Վերադառնում են ծաղկուն ժամանակները
Երեւանի նախկին ոստիկանապետ, գեներալ-մայոր Ներսիկ Նազարյանը նոր պաշտոն ստացավ։ Նա նշանակվել է Արտակարգ իրավիճակների նախարարության աշխատակազմի փրկարար ծառայության պետի տեղակալ-Երեւանի փրկարարական վարչության պետ: Նշենք, որ Ներսիկ Նազարյանը Երեւանի ոստիկանապետի պաշտոնից ազատվել էր 2013 թվականի ապրիլին, զբաղվում էր բիզնեսով: Ի դեպ, Նազարյանի պաշտոնաթողության առիթով բազմաթիվ վարկածներ էին շրջանառվում: Ըստ դրանցից մեկի, Նազարյանը ֆինանսական խոշոր մեքենայությունների մեջ էր կասկածվում: Մեկ այլ վարկածով՝ «նալոգների» մի համակարգ էր բացահայտվել, որի գլխին կանգնած է եղել ինքը: Ինչեւէ, հիմա Նազարյանին վերադարձնում են, սակայն բոլորովին «մերկացած», առանց բիզնեսների։ Պաշտոնանկությունից հետո՝ մոտ երկու տարվա ընթացքում, նա կորցրեց գրեթե ողջ ունեցածը։ Պաշտոնանկությունից անմիջապես հետո հայտնի դարձավ, որ Ներսիկ Նազարյանին զրկել են Երևանում գործող մի շարք եկամտաբեր «օբյեկտների», այդ թվում` Նար-Դոս փողոցում գտնվող «Ծղոտներ» հյուրանոցային համալիրի փայատերեր լինելու իրավունքից: Փակվեց նրա որդուն պատկանող «Մոսկվիչկա» սուպերմարկետների ցանցը: «Մոսկվիչկա»-ի ղեկավարությունը հսկայական գումարներ էր պարտք մատակարարներին: Երևանի նախկին ոստիկանապետի գործերը Հայաստանում այնքան վատացան, որ վաճառքի հանեց Նորքում գտնվող իր առանձնատունը: Խոսակցություններ կային, որ նա մոտ 10 մլն դոլարի վարկային պարտավորություններ ունի: Դրանից հետո Նազարյանը բախտը փորձեց Մոսկվայում, այնտեղ սուպերմարկետ բացեց, սակայն օտար ափերում էլ նրա բախտը չբերեց։ Նազարյանի բիզնեսը «տակ տվեց»։ Մամուլը գրեց, որ Նազարյանը Մոսկվայում հուսալի «տանիք» չէր ընտրել: Նախկին ոստիկանապետը, ով մի ժամանակ մեծ հեղինակություն ուներ Հայաստանում և որոշ գործարարների և պաշտոնյաների «տանիքն» էր, փորձում էր ստանալ մոսկվաբնակ հայտնի հայ գործարար Կրիստալի Արտյոմի («Կրիստալ» օղու գործարանի սեփականատեր) հովանավորությունը: Ինչեւէ, այն, որ մեր երկրում ոչ բոլորին է հաջողվում պաշտոն չունենալով բիզնես զարգացնել, գիտեն բոլորը, սակայն Նազարյանի դեպքում հայաստանյան իրականությունը տիպիկ արտացոլում է ստացել։ Նա պաշտոնյա լինելու շնորհիվ հաջողությամբ ծաղկեցնում է իր բիզնեսը: Իսկ դրանից հետո՝ չկա պաշտոն, չկա բիզնես: Փաստորեն, Նազարյանի համար վերադառնում են ծաղկուն ժամանակները։ Նազարյանի նշանակումն այդուհանդերձ ուշագրավ է պահի ընտրությամբ։ Այս օրերին, երբ երկրում դժգոհությունների ալիքը հասել է գագաթնակետին ու Աստված միայն գիտե, թե «Սասնա ծռեր» խմբի գործողություններն ինչ հանգուցալուծում կստանան, մի ժամանակ, երբ բոլորը շունչները պահած սպասում են, որ գոնե հիմա Սերժ Սարգսյանը կգնա ռադիկալ ու անհավանական թվացող քայլերի, որոնց թվում տխրահռչակ պաշտոնյաների պաշտոնանկության հրաման տալն է, պաշտոն է ստանձնում մի անձնավորություն, ով ժամանակին իր գործունեությամբ չի փայլել ու պաշտոնը ծառայեցրել է ընտանեկան բիզնեսի բարգավաճմանը։ Իսկ սա նշանակում է, որ իշխանությունը չի պատրաստվում փոխվել, ընդառաջ գնալ հանրության, ժողովրդի պահանջներին ու իրականացնել ակնկալիքները։ Անի Սահակյան