ՌԴ-ն Թուրքիայի արտգործնախարարին հրավիրել է Սոչի
РИА Новости-ն հայտնում է,որ Ռուսաստանի փոխարտգործնախարար Վասիլի Նեբենզյան հայտարարել է, որ Ռուսաստանն ակնկալում է Թուրքիայի և Ուկրաինայի արտգործնախարարների ներկայությունը Սոչիում Սևծովյան տնտեսական համագործակցության կազմակերպության երկրների ԱԳ նախարարների խորհրդակցությանը և պատրաստ է երկկողմ բանակցություններ անցկացնել Թուրքիայի արտգործնախարարի հետ, եթե նա դրական պատասխանի խորհրդակցությանը մասնակցելու հրավերին: «Մենք հրավիրել ենք բոլոր նախարարներին, և սպասում ենք բոլորին, այդ թվում և՛ Թուրքիային, և՛ Ուկրաինային, բայց դեռ պատասխան չկա: Ես կարծում եմ, որ այս շաբաթ, առնվազն հաջորդ շաբաթվա սկզբին պարզ կլինի:Կազմակերպության երկրների արտգործնախարարների խորհրդի ձևաչափը չի ենթադրում երկկողմ հանդիպումների անցկացում, որովհետև դա բազմակողմանի հարթակ է»,- ասել է նա: Այնուամենայնիվ, նա ենթադրել է, որ եթե թուրք նախարարը հայտնվի Սոչիում խորհրդակցությանը, ապա «կցանկանա խոսել մեր նախարարի հետ»: «Մենք ոչ մեկից չենք փախչում, չենք թաքնվում, բոլորի հետ խոսում ենք և բաց ենք այդ առումով բոլոր տեսակի խոսակցությունների համար»,- հավելել է Նեբենզյան: Արտգործնախարարների խորհրդակցությունն անցկացվելու է Սոչիում հուլիսի 1-ին:
Հետևեք մեզ Viber-ում
