Ռուսական զենքի առեղծվածը
Սանկտ Պետերբուրգում Ռուսաստանի և Հայաստանի Նախագահներ Վլադիմիր Պուտինի և Սերժ Սարգսյանի երկկողմ հանդիպման արդյունքում ձեռք են բերվել պայմանավորվածություններ, որոնք բխում են թե՛ Հայաստանի և թե՛ Ռուսաստանի պետական շահերից: Այս մասին իշխող՝ Հայաստանի Հանրապետական կուսակցության գործադիր մարմնի նիստի ավարտին լրագրողներին հայտնել է կուսակցության մամուլի խոսնակ Էդուարդ Շարմազանովը՝ հավելելով, որ նիստում կուսակցության և ՀՀ Նախագահ Սերժ Սարգսյանը ներկայացրել է Սանկտ Պետերբուրգում իր հանդիպումների արդյունքները: «Հայ-ռուսական ռազմավարական հարաբերությունները նաև ստրատեգիական առումով պետք է զարգանան»,- ընդգծել է իշխող կուսակցության մամուլի խոսնակը: Հարցին, թե ի՞նչ պայմանավորվածության մասին է խոսքը, արդյո՞ք զենքի մասին է, որի մասին շատ է խոսվում՝ Էդուարդ Շարմազանովը հաստատեց. «Ես այն քաղաքական գործիչների թվին եմ պատկանում, որ ասում եմ՝ պետք է խորացնել մեր հարաբերությունները Մոսկվայի հետ: Եվ այո, սպառազինությունների առումով, նաև ռազմավարական, դաշնակցային հարաբերությունների զարգացման առումով ձեռք են բերվել հստակ պայմանավորվածություններ»: Ռուսաստան-Հայաստան հարաբերություններում առանց այն էլ, ինչպես ասում են, ամեն ինչ չէր փայլում, դրան ավելացել է 200 միլիոն վարկի դիմաց ռուսական սպառազինության մատակարարման հարցը: Հնարավոր է, որ Սանկտ Պետերբուրգում օրերս կայացած եռակողմ բանակցություններում, Պուտին-Սարգսյան երկկողմ հանդիպմանը քննարկված լինի նաև այս հարցը: Բայց արդյոք դա երաշխի՞ք է, որ ռուսական զենքը Հայաստան կհասնի օրինակ առաջիկա ամիսներին: Բոլորովին: Մանավանդ, որ արդեն ունենք դառը «փորձ». ռուսական զենքի մատակարարումը անվերջ ձգձգվում է.... Հետևաբար, կարող է կրկին ձգվել ամիսներ: Միայն այս փաստը, բավարար է նկատելու, որ հայտարարությունները, թե հայ-ռուսական ռազմավարական հարաբերությունները ռազմավարական առումով պետք է զարգանան, կամ, որ ձեռք են բերվել պայմանավորվածություններ, որոնք բխում են թե՛ Հայաստանի, թե՛ Ռուսաստանի շահերից` իսկապես անհավատալի են: Ավելին, միայն այն հանգամանքը, որ Ռուսաստանը Հայաստանին խոստացել է տրամադրել զենք` 200 միլիոն վարկով, սա արդեն խոսում է այն մասին, թե որքան ցածր մակարդակի վրա են այսօր գտնվում հայ-ռուսական հարաբերությունները: Բացի այդ, որո՞նք են Հայաստանի ու Ռուսաստանի` Ադրբեջանին «մինչև ատամները» զինե՞լը, իսկ հետո Հայաստանի խոստանա՞լ 200 միլիոն վարկի դիմաց զենք ու ձգձգել այդ գործընթացը: Իրականում, արդեն շատերի համար է պարզ, որ Հայաստանի զինելու հարցում խոչընդոտը Ռուսաստան-Ադրբեջան ռազմավարական գործընկերությունն է: Սա փաստ է, որի ծանր հետևանքներին առաջիկայում, հնարավոր է, շատ հաճախ բախվենք: Թամար Բագրատունի