Մնաց ռուս խաղաղապահների հա՞րցը․Ղարաբաղյան թնջուկ

Մինչ երեկ Գերմանիայի արտգործնախարար, ԵԱՀԿ գործող նախագահ Ֆրանկ-Վալտեր Շտայնմայերը Երևանում խոսում էր ԼՂ հակամարտությունում ստատուս քվոյի պահպանման անթույլատրելիության մասին, պաշտոնական Մոսկվան շտապեց կարևոր արձանագրում անել: Ռուսաստանն առաջատար դեր է խաղում Լեռնային Ղարաբաղի հակամարտության կարգավորման գործում, հայտարարել է ԵԱՀԿ-ին առընթեր ՌԴ-ի մշտական ներկայացուցիչ Ալեքսանդր Լուկաշևիչը: «Վիեննայում Մինսկի խմբի համանախագահների միջոցով Ադրբեջանի և Հայաստանի նախագահների հետ համաձայնության գալու փորձը որոշ ազդակ հաղորդեց, բայց առավել մեծ ներուժ ունի ռուսական կողմը»,- ասել է բարձրաստիճան դիվանագետը: Նա նաև նշել է, որ որևէ բեկումնային որոշում չի ակնկալում ԵԱՀԿ-ն նախագահող Գերմանիայի արտաքին գործերի նախարար Ֆրանկ Վալտեր Շտայնմայերի Երևան և Բաքու այցի կապակցությամբ: «Գործող նախագահը թեև ղեկավարում է, բայց ամեն ինչ որոշում են մասնակից պետությունները: Գործող նախագահն, անտարակույս, կարևոր դեր է խաղում, բայց նա չէ շարժիչ ուժը: Շարժիչ ուժը Մինսկի խմբի երեք համանախագահներն են»,- նշել է նա: Պատասխանելով այն հարցին, թե կարելի է արդյոք որևիցե բեկումնային պայմանավորվածություն ակնկալել այդ այցի շրջանակներում, Լուկաշևիչն ասել է՝ «իհարկե, ոչ»: Ռուսաստանի նախագահ Վլադիմիր Պուտինի կողմից Սանկտ Պետերբուրգում եռակող բանակցություններ անցկացումն արդեն իսկ վկայում էր այն մասին, որ Մոսկվան իր ուժն ու ազդեցությունն է ցույց տալիս, և ոչ միայն ԵԱՀԿ-ին, այլ հենց ԵԱՀԿ Մինսկի խմբում համանախագահող մյուս երկրներին` ԱՄՆ-ին ու Ֆրանսիային: Մոսկվան արդեն բաց խաղաքարտերով է խաղում: Արևմուտք-Ռուսաստան պայքարը տեղափոխվում է նաև ղարաբաղյան հարթություն: Այն իհարկե, առճակատում չէ, թվում է, թե Ռուսաստանը, ԱՄՆ-ը և Ֆրանսիան միասնական են ղարաբաղյան հարթակում, բայց Մոսկվան արդեն իսկ ցույց է տալիս, որ ցանկանում է միայնակ մրցավարի դերում մնալ: Բացի ռուսական ազդեցության խնդրից, իհարկե, կարևոր է հարցը, թե ինչ առանձին պայմանավորվածությունների կարող է գալ Մոսկվան կողմերի հետ: Կարգավորման ադրբեջանանպաստ լուծում պահանջում է Բաքուն, հիմա այդ պահանջը կարող է դրվել նաև Անկարայի կողմից: Ի՞նչի դիմաց կարող է Մոսկվան հայկական կողմի առջև պայմաններ դնել: Դա թերևս, տարածաշրջանում ռուսական ազդեցության մեծացման ամենագործուն քայլի միջոցով` ռուս խաղաղապահների տեղակայման դիմաց կարող է լինել: Սերժ Սարգսյանն արդեն արտահայտվեց ռուս խաղաղապահների տեղակայման նպատակահարմարության մասին: Իսկ որն է պաշտոնական Բաքվի դիրքորոշումը` պարզ չէ: Ինչ իմանաս, թե ռուս-ադրբեջանական հարաբերությունների ջերմությունը էլ որ հարցերում կարող  է միասնական լինել: Մետաքսյա Շալունց