Տղաներին իմանալով՝ կարծում եմ չեն հանձնվի, քանի դեռ պահանջ չի կատարվել

Հուլիսի 17-ին մայրաքաղաքի Էրեբունու ՊՊԾ-ի վրա «Սասնա ծռեր» ջոկատի կողմից հարձակման հետեւանքով ստեղծված իրավիճակը գնալով սրվում է, սակայն իշխանության ներկայացուցիչները համառորեն լռում են՝ ցույց տալով, որ որեւէ զիջման չեն պատրաստվում գնալ։ Հիշեցնենք, որ կիրակի վաղ առավոտյան մի խումբ զինված անձինք Էրեբունիում գրոհով վերցրել են Ոստիկանության Էրեբունիում գտնվող ՊՊԾ գունդը եւ պատանդ են վերցրել ոստիկանության սահմանափակ թվով ծառայողների: Մեկ ոստիկան՝ նույն գնդի փոխհրամանատար Արթուր Վանոյանը սպանվել է: Վիրավորվել են եւս չորս ոստիկաններ՝ ոստիկանության գնդապետ Արամ Հովհաննիսյանը, փոխգնդապետ Հրաչ Խոստեղյանը, ոստիկանության ենթասպա Գագիկ Մկրտչյանը, օպերատոր Ռոբերտ Հայրապետյանը։«Սասնա ծռեր» խմբավորման անդամները մի քանի պահանջ են ներկայացրել: Նրանք մասնավորապես պահանջում են Սերժ Սարգսյանի հրաժարականը, ինչպես նաեւ ազատ արձակել Ժիրայր Սեֆիլյանին: «Ժողովրդավարական հայրենիք» կուսակցության նախագահ, «Հիմնադիր խորհրդարանի» անդամ Պետրոս Մակեյանի հետ զրուցեցինք իրավիճակի հանգուցալուծման ելքերի մասին։ -Պարեն Մակեյան, կարծես թե պատային իրավիճակ է ստեղծվել, որեւէ կողմը զիջումների չի գնում, ձեր կարծիքով ինչ կոմպրոմիսային լուծման կարելի է գնալ, քանի որ իշխանության ներկայացուցիչներն այս օրերին պնդում են, որ խմբի ներկայացրած պահանջները անիրականանալի են։ -Բարդ է, իմանալով «Սասնա ծռեր»-ի տղաներին՝ դժվար է հավատալ կոմպրոմիսի կայացմանը։Նրանք մինչեւ իրենց պահանջների մոտ զիջում չլինի, չեմ կարող պատկերացնել, թե կոմպրոմիսի կգնան։ Տղաները, որ գնացել են ապստամբության ճանապարհով, ըստ էության իշխանությունների որակները իմանալով են գնացել։ -Մյուս կողմից՝ դժվար է հավատալ, որ Սերժ Սարգսյանը հրաժարական կներկայացնի, կամ ազատ կարձակեն Ժիրայր Սեֆիլյանին։ Առաջ քաշված պահանջները չեն իրականանա։ -Ուրեմն իշխանությունը կունենա լրջագույն խնդիրներ, որ վաղ թե ուշ ինքը թողնելու է հեռանա, դրան այլընտրանք չկա, որովհետեւ այն, ինչ որ իրենք են անում, ոստիկանության համակարգն է սանձարձակ ձեւով անում, իր հետեւանքը թողնելու է, դրա պատասխանը տրվելու է եթե ոչ այսօր, ապա վաղը, մյուս օրը, ծայրահեղ դեպքում հաջորդ ընտրություններին, իրենք գնալու են։ Պարզապես պետք է մտածեն, որ լավ կլինի, եթե հեռանան հիմա՝ փոխզիջումային տարբերակով։ -Փաստորեն, դուք կարծում եք, որ խումբը չի հանձնվի, եթե չկատարվեն իրենց պահանջները։ -Ես իրենց որակներն իմանալով, կարող եմ ասել, որ եթե իրենք գնացել են այդ ծայրահեղ քայլին, ապա պետք է արդյունքը բերի գործող վարչախմբի հեռացում։ Կարող է պրոցեսը երկարաձգվի մեկ ամիս, երկու ամիս, բայց որ դա այլընտրանք չունի, հստակ է։ Շատ բարդ է ասել, թե որ դեպքում խումբն ինչպես կվարվի, կհանձնվի, բայց իրենք ամենածանր պայմաններում միշտ ճիշտ են կողմնորոշվել։ Ինձ թվում է, որ իշխանությունները պետք է քայլ անեն Անի Սահակյան