Ո՞վ է պատասխան տալու, որ Բուդաղյանը մոտ մեկ տարի անազատության մեջ մնաց
Սյունիքի մարզպետ Սուրիկ Խաչատրյանի՝Լիսկայի, դեմ մահափորձ պատվիրելու մեղադրանքով կալանավորված Արա Բուդաղյանի նկատմամբ ընտրված խափանման միջոցը վերացվել է, Բուդաղյանն այսօր ազատ է արձակվել: Հիշեցնենք՝ անցյալ տարվա մայիսի 20-ին հայտարարվեց, որ Կապան - Գորիս ավտոճանապարհին կրակահերթեր են արձակվել Սյունիքի մարզպետի ավտոմեքենայի վրա, որում այդ պահին եղել են Սուրիկ Խաչատրյանը, նրա օգնականը և վարորդը: Նախ գործը քննում էր Քննչական կոմիտեն, հետո գլխավոր դատախազը պահանջեց նյութերը, ուսումնասիրեց,ապա գործն ուղարկեց Ազգային անվտանգության ծառայություն, ինչից անմիջապես հետո՝ դեպքից մեկուկես ամիս անց կալանավորվեցին Արա Բուդաղյանն ու երեք այլ անձինք: Բուդաղյանը կալանավորվեց մահափորձը պատվիրելու, Հենրիկ Ավագյանը՝ այն իրականացնելու, Գարեն Աթաջանյանն ու Վիտալի Մինասյանը՝ մահափորձին աջակցելու մեղադրանքներով։Արա Բուդաղյանը Սուրիկ Խաչատրյանի տան մոտ երկու տարի առաջ սպանված Ավետիք Բուդաղյանի եղբայրն է։ Արա Բուդաղյանի ձերբակալությունն եւ առհասարակ Սուրիկ Խաչատրյանի դեմ ենթադրյալ մահափորձը աբսուրդի ժանրից էին; Նախ քչերն էին հավատում, որ մահափորձ է իրականացվել, դրանից բացի առնվազն տարակուսելի էր, որ Լիսկայի ավտոմեքենան հիմնովին վնասվել էր, բայց նրա մազն անգամ չէր թեքվել: Կասկածներն այն ուղղությամբ էին, որ մարզպետն ինքն է սարքել այդ մահափորձը, այնուհետեւ սլաքներն ուղղել Բուդաղյանների ուղղությամբ, որպեսզի ցույց տա, որ ինքը Բուդաղյանների թիրախում է, որ Բուդաղյանները հարցերը լուծում են սպանությամբ եւ այլն: Արա Բուդաղյանի հայրը՝ Էմիլ Բուդաղյանը որդու կալանավորման ընթացքում անընդհատ պնդում էր, որ առաջադրված մեղադրանքը «լրիվ անհիմն է», և ինքը չի կարողանում հասկանալ, թե ինչու են հենց իր որդուն կասկածում այդ հանցագործության մեջ։ Բուդաղյանի փաստաբան Հայկ Ալումյանը բողոքել էր կալանքի որոշումը, Վերաքննիչ դատարանը, սակայն: Էմիլ Բուդաղյանը քննչական մարմիններին ու իշխանություններին հորդորում էր «մարդ լինել» և դադարեցնել իրենց ընտանիքի նկատմամբ շարունակվող հետապնդումը: Արա Բուդաղյանը փաստացի պատանդի կարգավիճակում էր այս ընթացքում, մինչդեռ ԱԱԾ-ի քննիչները չէին կարողանում ապացուցել նրա կապը մահափորձի հետ: Արդյունքում Արա Բուդաղյանը առանց պատճառի 11 ամիս անցկացրեց անազատության մեջ: Ուշագրավը թերեւս Բուդաղյանի արդարացման հետ Սուրիկ Խաչատրյանի հիվանդության պատճառով երկիրը լքելու համընկնումն է: Սուրիկ Խաչատրյանը, հավանաբար, իմանալով, որ Բուդաղյանին ազատ են արձակելու, որոշել է իր գլխի ճարը տեսնել. հիվանդացել է ու լքել երկիրը: Ի վերջո, պետք է մեկը պատասխան տա, թե ինչու են մարդուն առանց պատճառի մոտ մեկ տարի փակի տակ պահել: Հատկապես մի դեպի համար, որը սկզբից կասկածելի էր թվում ու բոլորն էին վստահ, որ Սուրիկ Խաչատրյանն անձամբ է կազմակերպել: Անի Սահակյան
Հետևեք մեզ Viber-ում
