Արցախի շուրջ ծանր բանակցությունները ու գրաված ՊՊԾ-ն
Այս օրերին շատերի մտքում են հարցեր պտտվում, թե այդ ինչպես եղավ, որ իշխանության անգործության պայմաններում հնարավոր դարձավ Էրեբունիում ՊՊԾ գունդ գրավել այն դեպքում, երբ Ժիրայր Սեֆիլյանը ձերբակալվեց` որոշակի կասկածներով: Հունիսի 22-ին Ժիրայր Սեֆիլյանին մեղադրանք առաջադրվեց ՀՀ քրեական օրենսգրքի 235-րդ հոդվածի 2-րդ մասով։ Նախնական քննությամբ բավարար ապացույցներ են ձեռք բերվել առ այն, որ նա կազմակերպել է մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և տարբեր վայրերում դրանք ապօրինի կերպով պահելը: Մասնավորապես, Ժ. Սեֆիլյանն անմիջական շփումներ է ունեցել քրեական գործով որպես մեղադրյալ ներգրավված տարբեր անձանց հետ, որոնց ուղղակիորեն հանձնարարել է ապօրինի կերպով պահվող զենք և ռազմամթերք փոխադրել, դրանք տեղափոխել և պահել տարբեր վայրերում, ինչպես նաև պատրաստ լինել՝ համապատասխան հրամանի դեպքում օգտագործել դրանք։ Այդ ինչպե՞ս ստացվեց, որ այս ձերբակալությունից մի քանի շաբաթ անց, Սեֆիլյանի թիմակիցները իրավապահների հսկողությունից դուրս էին մնացել ու ազատ գործել են, հուլիսի 17-ի գիշերը հարձակվել են ՊՊԾ գնդի վրա: Մի՞թե նրանք իրավապահների վերահսկողությունից դուրս են եղել` Սեֆիլյանի ձերբակալությունից հետո: Սա իսկապես խորքային հարց է, ու արդեն խոսակցություններ են պտտվում, որ հնարավոր է` ստեղծված իրավիճակը որոշակիորեն ձեռնտու է Սերժ Սարգսյանին` այն առումով, որ նրան Ղարաբաղյան բանակցություններում բարդ քննարկումներ են սպասում առաջիկայում: Բանն այն է, որ Խորենացի փողոցի իրադարձություններն իրենց ողբերգականությամբ, իսկապես որոշակի քաղաքական հետևանքներ կարող են ունենալ: Հուլիսի 16-ին, երբ Սերժ Սարգսյանը Արցախ էր մեկնել, այնտեղ հանդիպումներ է ունեցել արցախյան ռազմական-քաղաքական ղեկավարության հետ, հարցրել է նրանց վերաբերմունքը տարածքային զիջումների հարցով, բնականաբար, ստացել մերժողական պատասխան: Այսօր մամուլում հրապարակումներ կան, թե Արցախում Սերժ Սարգսյանը հանդիպումներից հետո` լսելով ղարաբաղցիներին ասել է, փորեք-ամրապնդեք բլինդաժները, սպասեք պատերազմի, եթե Ղարաբաղի ինքնորոշման կարգավիճակին Ադրբեջանը համաձայն չէ, մենք այլ ելք չունենք, պետք է պատերազմենք: Օգոստոսին սպասվում է ևս մեկ հանդիպում Սարգսյան-Ալիև մակարդակով, դրանք կարող են լինել ամենածանր բանակցությունները Սերժ Սարգսյանի համար: Հայկական կողմից տարածքային զիջումներ են ակնկալվում: Որքան էլ տարօրինակ ու «դավադրության տեսության» նման մի բան թվա, բայց գուցե Սերժ Սարգսյանին որոշակիորեն ստեղծված լարվածությունը մայրաքաղաքում կարող է ձեռնտու լինե՞լ: Մանավանդ, որ Ժիրայր Սեֆիլյանի ձերբակալությունն անմիջապես «հողեր հանձնելու» հետ: Սեֆիլյանն ուներ մի քանի հարյուր մարդկանց կողմնակից փողոցում, ՊՊԾ գնդի գրավումից հետո հասարակական որոշակի պոռթկում է առաջացել, որը կարող է «ամրացնել» Սերժ Սարգսյանի դիրքերը առաջիկա բանակցություններում ուղղակիորեն կապվելով` անհնար է տարածքային զիջումներ Հայաստանի կողմից, քանի որ արդեն իսկ առկա է մեծ դժգոհության ալիք` պատճառաբանությամբ: Իհարկե, սա, ընդամենը դեռ վարկած է, և նման հետևության հանգելու համար անհրաժեշտ է տիրապետել ավելի կոնկրետ ինֆորմացիայի, բայց որ ստեղծված ծանր ու բարդ իրավիճակը հնարավոր է ծառայեցնել այլ քաղաքական նպատակներով` ևս չի կարելի բացառել: Թամար Բագրատունի