Սրտատրոփ սպասում են
Ադրբեջանի նախագահ Իլհամ Ալիևը Վարշավայում ՆԱՏՕ-ի գագաթնաժողովում, Թուրքիայի նախագահ Ռեջեփ Էրդողանի հետ հանդիպման ընթացքում հավատ է արտահայտել այն բանին, որ ՌԴ արտգործնախարար Սերգեյ Լավրովի առաջիկա այցը Բաքու դրական կերպով կնպաստի Ղարաբաղի հարցի կարգավորման գործընթացի առաջընթացին: Բաքվում այսօր և վաղը սրտատրոփ սպասում են Լավրովի այցին, որը կապվում է Ղարաբաղի խնդրի հետ: Առանց մանրամասնելու, թե հատկապես ո՞ր մասով են դրական արդյունքներ ակնկալում Բաքվում, պարզ է, որ ինչ-որ ծրագիր Մոսկվան այնուամենայնիվ ունի և դրանք փորձում է ԵԱՀԿ Մինսկի խմբի գործունեության շրջանակներում կյանքի կոչել: Բացի այդ, օգոստոսին նախապատրաստվում է Պուտինի այցը Բաքու, և կարելի է պատկերացնել, թե այս առումով ևս ինչ ակնկալիքներ կան Ալիևից կողմից Պուտինի այցի «արդյունքների» առումով: Առայժմ կարծես, ԱՄՆ-ն ու Ֆրանսիան, սակայն, ցույց են տալիս, որ չեն թույլ տա Մոսկվայի առանձին խաղալ: Թե Վաշինգտոնը, թե Փարիզը բավական ակտիվություն են ցուցաբերում, որպեսզի բացառեն Մոսկվայի «մենաշնորհային դիրքերը» ղարաբաղյան ճակատում: Այսօր, ակնկալվում է, որ ԵԱՀԿ Մինսկի խմբի համանախագահները Վիեննայում խմբի անդամներին կտեղեկացնեն Հայաստանի և Ադրբեջանի նախագահների հանդիպման արդյունքների և հակամարտության կարգավորման ուղղությամբ հետագա քայլերի մասին: Այդ մասին հայտնել էր ամերիկացի համանախագահ Ջեյմս Ուորլիքը Twitter-ի իր էջում: Ուորլիքը նաև տեղեկացրել է, որ Հայաստանի և Ադրբեջանի նախագահները պատերազմի դեմ են հանդես եկել ու ցանկություն են հայտնել շարունակել բանակցային գործընթացը: «(ԱՄՆ պետքարտուղար) Ջոն Քերին զրուցել է Սարգսյանի և Ալիևի հետ Լեռնային Ղարաբաղի հակամարտության կարգավորման հարցի շուրջ: Կողմերը մերժել են պատերազմն ու պարտավորվել են շարունակել բանակցությունները: ԱՄՆ-ը պատրաստակամ է իր օգնությունն առաջարկել այդ հարցում»,-գրել է ամերիկացի համանախագահը: Նախորդ օրերին Վարշավայում ՆԱՏՕ-ի գագաթնաժողովի շրջանակներում ղարաբաղյան հարցը լայնորեն քննարկվեց: ԱՄՆ-ի պետքարտուղար Ջոն Քերիի ու Ֆրանսիայի նախագահ Ֆրանսուա Օլանդի հետ Սերժ Սարգսյանի հանդիպումներում ԼՂ հակամարտության թեման գլխավորներից էր: Իր հերթին Ս.Սարգսյանը Վարշավայում ելույթ ունենալով ՆԱՏՕ-ի գագաթնաժողովում՝ հայտարարեց Սերժ Սարգսյանը. «Ստատուս քվոն կփոխվի, եթե ճանաչվի Լեռնային Ղարաբաղի ժողովրդի ինքնորոշման իրավունքի իրացումը»: Նա նշեց. «Պարզապես պարտքս եմ համարում հատուկ ընդգծել, որ այսօր հակամարտության խաղաղ կարգավորման գլխավոր խոչընդոտը Ադրբեջանի բարձր ղեկավարության վարած քաղաքականությունն է և հարցը խաղաղ ճանապարհով լուծելու կամքի բացակայությունը: Դրա վառ ապացույցն էր Ադրբեջանի կողմից ընթացիկ տարվա ապրիլին Լեռնային Ղարաբաղի հանդեպ սանձազերծված լայնածավալ ագրեսիան, ինչը խոշոր հարված հասցրեց խաղաղ կարգավորմանն ուղղված ԵԱՀԿ Մինսկի խմբի համանախագահողների կողմից իրականացվող ջանքերին»: Սերժ Սարգսյանը հիշեցրեց, որ Վիեննայում և Սանկտ Պետերբուրգում պայմանավորվածություն է ձեռք բերվել շփման գծում հրադադարի խախտումները հետաքննող մեխանիզմ ներդնել, ընդլայնել ԵԱՀԿ գործող նախագահի անձնական ներկայացուցչի հնարավորությունները: Իսկ Վարշավայում գտնվող ՀՀ ԱԳ նախարար Էդվարդ Նալբանդյանի խոսքով, Ադրբեջանը փորձեր է կատարում հետ կանգնել պայմանավորվածություններից` ձևացնելով, թե հետաքննությունների մեխանիզմ ներդնելու պայմանավորվածություն ընդհանրապես ձեռք չի բերվել: «Չնայած եռանախագահող երկրները Վիեննայի գագաթաժողովի արդյունքում հրապարակած իրենց հայտարարության մեջ հստակ ասում էին, որ նախագահները պայմանավորվել են այդպիսի մեխանիզմի ստեղծման մասին: Հնարավոր չէ հանդիպումից հանդիպում որևէ հարցի շուրջ պայմանավորվել, և կողմերից մեկը հետ քայլ անի, որովհետև դրանով իսկ կորցնում է վստահությունը, որ կարելի է այդ երկրի հետ ընդհանրապես բանակցել և ինչ-որ բանի մասին պայմանավորվել», - լրագրողների հետ ճեպազրույցում նշել էր Նալբանդյանը: Այնուհետև, ինչպես և ակնկալվում էր, ՆԱՏՕ-ի գագաթնաժողովի եզրափակիչ հայտարարությունում Լեռնային Ղարաբաղի հարցող անդրադարձ եղավ` Հարավային Կովկասում խաղաղություն հաստատելու մասով: «Մենք հավատարիմ ենք մնում Հայաստանի, Ադրբեջանի, Վրաստանի և Մոլդովայի Հանրապետության տարածքային ամբողջականության, անկախության ու ինքնիշխանության մեր սատարմանը: Այս համատեքստում մենք շարունակում ենք սատարել Հարավային Կովկասում, ինչպես նաև Մոլդովայի Հանրապետությունում, հակամարտությունների խաղաղ կարգավորմանն ուղղված ջանքերին, որոնք հիմնված են այդ սկզբունքների և միջազգային իրավունքի նորմերի, ՄԱԿ-ի Կանոնադրության և Հելսինկյան եզրափակիչ ակտի վրա: Մենք կոչ ենք անում բոլոր կողմերին կառուցողականորեն և ավելի ուժեղ քաղաքական կամքով ներգրավվել հակամարտությունների խաղաղ կարգավորմանը` սահմանված բանակցային շրջանակներում», նշվում էր փաստաթղթում: Թամար Բագրատունի