ՌԴ-Վրաստան սահմանային անցակետում դեռ 144 քաղաքացի է գտնվում,
Այսօրվա՝հուլիսի 2-ի դրությամբ ՌԴ-Վրաստան սահմանային անցակետում են գտնվում 144 քաղաքացի, որոնցից 50 ազգությամբ հայ է: Քաղաքացիներին տրամադրվել են վրաններ, սնունդ և այլ անհրաժեշտ պարագաներ: Տեղեկացնում է ՀՀ Արտակարգ իրավիճակների նախարարությունը: Հիշեցնենք, որ հատուկ չվերթներով մեր հայրենակիցներին Հայաստան են տեղափոխում ՀՀ և ՌԴ կառավարությունների պայմանավորվածության արդյունքում, այն բանից հետո, երբ հունիսի 23-ին, Վերին Լարսի անցակետից մոտ 2 կմ հեռավորության վրա (Վրաստանի տարածքում), Թերեք գետի վարարման հետևանքով ավտոճանապարհի 500-600 մ հատվածը ամբողջովին փլուզվել էր, և այդ պատճառով փակվել էր ՌԴ-Վրաստան սահմանային անցակետը: Հունիսի 30-ին՝ ժամը 02.20-ին, «Զվարթնոց» միջազգային օդանավակայանում վայրէջք էր կատարել ՌԴ ԱԻՆ ինքնաթիռի առաջին չվերթը, երկրորդ ինքնաթիռը ժամանել էր նույն օրը՝ ժամը 07.55-ին, երրորդը` 13.48-ին, չորրորդը՝ 19.02-ին, հինգերորդ չվերթը՝ հուլիսի 1-ին ժամը 13.20-ին, վեցերորդը՝ նույն օրը ՝ 18.11-ին: Ընդհանուր առմամբ՝ 6 չվերթով Հայաստան է տեղափոխվել 234 ՀՀ քաղաքացի և հակառակ ուղղությամբ՝ 13 ՌԴ քաղաքացի:
Հետևեք մեզ Viber-ում
