Ով և ինչու է ճնշում Սերժ Սարգսյանին

Ինչպես տեղեկացրել էինք, օրերս Սերժ Սարգսյանը հարցազրույց է տվել համաարաբական հեղինակավոր «Ալ-Մայադին» հեռուստաալիքին։ Տարբեր թեմաների անդրադառնալով Սերժ Սարգսյանը խոսել է նաև ղարաբաղյան հակամարտությունից՝ նշելով, որ Լեռնային Ղարաբաղի բնակչությունն անվտանգ կարող է ապրել բացառապես Ադրբեջանի կազմից դուրս: «Իսկ այդ անվտանգությունը կարող է ապահովվել միայն ու միայն Ադրբեջանի կազմից դուրս: Որևէ մեկի համար հիմա կասկած չկա․ եթե ինչ-որ մի չար կատակով գոնե մեկ օր Ղարաբաղը հայտնվի Ադրբեջանի կազմում, Ղարաբաղում մի հայ չի մնա: Այնպես որ, ամենակարևորը նա է, որ Լեռնային Ղարաբաղը դուրս լինի Ադրբեջանի կազմից՝ սա է կարևորը», - ընդգծել է Հայաստանի նախագահը: Սերժ Սարգսյանը, միևնույն ժամանակ շեշտել էր, որ եթե անգամ ամբողջ աշխարհը փորձի համոզել, Ղարաբաղի ժողովուրդը երբևէ չի համաձայնի ապրել Ադրբեջանի կազմում։ «Խոսքս իհարկե ուժի մասին չէ, որովհետև ցանկացած գերտերություն, նույնիսկ ցանկացած միջազգային կառույց կարող է ուժով այս խնդիրը լուծել, ասելս հետևյալն է՝ կարելի է ղարաբաղցիներին ոչնչացնել, կարելի է ցանկացած բռնություն կիրառել, բայց համոզել ապրել Ադրբեջանի կազմում՝ դա անհնար է», - շեշտել է Հայաստանի նախագահը: Շարունակելով հակամարտության թեման, նա հայտարարել է, որ կարգավիճակի հարցում վերջնական որոշում կայացնողը լինելու է Լեռնային Ղարաբաղի բնակչությունը՝ ելնելով ազգերի ինքնորոշման ու ազատ կամարտահայտության իրավունքի սկզբունքից, ու Ադրբեջանը պարտավոր կլինի հարգել այդ որոշումը․ - «Անշուշտ, առաջին հերթին կամքը Լեռնային Ղարաբաղում ապրողներինն է, թե նրանք ինչպիսի կարգավիճակում կուզենան ապրել՝ լինեն անկախ պետությո՞ւն, թե՞ միացած լինեն Հայաստանի Հանրապետությանը։ Ինձ համար ամենից կարևորը նա է, որ Լեռնային Ղարաբաղի բնակչության անվտանգությունն ապահովված լինի, որպեսզի նրանք կարողանան ապրել իրենց պատմական հայրենիքում»: Ս․Սարգսյանի խոսքում ուշագրավ է այն ամրագրումը, թե ցանկացած գերտերություն, նույնիսկ ցանկացած միջազգային կառույց կարող է ուժով ԼՂ խնդիրը լուծել: Ս.Սարգսյանը կարծես, անուղղակի հասկացնել է տալիս, որ ճնշում կա ԼՂ խնդրի ուղղությամբ: Իհարկե, նա չի ասում, թե որ գերտերությունն է, բայց դա հասկանալու համար առանձնապես ճիգեր պետք չեն: Որ գերտերությունն է այսօր փորձում ԼՂ կարգավորման գործընթացում դերակատարում ստանձնել` ակտիվ աշխատելով Ադրբեջանի հետ: Դա իհարկե, Ռուսաստանն է: Մոսկվայի խաղը նման չէ մյուս միջնորդների ջանքերին: Ս.Սարգսյանն իր հարցազրույցով ցանկանում է արձանագրել, որ նույնիսկ Մոսկվայի ճնշումները ցանկալի արդյունք չեն տա: Նա շեշտում է, որ կարելի է ղարաբաղցիներին ոչնչացնել, կարելի է ցանկացած բռնություն կիրառել, բայց համոզել ապրել Ադրբեջանի կազմում՝ դա անհնար է: Իսկ ինչու՞ են Սերժ Սարգսյանին համոզում, որպեսզի Ղարաբաղի բնակչությունն ապրի Ադրբեջանի կազմում... Այս հարցը պատասխանը փնտրելիս` բավարար է հետադարձ հայացք ուղղել ապրիլյան քառօրյա պատերազմի բռնկման պատճառներին, նրա դադարեցմանն ու հետևած գործընթացներին: Ապրիլյան քառօրյա պատերազմն ուներ կոնկրետ նպատակ և դրա պատճառներն ավելի ու ավելի ակնհայտ են դառնում: Թամար Բագրատունի