3,5 միլիոն՝ միլիարդատիրոջ հետ ընթրելու համար

eBay-ում տեղի ունեցած աճուրդով 3,457 միլիոն դոլարով վաճառվել է ամերիկացի հանրահայտ միլիարդատեր Ուորեն Բաֆետի հետ ընթրելու իրավունքը։ Ինչպես փոխանցում է ТАСС-ը, Բաֆեթի հետ ընթրել պատրաստվողը ցանկացել է անանուն մնալ։ Նման աճուրդներ անցկացվում են ամեն տարի՝ 2000 թվականից։ Նպատակը բարեգործությունն է։ Աճուրդից ստացված գումարները փոխանցվում են հիմնադրամների։ Նշվում է, որ 2000 թվականին Բաֆեթի հետ ընթրելու հնարավորությունը վաճառվել է ընդամենը 24 հազար դոլարով, իսկ 16 տարիների ընթացքում այդ կերպ հավաքվել է 23 միլիոնից ավել գումար։ Մանրամասնվում է, որ ընթրիքները տեղի են ունենում Նյու Յորքի կենտրոնում գտնվող մսային Smith and Wollensky ռեստորանում եւ տեւում շուրջ 3 ժամ։ Բաֆեթի խոսքով՝ նման հանդիպումների ժամանակ քննարկվում է թեմաների լայն շրջանակ՝ բացի իր հետագա բիզնես ծրագրերից։ Ընթրիքի հնարավորությունը գնած անձն իրավունք է ունենում եւս 7 հոգու բերել իր հետ։