Ինչ է պատահել Պուտինին

Ռուսաստանի նախագահ Վլադիմիր Պուտինը սենսացիոն հայտարարություն է արել. նա խոստովանել է, որ Միացյալ Նահանգները միակ գերտերությունն է... Նա նման հայտարարություն է արել Պետերբուրգյան միջազգային տնտեսական ֆորումի ժամանակ ելույթ ունենալիս։ «Ամերիկան մեծ տերություն է։ Այսօր, հավանաբար, միակ գերտերությունը։ Մենք դա ընդունում ենք»,- ասել է Պուտինը: Պուտինը նաև հավելել է, որ Մոսկվան ցանկանում է և պատրաստ է աշխատել ԱՄՆ-ի հետ՝ անկախ ընտրությունների ընթացքից, սակայն նախազգուշացում է արել Վաշինգտոնին Ռուսաստանի ներքին գործերին միջամտելու հարցում։ Երբ ամերիկացի պաշտոնյաներն էին վստահեցնում, որ ԱՄՆ-ն գերտերություն է, մի ժամանակ այդ արձանագրումը ծիծաղ էր առաջացնում Մոսկվայում. Ռուսները ծաղրում էին: Բայց... Անցավ մի որոշ ժամանակ, և նույնիսկ Պուտինն այսօր արձանագրում է մի անհերքելի փաստ: Ի դեպ, Վաշինգտոնը հազիվ, թե ակնկալում էր Պուտինից նման արձանագրում: Առանց այդ մասին Պուտինի մակարդակով էլ հայտարարելու` Վաշինգտոնը դա գիտի: Այսպես, ինչու՞ Պուտինը հիմա նման հայտարարություն արեց: Այս հարցին պատասխանելու համար պետք է մեկ այլ հարց բարձրացնել` իսկ կարող է Պուտինը հավերժ լարված պահել Ռուսաստանի հարաբերությունները արևմուտքի հետ: Մանավանդ հիմա, երբ ԵՄ-ից հնչում են հավաստիացումներ, որ Արևմուտքի պատժամիջոցներն ընդդեմ Ռուսաստանի պետք է շարունակվեն: Պուտինը, վաղ թե ուշ կբարելավի հարաբերությունները Արևմուտքի հետ: Նա նպատակ էր դրել Ռուսաստանի ազդեցությունը մեծացնել միջազգային ասպարեզում, ն դա արեց: Այլ հարց է, թե ինչի գնով: Այժմ, երբ Ռուսաստանի ֆինանսատնտեսական ապագան մշուշոտ է, շատերը մոտ ապագայում սոցիալ-տնտեսական գահավիժում են կանխատեսում, Պուտինը կամաց-կամաց արևմուտքի հետ հարաբերությունները բարելավելու ուղղությամբ քայլեր կձեռնարկի: Պուտինը Պետերբուրգյան միջազգային տնտեսական ֆորումում ելույթի ընթացքում կոչ է արել վերականգնել հարաբերությունները ԵՄ-ի հետ։ Նա նշել է, որ Ռուսաստանը պատրաստ է ընդառաջ գնալ, սակայն դա միակողմանի խաղ չէ։ Նրա խոսքով՝ Ռուսաստանը չի եղել «քայքայման, երկպառակության և խնդիրների», պատժամիջոցների սահմանման նախաձեռնողը։ Նա ֆորումի լիագումար նիստում առաջարկել է փորձագիտական մակարդակով վերականգնել կապերը ԵՄ-ի հետ՝ ստեղծելու մշակումներ ապագա զարգացման համար։ Ռուսաստանը ու ԵԱՏՄ մյուս երկրները կողմ են հանդես գալիս Չինաստանի, Հնդկաստանի, Պակիստանի, ԱՊՀ երկրների և մի շարք այլ պետությունների մասնակցությամբ մեծ Եվրասիական գործընկերության ստեղծմանը։ Այս մասին հայտարարել է ՌԴ նախագահ Վլադիմիր Պուտինը Պետերբուրգյան միջազգային տնտեսական ֆորումի լիագումար հանդիպմանը։ «Մենք մեր գործընկերների հետ կարծում ենք, որ Եվրասիական տնտեսական միությունը կարող է դառնալ ավելի լայն ինտեգրացիոն ուրվագծի ձևավորման կենտրոններից մեկը»,- ասել է նախագահ Պուտինը՝ նշելով, որ այդ հարցը քննարկվել է մայիսի վերջին Աստանայում ԵԱՏՄ ղեկավարների հանդիպմանը։ ԵԱՏՄ-ն կարող է ներգրավել նոր գործընկերների՝ տեխնոլոգիական խնդիրների կատարման համար՝ հայտարարել է Պուտինը։ Նա ճկուն ինտեգրացիոն կառույցների շրջանակում համագործակցության զարգացման կոչ է արել։ Այնուամենայնիվ, Պուտինն արձանագրել է, որ Ռուսաստանը ստիպված կլինի պատասխանել Արևմուտքի քայլերին՝ չնայած այն բանին, որ նրան կմեղադրեն ագրեսիվ վարքի համար: Պետք է ապահովել ռազմավարական հաշվեկշիռը՝ հայտարարել է նա. «Ես հստակ գիտեմ, որ մենք ստիպված կլինենք պատասխանել։ Սակայն ես արդեն նախապես գիտեմ, որ մեզ կմեղադրեն ագրեսիվ վարքի մեջ՝ չնայած դա կլինի միայն պատասխան։ Սակայն պարզ է, որ մենք պետք է ապահովենք անվտանգությունը։ Ոչ միայն մեր։ Մեզ համար շատ կարևոր է աշխարհում ռազմավարական հավասարակշռությունը պահելը»։ «Հենց ռազմավարական հաշվեկշիռն է մոլորակի վրա ապահովել երաշխավորված խաղաղություն»,- հավելել է Պուտինը։ Մետաքսյա Շալունց