Պատգամավորների բառապաշարում նման արտահայտություններ պետք է չլինեն. Շուշանի հարցը կքննվի՞ էթիկայի հանձնաժողովում

«Պատգամավորների, քաղաքական գործիչների բառապաշարում նման արտահայտություններ պետք է չլինեն»,-այսօր հրավիրված ասուլիսին պատասխանելով լրագրողի հարցին, թե ԱԺ ՀՀԿ խմբակցության պատգամավոր Շուշան Պետրոսյանը իրավունք ունի ՝ «աչքերդ կհանեմ» արտահայտությունն օգտագործել` ասաց  ԱԺ Էթիկայի ժամանակավոր հանձնաժողովի նախագահ, ԲՀԿ պատգամավոր  Վահան Բաբայանը: «Ես այս դեպքի վերաբերյալ իմ անձնական կարծիքն ունեմ, որն արտահայտելն էթիկապես ճիշտ չէ: Ամեն դեպքում, ես նման արտահայտությունները չեմ ընդունում, որովհետեւ նման բաները պետք է տեղ չգտնեն պատգամավորների, քաղաքական գործիչների բառապաշարում»,-ընդգծեց Վահան Բաբայանը: Բաբայանի փոխանցմամբ՝ երեկվա դրությամբ հանձնաժողովը ՀՔԱՎ-ի դիմումը չի ստացել: Այնուամենայնիվ, եթե այսօր դիմումը ստացվի, չի բացառվում, որ այն կներգրավվի վաղը կայանալիք նիստում: Հիշեցնենք, որ օրեր պատգամավոր Շուշան Պետրոսյանը ֆեյսբուքյան օգտատեր Գայանե Շահինյանին ասել էր. «Չհամարձակվես գարշելի երախդ բացել ու նման էժան ու հավուղեղ մակարդակի արտահայտվել երկրիս, մեր բանակի, մեր Պաշտպանության նախարարի մասին, ուշադիր լսի, աչքերդ կհանեմ ու ոնց ուզում ես արձագանքի, ԼԱԿՈՏ»: Նշենք , որ ԱԺ ՀՀԿ պատգամավոր Շուշան Պետրոսյանին զայրացրել էր  ֆեյսբուքի օգտատեր Գայանե Շահինյանի գրառումը,որը վերջինս գրել էր, երբ  սահմանային գոտում հերթական զոհված ժամկետային զինծառայողն էր զոհվել  . «Ինչ ցավակցել, դրանք դատարկ խոսքեր են, ով ա հասկանում, թե հիմա ինչ ա կատարվում նրա հարազատների հոգում… Էս պետություն չի, երկիր չի, նողկում եմ ազգից, իշխանություններից, Պաշտպանության նախարարությունից: Որ Սեյրան Օհանյանի նմանը կանգնի զոհված զինվորի գլխավերևում, ասի` մենք չկարողացանք քեզ պաշտպանենք, թող հայոց հողը պաշտպանի… Դուք եք ուտում ձեր զինվորի գլուխը, ոչ թե թուրքը: Անմեղ երեխեքը գնան սահման պահեն, իսկ ձեր հղփացած լակոտները ֆռֆռան էդ երեխեքի կյանքի հաշվին»: Այս առնչությամբ հունվարի 13-ին Հելսինկյան քաղաքացիական ասամբլեայի Վանաձորի գրասենյակի կողմից փոստային առաքման միջոցով դիմում է ներկայացվել ՀՀ Ազգային ժողովի էթիկայի հանձնաժողով՝ ՀՀԿ խմբակցության պատգամավոր Շուշան Պետրոսյանի կողմից ՀՀ Ազգային ժողովի կանոնակարգ օրենքով սահմանված էթիկայի նորմերը խախտելու, մասնավորապես՝ ֆեյսբուքյան օգտատեր Գայանե Շահինյանի հասցեին հնչեցրած բռնության և սպառնալիքի կոչերի ու վիրավորական արտահայտությունների վերաբերյալ որոշում կայացնելու հարցով: Լուսինե Ղազարյան