ԲՀԿ-ն «հերսոտել» էր

Կառավարությունը ցանկանում է շարունակել համայնքների խոշորացման գործընթացը եւ արտահերթ նիստում ներկայացրել է «ՀՀ վարչատարածքային բաժանման մասին ՀՀ օրենքում փոփոխություններ կատարելու մասին եւ տեղական ինքնակառավարման մասին» օրենքների նախագծերի փաթեթը։ Խոշորացման առաջին փուլի արդյունքները դեռ չամփոփոած Կառավարությունը, փաստորեն, շարունակում է գործընթացը, որը աշխատատեղերի կրճատում, հետեւապես սոցիալական խնդիր է առաջ բերում, փոխարենը կառավարությունը այդ ծրագրի համար միջազգային կառույցներից գումարներ է ստանում։ Անկախ պատգամավոր Էդմոն Մարուքյանը հարցրեց, թե ինչո՞ւ է առանց հանրաքվեի անցկացվում վարչատարածքային բարեփոխումը: Նա առաջարկեց նաև քվոտավորում համայնքապետերի հարցում, որ լսելի լինեն բոլոր համայնքների խնդիրները:Վաչե Տերտերյանը նշեց, որ պետք է ձեռնարկվեն միջոցառումներ, որ քվոտավորում լինի, ներկայումս քննարկվում են դրանց մեխանիզմները:Ինչ վերաբերում է հանրաքվեին, ապա, փոխնախարարի խոսքով, գործող Սահմանադրությամբ ամրագրված է, որ ԱԺ-ն լսում է համայնքների ձայնը, նոր Սահմանադրությամբ էլ խնդիր և հակասություն չկա: Էլինար Վարդանյանը հարցեց` արդյո՞ք տեսանելի քայլեր են արձանագրվել պիլոտային ծրագրի ժամանակ, որ որոշվեց ընդլայնել համայնքների խոշորացումը: Վաչե Տերտերյանը պատասխանեց, որ մեկ համայնքի կառավարման պարագայում արդյունավետությունը շատ ցածր է: Եվ պիլոտային ծրագիրը արձանագրեց որակյալ ու մրցունակ ավագանու ձևավորում:«Միշտ չէ, որ հեծանիվ պետք է հորինենք, ամբողջ աշխարհն է այս ճանապարհով գնացել և գնում, խոսքը ընդամենը կառավարման համակարգի մասին է»,- ասաց Տերտերյանը: Նիկոլ Փաշինյանը անդրադարձավ Թումանյան, Դիլիջան, Տաթեւ համայնքների խոշորացված համայնքների պիլոտային համակարգին.«Գաղափարը հետեւյալն էր, որ մենք պետք է որոշակի հետեւություններ անեինք՝ որոշելով հետագա քաղաքականությունը, բայց Դուք ինքներդ էլ նշում եք, որ ընդամենը մի քանի ամիս է անցել այդ համայնքների խոշորացումից, հիմա ստացվում է, որ առանց համոզված լինելու՝ ուր ենք գնում, ճամփա ենք ընկել, եթե չգիտենք՝ ինչի է բերելու համայնքների խոշորացումը, ստացվում է ընդամենը գյուղապետարանի աշխատողների կադրերի կրճատում ենք անում»,-նկատեց Փաշինյանը՝ հետաքրքրվելով, թե այս խոշորացումն ի՞նչ է տալու համայնքների բնակչության թվի աճի վերաբերյալ:Տերտերյանը չհամաձայնեց պատգամավորի գնահատականին։ «Խոշորացումը բոլորովին էլ փոքրացման կամ Ձեր ասած մյուս այլ նպատակները չունի, խոշորացումն ունի նպատակ կառավարման համակարգն ավելի էֆեկտիվ դարձնելու»,-ասաց Տերտերյանը՝ հավելելով, որ արդյունքներից մեկն էլ մեծ բյուջեն է նախկին փոքրի փոխարեն, ինչպես նաեւ խնայողություններ, որոնք կարող են ուղղվել ծրագրերի իրականացմանը: «Ասում եք մեծ բյուջե, բայց չեք ասում նույն այս պրոցեսի արդյունքում քանի՞ մարդ է հայտնվելու գործազուրկի կարգավիճակում»,-հակադարձեց Նիկոլ Փաշինյանը։ Տերտերյանը կրկին շրջանցեց հարցը։ Ուշագրավ էր հատկապես ԲՀԿ-ականների հերսոտած պահվածքը, Հովիկ Աբրահամյանի գործունեությանը եւ մեծ հաշվով կառավարությանը քննադատելու իրավունքից զրկված ԲՀԿ-ն սիրտը դատարկեց այս նախագծի քննարկման ժամանակ, քանի որ այդ ծրագրի պատասխանատուն Տարածքային կառավարման նախարարությունն է, որը ղեկավարում է ՀՅԴ-ական նախարար Դավիթ Լոքյանը։ ԲՀԿ խմբակցության ղեկավար Նաիրա Զոհրաբյանը բոցաշունչ ելույթ էր ունենում .«Պետք էլ չէր հանրաքվե անցկացնել, որպեսզի հասկանալ, որ համայնքներն այս պահին դեմ են խոշորացմանը, բայց նաեւ տեսանք, որ այնուհանդերձ ծրագիրը կատարվեց, իսկ ինչ վերաբերում է Սյունիքի համայնքի տխրահչռակ օրինակին, բոլորս գիտենք, որ Սյունիքում ինչ էլ դրվի հանրաքվեի, օրինակ եկեք դնենք, որ Մոզամբիկն ամենաժողովրդավարական պետությունն է, հասկանալի է, որ Սյունիքում այսօր գործում է այնպիսի մի ռեժիմ, որ պետք լինի Մոզամբիկը ճանաչել դեմոկրատիայի կղզյակ, հանրաքվեն տալու է 100 տոկոսանոց արդյունք»,-ասաց Զոհրաբյանը՝ընդգծելով, որ Սյունիքում արված որեւէ քայլի նկատմամբ ինքը վստահություն չունի: «Էս փոփոխության անունն ընդհանրապես բարեփոխում չէի դնի, որովհետեւ բարեփոխումը պոզիտիվ կոդեր է ներառում, գնացել հարցրե՞լ եք էն փնջերը, որ միավորեցիք, էդ խոշորացված համայնքների բնակիչները գո՞հ են խոշորացումից, թե՞ ոչ, մենք էնտեղ պոզիտիվ բան տեսե՞լ ենք, բացառությամբ Դիլիջանի, որտեղ հասկանում ենք՝ ով ինչ ներդրում է արել ու անելու է»,-ասաց նա՝ ընդգծելով, որ սահմանամերձ գյուղերի բնակիչները ծայրահեղ քայլերի են դիմելու, եթե քաղաքական մեծամասնությունը համայնքների խոշորացման ճանապարհով գնա:Զոհրաբյանից բացի գրոհ ձեռնարկեց նաեւ Վահե Էնֆիաջյանը՝ ասելով, որ ծրագիրը ռիսկեր է պարունակում։ Անի Սահակյան