Հայաստանի միակ արժանիքը

Հայաստանում Ռուսաստանի դեսպան Իվան Վոլինկինը համարում է, որ անդամակցությունը Եվրասիական տնտեսական միությանը մեծ դիվիդենտներ է բերել Հայաստանին՝ չնայած այդ միության հասցեին այսօր հնչող սուր քննադատությանը: «Այդ ամբողջ քննադատությունը Եվրասիական տնտեսական միության հասցեին միանգամայն անհիմն է», «Ազատության» հետ զրույցում հայտարարել է դեսպանը՝ հիմնավորելով «Արդյունքներն են․ մասնավորապես, ընթացիկ տարվա առաջին ամիսներին աճել է ապրանքաշրջանառությունը Հայաստանի և Ռուսաստանի միջև, ինչպես միանշանակորեն հայտարարվեց երեկ Սանկտ Պետերբուրգում երկու նախագահների զրույցի ժամանակ»: Ռուսաստանի իշխանությունները բազմիցս հայտարարել են, որ արևմտյան ապրանքների փոխարեն ռուսաստանյան շուկա ավելի մեծ ծավալով ապրանքներ կներմուծվեն ԵԱՏՄ անդամ երկրներից, մասնավորապես՝ գյուղատնտեսական արտադրանք Հայաստանից: Ի պատասխան հարցին՝ արդյոք իրականությանը համապատասխանո՞ւմ է տարածված կարծիքը, թե հայկական գյուղմթերքը այդպես էլ չի կարողացել լրացնել ռուսաստանյան շուկայում առաջացած բացը, Վոլինկինն ասել է. «Միանշանակ է, որ անցյալ տարի հայկական գյուղատնտեսական արտադրանքի արտահանումը հսկայական աճ է արձանագրել: Պարզապես Հայաստանը փոքր երկիր է և չի կարող ամբողջովին գրավել ռուսաստանյան շուկան»: Անդրադառնալով ռուս-վրացական սահմանին բեռնատարների կիլոմետրանոց հերթերին՝ դեսպանը հավաստիացրեց․ - «Բոլորովին վերջերս որոշում է կայացվել, որ Հայաստանի համար պետք է առանձնացվի հատուկ գիծ»: Ինչ վերաբերում է Ռուսաստանը Հայաստանին կապող երկաթուղուն, որը անցնում է Աբխազիայի տարածքով, դեսպանը փոխանցել է, որ այդ ուղղությամբ որոշ աշխատանքներ ընթանում են, և Հայաստանի համար անչափ կարևոր այդ երկաթգիծը ապագայում կարող է վերաբացվել: Պաշտոնական Մոսկվան Հայաստան-Ռուսաստան հարաբերություններն ամբողջությամբ տեղափոխել է Հայաստան-ԵԱՏՄ փոխհարաբերությունների դաշտ: ՈՒ դա բնական է. հայ-ռուսական հարաբերությունները, որոնք կոչվում են ռազմավարական, վաղուց այդպիսին չեն երկկողմ հարաբերություններում: Հայաստանը ռուսների մոտ ընկալվում է ոչ թե որպես Ռուսաստանի ռազմավարական դաշնակից, այլ որպես գործընկեր պետություն, որն անդամակցել է ԵԱՏՄ-ին: Ավելին, ռուսական կողմը քիչ է մնում հայտարարի, որ Հայաստանի փրկությունը ԵԱՏՄ-ին անդամակցելն էր: Հետաքրքիրն այն էր, որ օրերս Սանկտ Պետերբուրգում անցկացված եռակողմ բանակցություններում, որտեղ պետք է Լեռնային Ղարաբաղի հակամարտության կարգավորման ուղիները քննարկվեին, անգամ Պուտինն էր խոսում Հայաստանի հետ ինտեգրացիոն գործընթացների մասին: Ռուսաստանի նախագահ Վլադիմիր Պուտինը Հայաստանի նախագահ Սերժ Սարգսյանի հետ հանդիպման ժամանակ հայտարարեց, որ Հայաստանի ու Ռուսաստանի հարաբերությունները ինտեգրացիոն գործընթացների շրջանակներում զարգանում են ինտենսիվորեն. «Կարելի է ընդգծել, որ ինտեգրացիոն գործընթացների շրջանակներում մեր հարաբերությունները զարգանում են ավելի ինտենսիվորեն, քան ավելի վաղ էր, ինչը մեծապես ուրախացնող է: Կա հնարավորություն և կա անհրաժեշտություն՝ քննարկելու համար, թե ինչպես մենք պետք է գործենք հետագայում: Ներկայումս Հայաստանը գլխավորում է ՀԱՊԿ-ը, և աշնանը պետք է տեղի ունենա բարձր մակարդակի հանդիպում»: ՌԴ նախագահն այնուհետև ընդգծել էր, որ աճել է երկու երկրների միջև ապրանքաշրջանառության ծավալը, լավ ցուցանիշներ կան գյուղատնտեսական արտադրանքի մատակարարման ոլորտում: Ու սա ղարաբաղյան բանակցությունների ընթացքում: Եթե Հայաստանի միակ արժանիքն այն է, որ Հայաստանն անդամակցում է ԵԱՏՄ-ին ու ՀԱՊԿ-ին, սա այլ հարց է: Բայց դյուրին կլիներ, եթե նաև այդ համագործակցության արդյունքները նշվեին` թե տնտեսական զարգացման, թե Հայաստանի անվտանգության պահպանման տեսանկյունից: Մետաքսյա Շալունց