Իրանի միջուկային խնդրի լուծումը մոդել՝ կարգավորելու համար վիճելի այլ հարցեր. Շտայնմայեր
«Գերմանիան ցանկանում է ամրապնդել կապերն Իրանի հետ: Խոսքը ոչ միայն քաղաքական ու տնտեսական ոլորտների, այլև մշակութային ու սոցիալական ոլորտների մասին է:Ավելի վաղ Թեհրանում անցկացված հանդիպումների ժամանակ երկու երկրների միջև արդեն անցկացվել են կառուցողական բանակցություններ»,- Իրանական IRNA լրատվական գործակալության փոխանցմամբ՝ Գերմանիայի արտգործնախարար Ֆրանկ Վալտեր Շտայնմայերը հայտարարել է Իրանի արտգործնախարար Մոհամմադ Ջավադ Զարիֆի հետ համատեղ մամուլի ասուլիսի ժամանակ: Շտայնմայերը նկատել է, որ Լոզանում ու Վիեննայում անցկացված «միջուկային» բանակցությունները, որոնք հանգեցրին միջուկային համաձայնագրի, եղել են արդյունավետ, և կողմերը ձգտել են խնդրի լուծմանը: «Իրանի միջուկային խնդրի լուծումը կարող է ծառայել որպես մոդել՝ վիճելի այլ հարցերի կարգավորման համար, որոնց շուրջ գերմանական ու իրանական իշխանությունները քննարկումներ են անցկացրել: Երկու կողմն էլ մտահոգ են Մերձավոր Արևելքի երկրների և հատկապես Սիրիայի ու Իրաքի կայունության ու տարածքային ամբողջականության պահպանման հարցում: Մենք հուսով ենք, որ բանակցությունները շուտով կսկսվեն Ժնևում, դրանք չեն լինի հեշտ, սակայն հուսով ենք, որ սիրիական ընդդիմությունը որոշում կընդունի դրանց մասնակցելու մասին»,- ասել է Գերմանիայի արտգործնախարարը:
Հետևեք մեզ Viber-ում
