Ես ակտիվիստներից եմ վախեցել. Ավո Կարագուլյան

Այսօր  Հայելի  ակումբում  լրագրողների  հետ  հանդիպման  ժամանակ   Արամի  30  հասցեի  ետնամասում  կառուցապատվող  շինության  կառուցապատող  Ավո Կարագուլյանն, անդրադառնալով վերը նշված հասցեում գտնվող շինության ապամոնտաժմանն, ասաց, որ  այդ  տարածքի  նկատմամբ   ոչ  մի  ակնկալիք  կամ  շահ  չի  ունեցել: «Իմ  առջև  դրված էր, որ պետք է այս  բաժինը  առնեի, իրացնեի և  պետությանը  հանձնեի՝   ճանապարհի  համար:Քանդած  հատվածներից ես ակնկալիք  կամ շահ  չունեմ, դա  պետք  էր  ուղղակի  քաղաքային  ճանապարհի  համար: 2004թ.  նախկին  քաղաքապետ  Երվանդ  Զախարյանը  ներկայացրեց  այդ  ծրագիրը: Նրանք  նախապես  ունեին  այդ  ծրագիրը, ոչ  թե  վերջում  որոշվեց: Մեկն  ինձ  չասաց, որ  դա  հուշարձան է  և  չպետք  է քանդել»,-նշեց  կառուցապատողը: Նա մեկնաբանեց  նաև  այն  փաստը, թե  ինչու  շենքը   ապամոնտաժվեց  գիշերը. «Ես  ակտիվիստներից  եմ  վախեցել, դրա  համար  էլ  գիշերն  ենք    քանդել: Ես  արել  եմ, ստորագրել  եմ, ստացել  եմ  նախագիծը  և  պարտավորություն  ունեմ  պետության  առաջ, որ  իրագործեմ»,-անկեղծացավ  բանախոսը: Ասուլիսին  քննարկվեց  նաև  այն  հարցը, թե  արդյոք  Ավո Կարագուլյանի  և  Սերժ  Սարգսյանի  եղբոր՝  Լևոն  Սարգսյանի,  հետ  ունեն մտերիմ հարաբերություններ և միասին  համագործակցում են. «Լևոն  Սարգսյանը  հյուպատոս  էր  Հալեպում, ես  այստեղ  Մելիք  Գասպարյանի  հետ   խնդիր  ունեի  և  ես  իրեն  դիմեցի: Նա  աջակցեց  ինձ, որ  այստեղ իմ  դատավարությունը  լինի:Ես  ոչ  մի  բիզնես  և  ոչ  մի  գործունեություն  Լևոն  Սարգսյանի հետ    չունեմ»,-հայտնեց  կառուցապատողը: Ասուլիսին  ներկա  էր  նաև   շինության  նախագծի  հեղինակ, ճարտարապետ  Աշոտ  Ալեքսանյանը: Նրա կարծիքով`  Արամի  փողոցը  շատ  նեղ, առվակի   նման  փողոց  է  և   շատ  կարևոր  է  դրա  լայնացումը: «Այսօր  Արամի փողոցը շատ  նեղ  է  և  շատ  կարևոր  է  դրա  լայնացումը: Այն  պետք է լայնացնել  հրապարակի  տրանսպորտային  երակները  թեթևացնելու  համար: Արամի  փողոցին  կից  կա  մեկ մայթ, որը  հարակից  է  թանգարանի շենքին և  ունի  աստիճաններ: Մայթը հարմար չէ  փողոցի և  մարդկանց  շարժման  համար: Մայթը  լայնացնում  ենք, որ  բոլորը հանգիստ  օգտվեն: Աբովյան փողոցի  կողմից  շենքը   հետ  է  դրվում  շուրջ  7 մետր, մյուս  մայթը  ևս  հետ  է   տրվում  և  ստեղծվում  է  լայն  միջավայր  »,- նշեց  Ալեքսանյանը: Բանախոսը չի  ողջունում  պատմական  արժեքների  ոչնչացման  փաստը,   և  ընգծում է` այն  ինչ  ստեղծվել է  մեր  նախնիների  կողմից իր  համար  արժեք  է  համարվում: «Ցանկացած  քար, որ  դրվել  է  մեր  նախնիների  կողմից,  ինձ  համար  արժեք  է  համարվում»: Վերջում  Ավո Կարագուլյանը  հայտնեց, որ  այդ նախագծով  քանդվելու  են  նաև  Նալբանդյան, Արամի  և  Աբովյան  փողոցի  հարակից  տարածքները:   Լուսինե  Միքաելյան