Մոսկվան Բաքվին կրկին զենք կմատակարարի

Ռուսաստանի արտգործնախարար Սերգեյ Լավրովը երեկվանից  Բաքվում է: Մինչ նրա այցի մեկնարկը` Ադրբեջանում Ռուսաստանի դեսպան Վլադիմիր Դորոնինը հայտարարել է, որ Ռուսաստանի և Ադրբեջանի միջև ռազմատեխնիկական համագործակցությունը շարունակվելու է, շարունակվելու է նաև զենքի մատակարարումը կնքված պայմանագրի շրջանակներում: Ավելին, դեսպանի փոխանցմամբ, Վլադիմիր Պուտինն ամեն տարի այցելում է Ադրբեջան, և այս տարի նախատեսված այցի ընթացքում, հավանաբար, կկնքվեն զենքի վաճառքին վերաբերող նոր պայմանագրեր: Սեպտեմբերի 20-ին Բաքվում կկայանա 5-րդ Միջազգային հումանիտար ֆորումը, որն անցկացվում է Ռուսաստանի և Ադրբեջանի նախագահների հովանու ներքո: Դորոնինը, ամենայն հավանականությամբ, հենց այս ֆորումի շրջանակում տեղի ունենալիք Պուտինի այցն է նկատի ունեցել: Սերգեյ Լավրովի այցին ընդառաջ ՌԴ ԱԳՆ-ն տարածել է հաղորդագրություն, որում, մասնավորապես, նշված է՝ Բաքվում կայանալիք բանակցություններին «քննարկվելու են երկկողմ հարաբերություններին առնչվող հարցեր և մտքեր են փոխանակվելու ղարաբաղյան խնդրի շուրջ՝ ի զարգացումն այն պայմանավորվածությունների, որոնք ձեռք են բերվել Վիեննայում և Սանկտ Պետերբուրգում»: «Ադրբեջանը մեր կարևոր ռազմավարական գործընկերն է տարածաշրջանում, հարաբերությունները Ադրբեջանի հետ կառուցվում են հավասարության և միմյանց հետաքրքրությունները հարգելու հիման վրա», - նաև նշված է Ռուսաստանի արտգործնախարարության հաղորդագրությունում: Վերադառնալով Ադրբեջանում Ռուսաստանի դեսպանի հայտարարություններին՝ հարկ է նշել, որ Վլադիմիր Դորոնինը հայտարարել է «Մենք չենք ճնշում հակամարտող կողմերին, մենք փնտրում ենք այնպիսի բանաձև, որը հավասարապես կբավարարի երկու կողմերին»: Դորոնինը հավելել է, թե խաղաղապահների տեղակայման հարցը չի քննարկվել: Նա հավելել է, թե ղարաբաղյան խնդիրը պետք է կարգավորել՝ հաշվի առնելով «բոլորի շահերը» «Պետք է այնպիսի փոխզիջում գտնել, որը կողմերին թույլ կտա վստահել միմյանց: Պատերազմը Հայաստանի և Ադրբեջանի միջև վատագույն սցենարն է Ռուսաստանի համար»: «Այսօր մեր բարեկամական հարաբերությունները Հայաստանի հետ խորը արմատներ ունեն: Մենք ռազմաքաղաքական դաշնակիցներ ենք, Ռուսաստանը լուրջ տնտեսական աջակցություն է ցուցաբերում Հայաստանին», - հայտարարել է Ադրբեջանում Ռուսաստանի դեսպան Վլադիմիր Դորոնինը: Ղարաբաղյան հակամարտությունը մոտ ժամանակներս պետք է կարգավորվի, երեկ հայտարարել է Ադրբեջանի նախագահ Իլհամ Ալիևը՝ ելույթ ունենալով կառավարության նիստին՝ նվիրված 2016թ. առաջին կիսամյակում սոցիալ-տնտեսական զարգացման արդյունքներին: «Ապրիլյան մարտերը ևս մեկ անգամ ցույց են տալիս ստատուս քվոյի շուտափույթ փոփոխության անհրաժեշտությունը: Դրա մասին բազմիցս հայտարարել են նաև այդ հարցով զբաղվող միջնորդները… Վերջին մի քանի ամիսներին բանակցային գործընթացում շատ մեծ ակտիվություն է նկատվում»,- նշել է Ալիևը: Ադրբեջանի ղեկավարը նշել է, թե հակամարտությունն առաջիկայում պետք է կարգավորվի և ստատուս քվոն պետք է փոխվի: Նրա խոսքով, կարգավորման միակ տարբերակը փուլայինն է, և դրան հասնելու համար անհրաժեշտ է, որ ԵԱՀԿ Մինսկի խմբի համանախագահ երկրները «լուրջ ճնշում գործադրեն Հայաստանի վրա»: Բաքվում Ադրբեջանի նախագահ Իլհամ Ալիևի հետ հանդիպման ժամանակ Լավրովն էլ իր հերթին հայտարարել է. «Գնահատում ենք ձեր վերաբերմունքը Լեռնային Ղարաբաղի հակամարտության կարգավորման հարցով ռուսական նախաձեռնությունների հանդեպ: Գործընթացն իսկապես առաջ է գնում, և նախագահ Պուտինը գոհ է Սանկտ Պետերբուրգի հանդիպումից, նրա հանձնարարականով ես այցելում եմ երկու երկրի մայրաքաղաքներ: Հույս ունեմ, որ այսօրվա հանդիպումը թույլ կտա մեզ ավելի հստակ սահմանել հետագա քայլերը»: Մոսկվան, այսպիսով, շարունակում է Ալիևի հետ ռազմատեխնիկական համագործակցությունը: Բնականաբար, շարունակվելու է նաև Ադրբեջանին զենքի մատակարարումը, սա այն դեպքում, երբ Ռուսաստանից 200 միլիոն դոլար վարկով զենք ձեռք բերելու համաձայնագրի ընդունումից հետո Հայաստանին զենք մատակարարելու հարցը շարունակում է օդում կախված մնալ։ Մինչդեռ ռուս-ադրբեջանական հարաբերություններում ռազմատեխնիկական համագործակցության մակարդակում առաջընթացն ակնհայտ է, Մոսկվան ու Բաքուն դա չեն էլ թաքցնում: Թե ինչ առարկայական պայմանավորվածություններ են ձեռքբերվել ԼՂ հարցում, թերևս, ռուսական և ադրբեջանական մամուլի համար «դիվանագիտական աղբյուրներն» առաջիկա օրերին ավելի հարուստ տեղեկատվություն կապահովեն: Թամար Բագրատունի