Զվարթնոցի տեղում ռեստորա՞ն, թե.../տեսանյութ/

«Մեր ազգը քանդելու սովորություն ունի: Չի կարելի այդպես պատմություն կերտել»,-Հայելի.am-ի թղթակցի հետ զրույցում անդրադառնալով  Զվարթնոց օդանավակայանի հին ուղևորային համալիրի էստակադան քանդելու վերաբերյալ որոշմանը ասաց աշուղ Ռազմար Սասունցին: Հայրենասիրական երգեր ծնող աշուղի համար ցավ է մշակութային կոթողի քանդումը: «Իմ երիտասարդության տարիներին երկու գեղեցիկ կառույց` Երևանին նվիրեցին մեր ճարտարապետները, որը շատ ողջունելի էր: Այդ կառույցներն էին` Երիտասարդական պալատը և Զվարթնոց օդանավակայանի շենքը: Երիտասարդական պալատը այնքան արագ քանդեցին: Չհասկացվեց, անգամ,  դա ում թելադրանքն էր : Սկզբում ցույց տվեցին, թե Երիտասարդական պալատի շենքում շքեղ կառույց պետք է լինի: Տարիներ են անցել, բայց տեղում միայն մամլիչ մեքենաներ են»,-ընդգծեց աշուղը: Աշուղը ցավում է, որ նույն ճակատագրին պետք է արժանանա նաև Զվարթնոց օդանավակայանը, որով բազմաթիվ օտարազգի տուրիստներ են հիացել: «Գուցե մեկը գնել է այդ տարածքը և ուզում է շքեղ ռեստորան կամ հյուրանոց կառուցել: Բոլորը մոռանում են այդ կառույցի վրա ինչքան քրտինք է թափվել: Զարմանում եմ, թե այս ինչ թշվառ ուղեղ է մտահաղացել քանդել այս կառույցը: Պետք է հասկանան, որ սա ժողովրդի ժառանգությունն է, ոչ թե մի քանիսինը»,-եզրափակեց աշուղ Ռազմար Սասունցին: Լուսինե Ղազարյան Մանրամասները` տեսանյութում: