Ճնշե՞լ են
Ազգային ժողովը սկսել է քննարկել Հարկային օրենսգրքի նախագիծը: Հիմնական զեկուցող, ՀՀ պետական եկամուտների կոմիտեի նախագահի տեղակալ Վախթանգ Միրումյանը երկար-բարակ ներկայացնում էր օրենսգրքով սահմանված արտոնությունները։ Նախագծով անհատ ձեռնարկատերերի համար ըստ Միրումյանի՝ նվազեցվում է եկամտային հարկի չափը: «Խոսքն ընդհանուր դաշտում գործող անհատ ձեռնարկատերերի մասին է: 24.4 և 26 տոկոս դրույքաչափերը նվազեցվում են և սահմանվում է միասնական դրույքաչափ շահութահարկի հետ միասին՝ 20 տոկոս: Շահութահարկով նախատեսվում է նաև մի շարք ազատականացումներ:
Մասնավորապես, կապված տնտեսվարող սուբյեկտների կողմից ծախսերի ավելացման հետ՝ առաջարկվում է ազատականացնել մի շարք նորմավորվող ծախսեր: Խոսքը գնում կադրերի պատրաստման, վերապատրաստման, գովազդի շուկայում մարքետինգի հարցերի մասին, որոնց նպատակն է բարձր կրթական մակարդակ ունեցող աշխատակիցներ ունենալն է»։ Հարկային օրենսգրքի առանձնահատկություններից մեկն էլ ըստ բանախոսի այն է, որպեսզի միջինժամկետ և երկարաժամկետ ժամանակահատվածում ամրապնդվի հարկաբյուջետային քաղաքականությունը, հնարավորինս կրճատվի դեֆիցիտի մեծությունը լրացուցիչ եկամուտների ապահովման հաշվին, ինչպես նաև պետությունը հնարավորություն ունենա ավելի լայն և հանրօգուտ ծրագրեր իրականացնել կրթության, սոցիալական ապահովության, առողջապահության և այլ կարևոր բնագավառներում։
Նախագիծն, ինչպես հայտնի է, տեւական ժամանակ է քննարկում ու քննադատում են ոչ միայն ընդդիմադիրները, այլեւ անկախ մասնագետները, նույնիսկ ՀՀԿ-ական գործարար պատգամավորները։
Հետեւաբար, Միրումյանին ուղղված հարցերի պակաս չզգացվեց։ ԲՀԿ-ղեկավար Նաիրա Զոհրաբյանն ասաց, թե տեսակետ կա, որ քանի որ Հայաստանի արտաքին պարտքը հատել է ՀՆԱ-ի հիսուն տոկոսի վտանգավոր շեմը, այս նախագիծը պարտադրանք է նաեւ միջազգային վարկատու կազմակերպությունների՝ մասնավորապես Համաշխարյաին բանկի կողմից, որպեսզի Հայաստանը շարունակի համարվել վարկունակ։ Վախթանգ Միրումյանը հակադարձեց, թե նախագիծն ուղղված է կոռուպցիոն ռիսկերի նվազեցմանը.«Բնականաբար ռիսկեր կհնչեն, եւ մենք պատրաստ ենք դրանք քննարկել, միգուցե մեզ կհաջողվի փարատել մտահոգությունները, որ այդ ռիսկերը չկան, իսկ եթե մենք տեսնենք, որ կան, կշարունակենք այդ քննարկումները»,-ասաց ՊԵԿ տեղակալը: Նաիրա Զհրաբյանի համար զարմանալի էր, որ եթե իսկապես հարկային օրենսգրքի այս նախագիծը բերում է կոռուպցիոն ռիսկերի նվազեցմանը, ապա տնտեսվարողների մոտ մտահոգությունն ինչո՞վ է պայմանավորված:«Ինչ է մեր ձեռնարկատերերը, տնտեսվարողները մազոխի՞ստ են, որ այստեղ լուրջ ռսիկեր են տեսնում, իսկ դուք պնդում եք հակառակը»,-տարակուսեց նա: Վախթանգ Միրումյանի խոսքով՝ իրենք պատրաստ են լսել ցանկացած մտահոգություն, փորձելու նվազագույնի հասցնել եւ հնարավորության դեպքում բացառել կոռուպցիոն ռիսկերը:
