Առաջին հանրահավաքը՝ ընդդեմ Brexit-ի

Լոնդոնի կենտրոնում երեքշաբթի անցկացվել է առաջին մեծ հանրահավաքն ընդդեմ ԵՄ-ից Բրիտանիայի դուրս գալու: Հանրահավաքին մասնակցել է մի քանի հազար մարդ։ Այս մասին հայտնում է BBC-ն։ «Եվրամիությո՛ւն, մենք սիրում ենք քեզ, մենք չենք լքում»,- վանկարկել են Թրաֆալգար հրապարակում հավաքվածները։ Հանրահավաքի նախաձեռնողները, որոնք դրա մասին հայտարարել էին Facebook-ում, ավելի ուշ անվտանգության նկատառումներով այն չեղարկել էին։ Սոցցանցում հանրահավաքի էջում նրանք գրել էին՝ քանի որ դրան միացել է 50 հազար մարդ, իսկ Թրաֆալգար հրապարակը տեղավորում է ընդամենը 10 հազար մարդու, քաղաքապետարանն ու ոստիկանությունը չեն կարող երաշխավորել անվտանգությունը։ Այդուհանդերձ, հանրահավաքը կայացել է։ Շաբաթ օրը Brexit-ի հակառակորդները ծրագրում են մայրաքաղաքում մեծ երթ անցկացնել դեպի խորհրդարանի շենք։