Դավիթ Հարությունյանի բիզնեսը՝ պետության հաշվին
Վերջերս կառավարության կողմից որոշում ընդունվեց պետական համակարգի կարիքների համար ավիաոտոմսերի կենտրոնացված կարգով գնում կատարելու վերաբերյալ: Ստեղծվեց <<Ամադեուս>> տոմսերի ամրագրման հարթակը, որը սպասարկում է ԷԿԵՆԳ (էլեկտրոնային կառավարման ենթակառուցվածքների ներդրման գրասենյակ) պետական փակ բաժնետիրական ընկերությունը: <<Ամադեուսը>> հաղթող է ճանաչվել պետգնումով, և պետք է այսուհետ միանձնյա սպասարկի ՀՀ կառավարությանը սեփական կարիքների համար կատարվող ավիատոմսերի ամրագրումն ու գնումը: Նախկինում պետական կառավարման մարմիններից յուրաքանչյուրն իր համար առանձին կատարում էր այս գնումը: Օրինակ, եթե այս կամ այն նախարարը պետք է գործուղման մեկներ արտերկիր, ապա նրա և պատվիրակության մյուս անդամների տոմսերը նախարարության համապատասխան ստորաբաժանումը իր ընտրությամբ ձեռք էր բերում որևէ ավիաընկերությունից: Սակայն կառավարությունում որոշել են, որ կենտրոնացված գնումների դեպքում հնարավոր կլինի ապահովել ծախսերի կրճատում ու այդ պատճառով էլ ավիատոմսերի գնումները կենտրոնացնել: Նույն որոշմամբ՝ ամրագրվել է, որ նախարարների համար այլևս բիզնեսի կարգի տոմսերը անհասանելի են, նրանք պետք է օգտվեն էկոնոմ դասի տոմսերից, իսկ կարգի տոմսերը վերապահվում են միայն Պաշտպանության և ԱԳ նախարարներին: Պետության կողմից ավիատոմսերի գնման համակարգում ներդրված նորարարությունը լուրջ մտահոգության առիթ է տվել ավիատոմսերի վաճառքով զբաղվող մի շարք ավիաընկերությունների: Նրանք գտնում են, որ սա կոռուպցիայի նոր օղակ է, և մոնոպոլիայի նոր ձև: Մասնագետների կարծիքով՝ կան տոմսերի տեսակներ, որոնք միայն <<Ամադեուսով>> դուրս գրել հնարավոր չէ, բացի այդ՝ կան տոմսեր, որոնց ձեռքբերումն <<Ամադեուսով>> շատ ավելի թանկ է, քան եթե այն դուրս գրվի այլ համակարգով, օրինակ՝ <<Գաբրիելով>> կամ <<Սիրենայով>>: Հետևաբար պնդումը, թե կենտրոնացված գնումներով ծախսերի տնտեսում կարվի, հիմնավոր չէ: Կան նաև խոսակցություններ, թե իրականում կառավարության աշխատակազմի ղեկավար-նախարար Դավիթ Հարությունյանը կենտրոնացված գնումների անվան տակ սեփական բիզնեսն է քողարկում: hraparak.am-ում հրապարակվել է Դ. Հարությունյանի ստորագրությամբ փաստաթուղթը՝ ուղղված ՀՀ փոխվարչապետ, միջազգային տնտեսական ինտեգրման և բարեփոխումների, ֆինանսների, արդարադատության, էներգետիկայի և բնական պաշարների նախարարներին, որով Հարությունյանը ՀՀ վարչապետի հանձնարարությամբ խնդրում է վերջիններիս, govtravel.am-ի միջոցով փորձնական շահագործման փուլում ավիատոմսերի գնման գործընթացը պատշաճ կազմակերպելու նպատակով ապահովել իրենց ղեկավարած գերատեսչությունների աշխատակազմի կողմից անհրաժեշտ պայմանագրի կնքումը համակարգն սպասարկող վերոհիշյալ ընկերության հետ: «Միաժամանակ օպերատորին տրամադրել պահանջվող նվազագույն ելակետային տվյալներ, ապահովել բավարար սահմանաչափերով կորպորատիվ բանկային քարտերի առկայություն՝ ավիատոմսերի գնումները ֆինանսավորելու համար»,-ասվում է փաստաթղթում: Նոր համակարգը ենթադրում է, որ տվյալ պետական մարմնի ներկայացուցիչն էլեկտրոնային տարբերակով ինքն է ընտրելու իրեն անհրաժեշտ ավիատոմսը, այն ուղարկելու է իր գերատեսչության աշխատակազմի ղեկավարի հաստատմանը: Վերջինս հաստատումից հետո այն ներկայացնելու է ԷԿԵՆԳ-ին՝ տոմսը պատվիրելու համար: Տոմսի գնման դեպքում թույլ է տրվում տվյալ օրվա դրությամբ որոնման համակարգում առկա նվազագույն արժեք ունեցող ավիատոմսը կամ դրա նկատմամբ մինչեւ 8 տոկոս տարբերություն ունեցող տոմսը: Նշենք, ո ր ԷԿԵՆԳ-ի տնօրենը Դավիթ Հարությունյանի խորհրդական Արթուր Թունյանն է, ով դեռ արդարադատության նախարարությունում համարցում էր Հարությունյանի կադրը: Հավելենք, որ ավիատոմսերի գնման այս նորամուծությունից դժգոհ են նաև նախարարությունները, ովքեր ունեին իրենց համար նախընտրելի ընկերություններ և հիմա փաստորեն պետք է հրաժարվեն նրանցից: Դավիթ Մանուկյան