Անհետաքրքիր գյուղաքաղաքն ու նրա տերերը
Ռուսաստանի, Իրանի և Ադրբեջանի նախագահների հանդիպումը տեղի կունենա օգոստոսի 8-ին Բաքվում, հայտնել է Իրանի փոխարտգործնախարար Իբրահիմ Ռահիմպուրը: «Նման հանդիպում, անկասկած, կայանալու է: Այն ակնկալվում է օգոստոսի 8-ին»,- հաստատել է նա: Ռուսաստանի արտաքին գործերի նախարար Սերգեյ Լավրովը նույնպես օրերս հաստատել էր երեք երկրի ղեկավարների հանդիպման նախապատրաստումը` նշելով, որ այն կարող է լինել մոտակա ժամանակներում: Մինչ Հայաստանի իշխանությունները խոսում են տարածաշրջանային տարբեր ծրագրերում Հայաստանի հնարավոր մասնակցության մասին` մենք ականատես ենք դառնում, թե ինչպես է հարևան Ադրբեջանը կոնկրետ հաջողություններ արձանագրում թե Իրանի, թե Ռուսաստանի հետ հարաբերություններում: Իրանն, անշուշտ, շահագրգռված է տարածաշրջանի կայունությամբ: Ավելին, Իրանը բավական մտահոգված է ղարաբաղյան հակամարտության գոտում խաղաղապահների հնարավոր տեղակայման գաղափարով, որը վերջերս լայնորեն քննարկվում է: Չի բացառվում, որ օգոստոսի 8-ին կայանալիք Ռուսաստան-Իրան-Ադրբեջան նախագահների հանդիպմանը քննարկվի նաև ղարաբաղյան հիմնախնդիրը, և կասկած չկա, որ պաշտոնական Թեհրանը կպնդի, որ հակամարտությունը պետք է խաղաղ կարգավորվի և ռազմական գործողությունների վերսկսումն անթույլատրելի է: Իհարկե, Հայաստանի հարևաններից մեկի շահագրգռությունը` խաղաղության, կայունության պահպանման տեսակետից դրական է, բայց մյուս կողմից, կարծես, նկատելի է Հայաստանի` որպես տարածաշրջանային դերակատարի չգոյությունը: Կարծես Հայաստանի փոխարեն բոլոր տարածաշրջանային խաղացողներն իրենց շահերն ավելի կոնկրետ են արտահայտում ու դրսևորում, քան Հայաստանը: Հայաստանը դարձել է մի անհետաքրքիր գյուղաքաղաք, որի ղեկավարների փոխարեն որոշումներ են կայացնում, քննարկումներ ծավալում, փոխշահավետ քննարկումներ անցկացնում: Մենք մնում ենք լուսանցքում` տարածաշրջանային բոլոր ծրագրերից դուրս: Մինչ օգոստոսի 8-ին Ռուսաստանի, Իրանի և Ադրբեջանի նախագահների հանդիպման կազմակերպումը` Ռուսաստան-Թուրքիա հարաբերությունների կարգավորման ուղղությամբ կոնկրետ քայլեր են իրականացվում: Թուրքիայի արտաքին գործերի նախարարությունը հայտարարություն է տարածել այն մասին, որ այսօր կառավարության բարձրաստիճան պատվիրակություն է մեկնում Ռուսաստան: Այցը տեղի կունենա Ռուսաստանի Դաշնությունից ստացած հրավերին ի պատասխան: Թուրքիայի պատվիրակության կազմում կընդգրկվեն մշակույթի և զբոսաշրջության, կապի, ծովագնացության և հաղորդակցության, ինչպես նաև ներքին գործերի նախարարությունների ներկայացուցիչներ: Այս այցի շրջանակում կքննարկվեն Թուրքիայի և Ռուսաստանի միջև չարթերային թռիչքների վերսկսմանը, զբոսաշրջիկների անվտանգությունն ապահովելուն ուղղված միջոցառումների ձեռնարկմանը, ինչպես նաև ապագայում զբոսաշրջության ոլորտում երկկողմ հարաբերություններին և համագործակցությանն առնչվող հարցեր: Պատվիրակությունը բաղկացած է լինելու Թուրքիայի երեք նախարարությունների ներկայացուցիչներից` ՆԳՆ-ի, Մշակույթի և զբոսաշրջության, ինչպես նաև Տրանսպորտի նախարարություններից: Մետաքսյա Շալունց