Արամ Զ. Սարգսյանը զինված խմբի գործողությունների մասին. lragir.am
10:55 «Հանրապետություն» կուսակցության նախագահ Արամ Զավենի Սարգսյանը արկածախնդրություն է որակում «Սասնա ծռեր» զինված խմբավորման կողմից Ոստիկանության Պարեկապահակային ծառայության գնդի տարածք մուտք գործելը: lragir.am-ի հետ զրույցում հարցին, թե սա զինված ապստամբությո՞ւն է, թե այլ բան, «Հանրապետություն» կուսակցության նախագահն ասում է.«Ես կոնկրետ սա ահաբեկչություն չէի համարի: Ահաբեկչությունը հոկտեմբերի 27-ն էր, որն իմ կարծիքով՝ ուներ պատվիրատուներ, բանակցողներ, որից մարդիկ կային, որ շահեցին: Այստեղ դեռ չեմ տեսնում շահողին: Այստեղ տեսնում եմ, որ բոլորս ենք տուժում: Իմ կարծիքով՝ սա արկածախնդրություն է՝ իր բուն բնորոշմամբ, իր ամբողջ նկարագրով, որովհետև մարդկանց մի խումբ, անգամ Ժիրայր Սեֆիլյանի կալանավորումից հետո, հանրահավաք է անում և այդ հանրահավաքին մի քանի տասնյակ մարդ է մասնակցում: Ու դրանից հետո գնալ նման քայլի՝ թիկունքում չունենալով հասարակության աջակցություն, սա միանշանակ արկածախնդրություն է»: Արամ Սարգսյանի խոսքով՝ հենց այդ նույն մարդիկ գնալով այդ քայլին՝ փորձում են մնացածին պարտադրել, որ իրենց պես մտածեն։ «Այ եթե դուք ինձ պես չեք մտածում, փողոց դուրս չեք գալիս, կամ լռում եք, ուրեմն դուք իշխանության թիմից եք: Չէ՝ մենք իշխանության գործունեությունը ճիշտ չենք համարում, բայց ձերն էլ ճիշտ չենք համարում: Որովհետև արդյունքում ի՞նչ եք ստացել ձեր այդ գործողությամբ: Արդյունքում եղել է այն, որ զոհվել է մի մարդ, որը ազատամարտիկ էր, երեք երեխայի հայր,– ասել է նա և ավելացրել,– Արդյունքում եղել է, որ իրենք շատ ծանր հոդվածներ են իրենց վրա վերցրել, և Աստծո առաջ մեղք են վերցրել: Սպանված մարդ կա: Աստված վատից ազատի, եթե զոհեր չլինեն»: «Հանրապետություն» կուսակցության նախագահը քաղաքական առումով այս գործընթացը համարում է ազգայնական գաղափարախոսության սրված դրսևորում: Մի բան, որ աշխարհի բոլոր երկրներում էլ կա: «Ասեմ, որ ազգայնականներ աշխարհի բոլոր երկրներում էլ կան, եվրոպական երկրներում էլ, որոնք երբեմն նաև իշխանության հետ որոշակի խնդիրներ են լուծում: Հայաստանում էլ կա նման բան, ու դրա գոյությունը կարող է ի նպաստ լինել նաև հայրենիքին, չնայած ես երբեք չեմ կիսել այդ գաղափարախոսությունը»,–ասել է նա:
Հետևեք մեզ Viber-ում
