Իշխանության ճիշտ ընտրությունը
Ինչպես երեւում է հուլիսի 17-ին մայրաքաղաքի Էրեբունու ՊՊԾ-ի վրա «Սասնա ծռեր» ջոկատի կողմից հարձակման հետեւանքով ստեղծված իրավիճակը հասել է վտանգավորության պիկին եւ իշխանություններն արդեն իսկ հանգուցալուծման ուղիներ են որոնում։ Հնգօրյա լռությունից ու իշխանական ճամբարում գործողություն է նկատվում։ Քիչ առաջ հայտնի դարձավ, որ Ղարաբաղից Հայաստան է եկել Ազգային ժողովի պատգամավոր, Արցախի հերոս Վիտալի Բալասանյանը՝«Սասնա Ծռերի» հետ հանդիպելու նպատակով։ Հանդիպումը կայացել է, սակայն ըստ ամենայնի որեւէ արդյունք ակնկալելն անիմաստ է, քանզի խմբի կարկառուն ներկայացուցիչ Պավլիկ Մանուկյանի՝ լրատվամիջոցներին տված մեկնաբանություններից հասկանալի է դառնում, որ տղաները չեն պատրաստվում զիջել, վայր դնել զենքերը, քանի դեռ իրենց պահանջները չեն իրագործվել.«Հանձնվելը մոռացեք: Չի՛ լինի, տենց...Ժիրոյի գումարտակը երբևիցե դիրք հանձնած չկա, զոհված կան, կմեռնենք, բայց չենք հանձնվի», -ասել է Մանուկյանը: «Իրավիճակից դուրս գալու առաջարկներ է արել, մենք լսել ենք մեր հարգարժան գեներալի առաջարկությունները, և ներկայացրել ենք մեր դիրքորոշումները»,- իր հերթին ասել է Վարուժան Ավետիսյանը։ Հայտնի դարձավ նաեւ, որ Արցախից խաղաղության կոչով Երևան է եկել Արցախի թեմի առաջնորդ Պարգև արքեպիսկոպոս Մարտիրոսյանը, նա կարծում է, որ բանակցություններն աշխարհիկների գործը չէ միայն, սպասում է խաղաղությամբ խնդիրը լուծելու պատասխանին: Անկախ այն հանգամանքից, թե ինչ արդյունք կտա Արցախի մեր հայրենակիցների առաքելությունը, մի բան անհերքելի է, որ իշխանությունը անչափ ճիշտ որոշում է կայացրել նման բարդ իրավիճակում ապավինելով հենց այս մարդկանց աջակցությանը։ Նկատելի է, որ կա պահի լրջության ու վտանգավորության գիտակցում, ինչի մասին է վկայում Հանրապետականների հնգօրյա լռությունը։ Հակառակ պարագայում իրավիճակը կարող էր դուրս գալ վերահսկողությունից, քանի որ նուրբ իրավիճակում ցանկացած խոսք եւ այն էլ մարդկանց շուրթերից, որոնք փաստացի համարվում են իրավիճակի գլխավոր պատասխանատուներն ու հենց այս մարդկանց վարած քաղաքականության հետեւանք է «Սասնա ծռերի» գործողությունները։ Մյուս կողմից՝ ապստամբ խմբի գործողություններում եւ հայտարարություններում անկառավարելի, քաոսային վիճակ է նկատվում։ Պավլիկ Մանուկյանը լրատվամիջոցների հետ զրույցում հայհոյախառն բառապաշար է օգտագործել ո՛չ միայն իշխանությունների, այլեւ՝ ընդդիմության հասցեին. «Երբևիցե տեսե՞լ ես ընդդիմադիր, ոչ իշխանական … նույն ... տղեքն են, քանի տարի ժողովրդին խաբելով՝ այդ անունների տակ, ուղղակի կարելի է ասել «քցել» են ժողովրդին»: Ակնհայտ է, որ այս մարդկանց խումբն ընդունակ է ամենածայրահեղ քայլին, ինչը թերեւս հասկանում են իշխանության ճամբարում, որտեղ մանրակրկին հաշվարկ է արվել, թե ումով եւ ինչպես բանակցել, խոսել ապստամբների հետ։ Իսկ երեւույթն ինքնին հաստատում է , որ Հայաստանում հոգեւոր-քաղաքական-մշակութային դաշտն այն աստիճան է դեգրադացվել, որ ամենածայրահեղ պահերին դժվար է գտնել ոչ խոցելի մեկին, որը կարող է երկխոսել ժողովրդի հետ, որը կարող է ժողովրդին թեկուզ խնդրանքով դիմել։ Իշխանության ձեռքն այնպիսի ավերածություններ է գործել նույն ընդդիմության, մտավորականության ու հոգեւոր հատվածներում, մինչեւ վերջին խազը վարկաբեկել, հեղինակազրկել անհատներին, որ այսօր դժվար է ընտրություն կատարել հայաստանաբնակներից։ Դա է պատճառը, որ ՀՀ իշխանությունները ստիպված են ապավինել Արցախի ականավոր ներկայացուցիչներին՝ Պարգև սրբազանին և Վիտալի Բալասանյանին: Անի Սահակյան
Հետևեք մեզ Viber-ում
