Կառուցողական ներդրումը որտե՞ղ են տեսել
Ռուսաստանի, Ադրբեջանի և Իրանի նախագահների հանդիպման նախապատրաստությունը քննարկվել է ՌԴ-ի և Ադրբեջանի ԱԳՆ-ի ղեկավարների տեղակալների մակարդակով»: ՌԴ ԱԳՆ ղեկավարի տեղակալ Գրիգորի Կարասինն օրերս հեռախոսազրույց է ունեցել իր ադրբեջանցի գործընկերոջ՝ Խալաֆ Խալաֆովի հետ: «Քննարկվել են Բաքվում Ռուսաստան-Ադրբեջան-Իրան ձևաչափով բարձր մակարդակով Բաքվում կայանալիք հանդիպումները, ինչպես նաև երկկողմ հարաբերությունների որոշ ասպեկտներ»,- ասվում է ՌԴ ԱԳՆ-ի հրապարակված հաղորդագրությունում: Մինչ Ռուսաստանը բարձր հետաքրքրվածություն է ցուցաբերում Հայաստանի հարևանների հետ Հայաստանը շրջանցող տարբեր նախագծերի ներգրավման մեջ, միաժամանակ Հայաստանի մյուս հարևանի` Թուրքիայի ներգրավվածությանն էլ «դաբրո» է տալիս ղարաբաղյան կարգավորման գործընթացում ներգրավելու հարցում: Թուրքիայի, ինչպես նաև ցանկացած այլ երկրի ընդգրկման հարցը Լեռնային Ղարաբաղի կարգավորմանը կախված է երկրի կառուցողական ներդրումից բանակցային գործընթացում, հայտարարել է Ռուսաստանի ԱԳ պաշտոնական ներկայացուցիչ Մարիա Զախարովան: «Ինչ վերաբերվում է Թուրքիայի միանալուն Լեռնային Ղարաբաղի կարգավորմանը, ինչպես նաև ցանկացած այլ կարգավորմանը, ցանկացած այլ բանակցային գործընթացին, խաղաղ գործընթացին` ընդհանրապես խոսքը կարող է գնալ ոչ միայն Թուրքիայի մասին, ցանկացած կառուցողական համագործակցություն կարելի է դիտարկել հենց այդպիսի տեսակետից որպես կառուցողական փոխազդեցություն: Եթե պետությունն ունի ինչ-որ դրական բան ավելացնելու, ինձ թվում է, որ այդտեղ չի կարող լինել որևէ խնդիր, սակայն կրկին ասում եմ, եթե խոսքը վերաբերվում է կառուցողական ներդրմանը»,- ասել է Զախարովան ճեպազրույցում: Այնուհետև, նա հանդես է եկել լրացուցիչ պարզաբանմամբ` ավելի ծավալվելով այդ թեմայի շրջանակներում: Լեռնային Ղարաբաղի հակամարտության կարգավորման համար գոյություն ունեն միջազգային մեխանիզմներ, մասնավորապես ԵԱՀԿ Մինսկի խմբի համանախագահությունը, ֆեյսբուքյան իր էջում գրել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով լրատվամիջոցներում տարածված տեղեկությունները, որ ինքը հայտարարել է, թե Թուրքիան կարող է մասնակցություն ունենալ ԼՂ հակամարտության կարգավորման գործընթացում, եթե վերջինիս ներդրումը լինի կառուցողական: «Չեմ կարող հասկանալ Հայաստանից և Ադրբեջանից մի շարք լրագրողների (իհարկե, ոչ բոլորի) դիրքորոշումը: Դուք ցանկանում եք հաղթահարե՞լ հակամարտությունը, թե՞ այն խորացնել՝ Ձեր ճաշակով լուրեր հորինելով: Դա վտանգավոր զբաղմունք է»,- գրել է Զախարովան: Նա տեղեկացրել է, որ ասուլիսի ընթացքում իրեն հարցրել են Ադրբեջանում, Հայաստանում և Թուրքիայում իրավիճակից, «ինչն ավելի նման էր քաղաքական մանիֆեստի, որը ստիպված էի ընդհատել»: «Բոլոր նրանց համար, ովքեր փորձում են ապատեղեկատվություն տարածել և ապակայունացնել Լեռնային Ղարաբաղի հակամարտության կարգավորման գործընթացի շուրջ իրավիճակը ևս մեկ անգամ կրկնեմ. Լեռնային Ղարաբաղի հակամարտության կարգավորման համար գոյություն ունեն միջազգային մեխանիզմներ, մասնավորապես ԵԱՀԿ Մինսկի խմբի համանախագահությունը»,- նշել է Զախարովան: Նրա խոսքով՝ միաժամանակ հնարավոր են նաև երկկողմ կոնտակտներ, որոնց ընթացքում ցանկացած երկիր կարող է քննարկել ներքին և արտաքին քաղաքականությանն առնչվող ցանկացած հարց: «Խնդիրը նրանում է, թե որքան կառուցողական դեր են խաղում երկրները, որ կարգավորման գործընթացի մաս չեն, փորձո՞ւմ են արդյոք նպաստել կարգավորմանը»,- գրել է ՌԴ ԱԳՆ պաշտոնական ներկայացուցիչը՝ կոչ անելով սադրանքների չենթարկվել, այդ թվում տեղեկատվական: Եթե պաշտոնական Մոսկվան համարում է, որ Թուրքիայի ներգրավումը Լեռնային Ղարաբաղի կարգավորման գործընթացում կառուցողական է, ապա պետք է բարի լինի, պարզաբանի, թե այդ ե՞րբ է տեսել Թուրքիայի դրական, կառուցողական գործունեությունը: Այն, որ ապրիլյան քառօրյա պատերազմից հետո պաշտոնական Անկարան անմիջապես շնորհավորեց «եղբայրական Ադրբեջանին» ու Ալիևին «տարած հաղթանակների» համա՞ր, թե՞ որ ղարաբաղյան խնդրի պատճառով Թուրքիան «սպանեց» Հայաստան-Թուրքիա արձանագրությունները: Պաշտոնական Անկարան բացահայտ ադրբեջանամետ դիրքորոշում ունի Ղարաբաղյան հարցում, նա պաշտպանում է` «բոլոր գրավյալ տարածքները» Ադրբեջանին հանձնելու Բաքվի պահանջը, այսինքն` դրանով իսկ բացառում է փոխզիջումներն իսկզբանե: Ե՞րբ են Թուրքիայի իշխանություններն ապացուցել իրենց կառուցողական կեցվածքը: Ընդհակառակը, նրանք բացահայտ ապակառուցողական դիրք են բռնել, անկողմնակալ են, և ամենակարևորը` Ղարաբաղի հարցի պատճառով Հայաստանի հանդեպ թշնամական կեցվածք են դրսևորում` շրջափակման մեջ պահելով Հայաստանն արդեն 25 տարի: Էլ ի՞նչ կառուցողական ներդրման մասին է խոսքը... Մետաքսյա Շալունց
Հետևեք մեզ Viber-ում
