Հրանտ Դինքի հիշատակի երթն ուղեկցվել է ջրցան և զրահապատ մեքենաներով

Hurriyet Daily News-ը արձանագրել է, որ Ստամբուլում հազարավոր մարդիկ ոգեկոչել են սպանված լրագրող Հրանտ Դինքի մահվան իններորդ տարելիցը: Միաժամանակ աղբյուրը նշում է, որ այս ինը տարիների ընթացքում ոչ մի հստակ իրավական քայլ չի ձեռնարկվել հայազգի անվանի լրագրողի սպանության բացահայտման գործում: Իսկ Ստամբուլում Դինքին հիշել են երթով, որը սկսվել է Շիշլիի ռազմական թանգարանի մոտ և շարունակվել դեպի «Ակոս» թերթի խմբագրություն, որի գլխավոր խմբագիրն էր Դինքը և որի մուտքի մոտ էլ օրը ցերեկով սպանվել էր Օգուն Սամասթի ձեռքով: Նշվում է, որ Դինքին հիշողների երթը ուղեկցվել է ջրցան մեքենաներով և զրահամեքենաներով, ոստիկանության կողմից անվտանգության խիստ միջոցառումների պայմաններում: