Թալիբները Պակիստանում հարձակվել են համալսարանի վրա

Պակիստանի Չարսադդա քաղաքի համալսարանում զինված հարձակման հետեւանքով զոհվել է 3 մարդ, վիրավորվել՝ 50-ը։ Ոստիկանությանը հաջողվել է վերացնել 2 չարագործի, հայտնում են տեղական լրատվամիջոցները։ Geo TV հեռուստաընկերության տեղեկություներով՝ տուժածներից մի քանիսի վիճակը ծայրահեղ ծանր է։ Հարձակվողների հստակ թիվը հայտնի չէ, ենթադրվում է, որ նրանք վեցը կամ ութն են եղել, փոխանցում է «ՌԻԱ Նովոստի»-ն։ Ավելի վաղ հաղորդվում էր, որ համալսարանական հանրակացարանից մարդկանց տարհանել են։ Ականատեսներից մեկը Daily Pakistan-ին հայտնել էր, որ հարձակման ժամանակ սպանվել է քիմիայի ամբիոնի մի պրոֆեսոր։ Նա նաեւ նշել է, որ հարյուրավոր ուսանողներ համալսարանի տարածքում են մնում։ Դեպքի վայր են ժամանել Պակիստանի ԶՈւ ջոկատները։ Փրկարարները հաստատել են, որ կան այլ զոհեր, սակայն նրանց թիվը հայտնի չէ։ Գրոհի պահին համալսարանի տարածքում եղել է մոտ 3 հազար ուսանող։ Ավելի վաղ համալսարանի ռեկտորը հայտնել էր, որ ուսանողներից եւ դասախոսներից ոչ ոք չի տուժել։