Կառավարությունը ոտքը գազին է դրել

Այսօր ԱԺ-ում գործադիր մարմնի հետ հարց ու պատասխանին պոպուլիստական հայտարարությունների պակաս չզգացվեց։ Տպավորությունն այնպիսին էր, որ ՀՀԿ-ն մեկնարկել է նախընտրական մարաթոնը եւ սրընթաց առաջ է մղվում, որի <<դեմն առնելը>> գրեթե անհնար է դառնալու։ Վարչապետ Հովիկ Աբրահամյանը պատասխանելով ՀԱԿ խմբակցության ղեկավար Լևոն Զուրաբյանի հարցին՝ պետական ապարատում օպտիմալացման վերաբերյալ, ասաց, որ առաջիկա օրերին Կառավարությունը մտադիր է կրճատել մի քանի փոխնախարարների։ «Մենք հետեւողականորեն առաջ ենք գնալու: Արդյունքները Դուք կտեսնեք: Օրինակ՝ գյուղնախարարությունում սկսվել են կրճատումներ: Այսօր մենք կրճատել ենք փոխնախարարի եւս մեկ հաստիք էկոնոմիկայի նախարարությունում, իսկ վաղը կկրճատենք եւս 3-4-ը: Մենք պետք է անենք այնպես, որ յուրաքանչյուր դրամ ծախսվի ավելի արդյունավետ, ու գործընթացը հետեւողական լինի»,- ասաց վարչապետը Կառավարության աշխատակազմի ղեկավար-նախարար Դավիթ Հարությունյանն էլ ավելի հստակեցում հաղորդեց հարցին՝ տեղեկացնելով, որ խոսքը տվյալ դեպքում վերաբերում է գյուղատնտեսության նախարարությանը, այսինքն կրճատվելու են գյուղատնտեսության փոխնախարարները։ Սերգո Կարապետյանը 5 փոխնախարար ունի: Թե այս մարդիկ տարիներ շարունակ հատկապես ինչո՞վ են զբաղվել, և որքան մեծ է եղել նրանց ներկայության արդյունավետությունը, ոչ ոք ասել չի կարող։ Սակայն այնքան էլ պարզ չէ, թե ինչու է հենց գյուղնախարարությունը հայտնվել թիրախում։ Իհարկե, կարելի է ենթադրել պատճառների մասին, գուցե հենց տնտեսող նախարարն է խորհուրդ տվել, որպեսզի կրճատեն իր ենթականերին, նա վերջերս խոստովանեց, որ ինքն այնքան տնտեսող է, որ նախարարության լույսերն օրը ցերեկով անջատում է, իր միջոցներով վերանորոգում է նախարարության զուգարանները եւ այլն։ Կամ ՀՀ կառավարությունը որոշել է փոխնախարարներին փոխարինել քահանաներով, չէ՞ որ վերջին տարիներին այս գերատեսչությունը իր ողջ քաղաքականությունը կառուցում է Աստծո բարեգթության վրա, որին գյուղացու  ձայնը հասցնում են հենց քահանաները։ Թե ինչ արդյունավետություն է ունենալու մի քանի հաստիքի կրճատումը, դժվար է ասել, սակայն մի բան հաստատ է, որ իրական տնտեսումները հաստիքների կրճատման տարբերակով չէ, որ պետք է արվեն։ Թերեւս նախընտրական տրամադրությունները չլարելու պատճառով է, որ կառավարությունը առժամանակ հետաձգեց ուսանողների համար զինվորական ծառայությունից տարկետումն արգելող օրենքի նախագիծը, Դավիթ Հարությունյանը հայտարարեց, թե այդ նախագիծը քննարկվել է կառավարությունում և հետ է ուղարկվել կրթության և գիտության նախարարություն լրամշակման համար: «Նախագիծը մեզ մոտ քննարկվել է և որոշ դիտողություններից հետո հետ է ուղարկվել լրամշակման: Նախարարությունը պարտավոր է այն լրամշակել: Ինձ արդեն տեղեկացրել են, որ լրամշակման աշխատանքներն արդեն ավարտվել են»,- նշեց Հարությունյանը: Հարությունյանը վստահեցրեց, որ առաջիկայում այդ օրենքի նախագծի շուրջ քննարկումներ կլինեն կառավարությունում և խոստացավ այդ քննարկմանը հրավիրել պատգամավորներ Ռուբիկ Հակոբյանին և Թևան Պողոսյանին, ովքեր ժամանակին նման նախագիծ հեղինակել են, որն այն ժամանակ չի ընդունվել: Կասկած չկա, որ այդ նախագիծը շրջանառության մեջ կդրվի խորհրդարանական ընտրություններից հետո, քանզի այն ռիսկեր պարունակող է։ Անի Սահակյան