ջանիքլին վաղը կհանդիպի Ռուսաստանի փոխվարչապետ Արկադի Դվորկովիչի հետ: Հանդիպումը անցկացվելու է պատվիրակությունների մասնակցությամբ, ապա՝ երկկողմ ձևաչափով: Զեյբեքջին իր հերթին առանձին երկկողմ հանդիպումներ կունենա Ռուսաստանի տնտեսական զարգացման նախարար Ալեքսեյ Ուլյուկաևի ու էներգետիկայի նախարար Ալեքսանդր Նովակի հետ: Պատվիրակության կազմում կլինեն Թուրքիայի տուրիզմի, էներգետիկայի և տնտեսության նախարարությունների ղեկավարները: Ավելի վաղ Ռուսաստանի դեսպանատանը հայտարարել են, որ հեղաշրջման փորձը չի խանգարում Մոսկվայի և Անկարայի հարաբերությունների «վերբեռնմանը»: Մոսկվան կնորացնի բանակցությունները Անկարայի հետ մի քանի առևտրատնտեսական ուղղություններով: Ռուսաստանի կառավարության որոշումը հուլիսի 22-ին տեղադրվել է նախարարների կաբինետի կայքում: Փաստաթղթում նշված է, որ կվերականգնվի առևտրատնտեսական համագործակցության հարցերով ռուս-թուրքական խառը միջկառավարական հանձնաժողովի գործունեությունը: Բացի այդ, կնորացվի միջկառավարական համաձայնության նախագծի բանակցային գործընթացը ծառայությունների և ներդրումների առևտրի վերաբերյալ, ինչպես նաև առևտրատնտեսական, գիտատեխնիկական և մշակութային համագործակցության 2016-2019 թվականների ծրագրի նախագծով և երկու երկրներում ռուս-թուրքական հիմնադրամի ստեղծման ներդրումային նախագծերի ֆինանսավորման հարցով: Ըստ ամենայնի, մենք ականատես ենք դառնում ռուս-թուրքական հարաբերությունների վերագործարկման նոր փուլին, որն իր նախորդի համեմատ ավելի խորքային կլինի ու ընդգրկուն: Չի կարելի է բացառել, որ Ռուսաստան-Թուրքիա հարաբերություններում այս բուռն վերագործարկումն իր անդրադարձը ունենա նաև` Հայաստան-Թուրքիա հարաբերությունների կարգավորման գործընթացի վրա: Չմոռանանք, որ հայ-թուրքական ֆուտբոլային դիվանագիտության մեկնարկը ևս տրվել Մոսկվայում` Սերժ Սարգսյանի հայտնի հայտարարությամբ: Այնպես որ, սպասենք Ռուսաստան-Թուրքիա հարաբերությունների կարգավորման պտուղներին: Տարածաշրջանը լուրջ վերադասավորումների շեմին է: Հայաստանը հայտնվել է տարածաշրջանային շահերի բախման կիզակետում: Մետաքսյա Շալունց