Մարիա Զախարովան Բաքվում գործ ունի

Ռուսաստանի արտգործնախարարության խոսնակ Մարիա Զախարովան երեկ Երևանում էր: Նա ուղեկցում էր իր ղեկավարին՝ Ռուսաստանի արտգործնախարար Սերգեյ Լավրովին, որն էլ Երևանում մասնակցում էր ՀԱՊԿ արտգործնախարարների խորհրդի նիստին: Այս անգամ ևս, Զախարովան բավական ակտիվ է եղել մեկնաբանություններում: Զախարովային հայ լրագրողները կրկին հարց են ուղղել Նժդեհի արձանի տեղադրման մասին նրա արած հայտարարությունների առիթով, ինչին ի պատասխան նա նշել է. «Պատմության հետ կապված հարցերն իսկապես շատ բարդ են, և ամոթ նրանց, ովքեր օգտագործում են այդ հարցերն իրենց քաղաքական նպատակների համար այնպես, ինչպես շատերն արեցին՝ խեղաթյուրելով իմ մեկնաբանությունները: Մի՞թե Հայաստանն այժմ չունի ավելի հրատապ խնդիր: Ես կարծում եմ, որ հիմա Հայաստանի ու հայ ժողովրդի համար կա շատ ավելի հրատապ մի խնդիր՝ դա Լեռնային Ղարաբաղի հակամարտության կարգավորումն է: Հենց դրա համար են այսօր, նաև ՀԱՊԿ շրջանակներում, հանդիպումներ տեղի ունենում: Հենց դրա համար ենք մենք հսկայական ջանքեր գործադրում՝ որպեսզի այդ կարգավորումն առաջ ընթանա: Մենք Հայաստանի հետ համագործակցում ենք, այդ թվում՝ միջազգային տարբեր հարթակներում, որպեսզի բացառենք նացիզմի հերոսականացման ցանկացած հնարավորություն: Այդ առումով՝ մենք զգում ենք մեր հայ գործընկերների շատ հուսալի թիկունքը»: Պատասխանելով ԼՂ խնդրին վերաբերող հարցերին, Զախարովան կտրականապես մերժեց պնդումները, թե Սանկտ Պետերբուրգի հանդիպմամբ, Ռուսաստանը փորձ էր անում մենաշնորհ հաստատել կարգավորման գործընթացի նկատմամբ: «Ես մինչ այդ հանդիպումը, նաև դրանից հետո իմ ճեպազրույցների ժամանակ ասել եմ՝ մտահոգություններ կային, թե Ռուսաստանն իբր իր մենաշնորհն է հաստատում գործընթացի նկատմամբ, չի ցանկանում տեղեկություններ տրամադրել և այլն: Սակայն, սանկտպետերբուրգյան հանդիպման ընթացքում և դրանից հետո բոլորը համոզվեցին՝ միջնորդներն անհրաժեշտ կերպով տեղեկացված են եղել և իրենց գործընթացից դուրս չեն զգացել: Հենց կողմերը ու նաև դիտորդներն են բարձր գնահատել այդ հանդիպման արդյունավետությունը: Մենք հրաշալի հասկանում ենք Մինսկի խմբի ձևաչափի նշանակությունը և հարգանքով ենք վերաբերվում դրան: Իսկ Սանկտ Պետերբուրգի հանդիպումն իր մեջ ինչ-որ նորարարություն չէր պարունակում, այն ընդամենը կողմերի շփման ձևերից մեկն է: Դուք հրաշալի գիտեք, որ նման հանդիպումներ նաև նախկինում են եղել», ասել է Զախարովան: Նրա խոսքով՝ ղարաբաղյան հարցում Ռուսաստանի դիրքորոշումը նպատակաուղղված է մեկ կետի՝ «դա ձգձգված հակամարտության շուտափույթ և խաղաղ կարգավորումն է, և մենք դրան հասնելու համար անում ենք հնարավորը»: Զախարովան ձեռնպահ է մնացել Սարգսյան- Ալիև նոր հանդիպման մասին տեղեկություններ հաղորդելուց, նշելով, թե դա հենց կողմերը պետք է անեն: «Որտեղ և երբ պետք է հանդիպեն իրենց առաջնորդները, դա այն տեղեկությունն է, որը պետք է հենց կողմերը տրամադրեն: Մենք կարող ենք ասել, որ այդ ուղղությամբ մեծագույն ջանքեր է գործադրում հենց Ռուսաստանի Դաշնության նախագահը, արտգործնախարարը, ըստ էության՝ ողջ արտաքին գերատեսչությունը: Դա արվում է և՛ երկկողմ, և՛ բազմակողմ խողովակներով ու ԵԱՀԿ Մինսկի խմբի շրջանակներում: Այդ ամենն արվում է, քանի որ մենք հասկանում ենք՝ հապաղման յուրաքանչյուր օրն իր մեջ խաղաղ բնակիչների հանդեպ սպառնալիք է կրում», Երևանում ասել է Մարիա Զախարովան: Մոսկվան, այսպիսով, ձգձգված հակամարտության շուտափույթ լուծման մասին սկսել է ավելի ու ավելի հաճախ խոսել: Սա կարելի էր դրական փաստ համարել, եթե Մոսկվա նեղություն քաշեր` քննադատեր Ալիևին ապրիլին պատերազմ սանձազերծելու համար, կամ գոնե հրաժարվեր Ադրբեջանին շարունակել զինելուց: Բայց չկա, ոչ մեկը, ոչ մյուսը, փոխարենը Մոսկվան շտապում է... Ու հետաքրքրական է Զախարովայի «մուննաթը»` մի՞թե Հայաստանն ավելի հրատապ խնդիր չունի, քան Նժդեհի արձանը: Նա անմիջապես ցույց է տալիս հրատապ հարցը` դա Լեռնային Ղարաբաղի հակամարտության կարգավորումն է: Իսկ գուցե Զախարավան ու ՌԴ ԱԳՆ-ն զայրացա՞ծ են, որ Հայաստանի համար կան նաև այլ ազգային հարցեր, որոնք երկրորդական պլան չեն մղվում ու չեն մոռացվում... Իրականում, եթե Մոսկվան գիտակցում է ղարաբաղյան կարգավորման վտանգը և իսկապես համարում է, որ` հապաղման յուրաքանչյուր օրն իր մեջ խաղաղ բնակիչների հանդեպ սպառնալիք է կրում, ապա դրա ուղղությամբ կան կոնկրետ քայլեր, որոնց իրականացմանը խոչընդոտում է պաշտոնական Բաքուն` մերժելով սահմանային միջադեպերի հետաքննության մեխանիզմներին կիրառման գաղափարին: Սա կոնկրետ հարց է, որով «շտապող» Մոսկվան` Զախարովայի հետ միասին, կարող է զբաղվել Բաքվում: Թամար Բագրատունի