Զոհրաբյանի մյուս դիտարկմանը, Միրումյանը պատասխանեց, որ որևէ պարտադրանք, ճնշում միջազգային կազմակերպություների կողմից չկա՝ ավելի հարկեր հավաքագրելու առումով: «Ավելի հարկեր հավաքելը բխում է բոլորիս շահերից, որովհետև դա հնարավորություն է տալիս հավաքագրելու պետության համար հանրօգուտ աշխատանքներ: Միջազգային կազմակերպությունները կարող են խորհուրդ տալ, ոչ թե ճնշել: Տվյալ երկրի գործը և ներքին քաղաքականությունն է` ընդունի՞ այդ խորհուրդները, թե՞ չընդունի»,- ասաց նա: Անդրադառնալով Զոհրաբյանի այն դիտարկմանը, թե հարկային նոր օրենսգիրքը պարունակում է կոռուպցիոն ռիսկեր, Միրումյանը պատասխանեց, որ նոր օրենսգիրքը, ճիշտ հակառակը, միտված է կոռուպցիոն ռիսկերի նվազեցմանը:
ՀԱԿ պատգամավոր Արամ Մանուկյանը տարակուսեց, թե շաբաթ օրը ԱԺ նախագահությունը դեռ որոշում չուներ, որ հարկային նոր օրենսգիրքը մտնելու է քառօրյայի օրակարգ, մինչդեռ 2 կիլոգրամ կշռով 700 էջանոց փաստաթուղթը բաժանել են պատգամավորներին երեկ չէ առաջին օրը, որ չեն հասցրել անգամ կարդալ, ծանոթանալ:«Այս ծանր քառօրյայի վերջում, մենք էլ` հոգնած, դուք բերել եք այս օրենսգիրքը: Մենք ցանկանում ենք լուրջ մասնակցել այս քննարկմանը, բայց ֆիզիկապես չունենք հնարավորություն, անգամ` մեր փորձագետներն ու տնտեսագետները դեռ չեն հասցրել կարդալ: Նույնիսկ եթե սա համարես գեղարվեստական գիրք ու փորձես սուրճով ու կոնյակով կարդալ, առնվազն մի քանի օր պետք կգա, մանավանդ, որ սուրճն ու կոնյակը չեք տալիս»,- ասաց Արամ Մանուկյանը:
Էդուարդ Շարմազանովը նշեց, որ էլեկտրոնային տարբերակով փաստաթուղթը եղել է ապրիլ ամսից: Ըստ նրա`մինչև սեպտեմբեր կա ժամանակ, որ պատգամավորները ամբողջությամբ քննարկեն հարկային նոր օրենսգիրքը և ուսումնասիրեն:Պատգամավոր Խաչատուր Քոքոբելյանն էլ ասաց.«Պետք է աշխատավարձերի ձևակերպման համար նպաստավոր օրենսդրական դաշտ ստեղծենք՝ մարդը պետք է մոտիվացիա ունենա, որպեսզի փաստացի վճարվող աշխատավարձը ձևակերպի, իսկ այս Հարկային օրենսգիրքը այդ մոտիվացիան չի ստեղծում: Առաջարկ կար, որ ընդհանուր դրույքաչափ սահմանվի՝ 20 տոկոս։ Ես որևէ դրական միտում չեմ տեսնում այս նախագծում, ասեք, խնդրում եմ, որտե՞ղ է Հարկային նոր օրենսգրքի «պլյուսը»» ։ «Գործիքակազմը, թե ինչպես ենք պայքարելու ստվերային շրջանառության դեմ այն է, որ վարձու աշխատողների շուրջ 85 տոկոսը 204 հազարի միջակայքում են, եւ երբ մենք առաջարկում ենք եկամտահարկի դրույքաչափի նվազեցում, ապա դա պետք է նպաստի մինչեւ 120-130 հազար ցույց տրված աշխատավարձի բարձրացմանը, որը կարող է հասնել շուրջ 200 հազարի»։
Քննարկումը կշարունակվի արտահերթ նիստում
Անի Սահակյան