ՀՀԿ-ն աննախադեպ պասիվ է
Խորհրդարանում 2015-ի բյուջեի կատարողականի վերաբերյալ ամփոփիչ բուռն ելույթներ են հնչում։ Հովիկ Աբրահամյանի կառավարության գործունեությունն անգամ քննադատվեց ԲՀԿ-ի կողմից։ Նաիրա Զոհրաբյանը ելույթում անդրադարձավ նաեւ կառավարության՝ կոռուպցիայի ու մենաշնորհների դեմ պայքարին․«Հիմա կրկին հայտարարվեց «սրբազան» պայքար կոռուպցիայի դեմ, ինչի՞չկա քաղաքական ուժերի եւ հանրության շրջանում վստահություն այդ պայքարի հանդեպ, քավ լիցի, թող մենք ամենահոռետեսները լինենք, եւ թող այդ պայքարն իրական արդյունք տա, բայց երբ ասում են երեքշաբաթյա ժամանակ ենք տալիս մոնոպոլիաների պայքարի համար, կներեք, ես իրավունք ունեմ չհավատալու»,-Զոհրաբյանն առաջարկեց դուրս գալ Բաղրամյան պողոտա եւ շարքային քաղաքացիներին հարցնել, թե ովքեր են ՀՀ-ի մոնոպոլիստները: Նա դժգոհեց նաեւ, որ կատարողականի քառօրյա քննարկումներն անցնում են կիսադատարկ դահլիճում․«Սարսափելի ձանձրալի է, որովհետեւ հերթական անգամ քննարկումները հիշեցնում էին պրոֆտեխուսումնարանի հաշվապահական, հաշվառման դասընթացներ. տվել են այսքան, ծախսել են այսքան»։ Զոհրաբյանի խոսքով պատճառն ամենեւին էլ այն չէր, որ պատգամավորներին չի հետաքրքրել բյուջեի կատարողականի հաշվետվությունը.«Մեզ հետաքրքրում էր թե՛ բովանդակային հարցերի պատասխանները, թե՛ ոլորտի քաղաքական պատասխանատուների պատասխանները, բայց քանի որ բազմաթիվ ոլորտների առաջին դեմքեր հերթական անգամ հարկ չհամարեցին ներկայանալ բյուջեի կատարողականի քննարկմանը, մենք ստիպված էինք հաշվառման կուրսեր լսել»,-ասաց նա՝ դժգոհելով, որ շատ գերատեսչությունների ղեկավարներ չներկայացան զեկույցներով, Զոհրաբյանը նորից տեղափոխվեց հայտարարված պայքարին․«Հիմա որ ասում են պետք է կեղծ հայտարարագրերի դեմ պայքար մղենք, դա էդքան էլ չեմ հասկանում, մեր բոլոր միլիոնատեր կամ միլիարդատեր պաշտոնյաները, որքանով ուսումնասիրել եմ կենսագրությունները, ո՛չ Մանթաշովի թոռներն են եղել, ո՛չ Ռոքֆելերի պրյամոյ ժառանգներն են եղել, ո՛չ գանձ են գտել, բայց չգիտես ինչի նրանց բաջանաղները, քենիները եւ հատկապես զոքանչները միլիոնատերեր են, հիմա դա ո՞նց է կարգավորվելու, ո՞նց ենք ապացուցելու, որ անօրինական է, բերում են հայտարարագիր, այնտեղ ամեն ինչ օրինական է, իրենք էլ պատրաստ են «պապայի արեւ» երդվել, որ միլիոններն օրինական են»,-նկատեց նա:ՕԵԿ խմբակցության քարտուղար Մհեր Շահգելդյանը խոսեց վարկերի աճի մասին, որը նրա կարծիքով անընդունելի է:«Հայաստանի վրա և մեր սերունդների վրա դա լուրջ բեռ է դնում, եւ հարց է ծագում անընդհատ, թե ով է վարկեր տալու: Այս քանակի վարկերի ներգրավումը տնտեսության մեջ լրջագույն վտանգ է հետագայում Հայաստանի վարկունակության համար,-ասաց պատգամավորը՝ ընդգծելով, որ մեկ տարվա մեջ արտաքին պարտքը աճել է 536 միլիոն դոլարով: ՕԵԿ պատգամավորը խոսեց նաեւ ներդրումների քանակի անկման մասին՝ նկատելով, որ պետք է նախապայմաններ ստեղծել ներդրումների դաշտ ձևավորելու համար, իսկ սպառման կրճատումը մտահոգիչ է, քանի որ այն աղքատության ու կամ արտգաղթի ահագնացման մասին է խոսում.«Եթե ներքին սպառումը չխթանվեց, եւ եթե արտահանումը չխթանվեց, ապա ես չեմ տեսնում տնտեսության զարգացման որոշակի ճանապարհներ»,-եզրափակեց նա: Հեղինե Բիշարյանն էլ տարակուանք հայնեց՝ ոստիկանությանը հատկացվելիք բյուջեն տարեցտարի մեծանում է, շատանում են նաեւ հանցագործությունների թիվը, ուր են գնում այդ գումարները, ինչի՞ վրա են ծախսվում։ Ի դեպ, ՀՀԿ-ն տարօրինակ պասիվ է, մեկ պատգամավոր է գրանցվել՝ Խոսրով Հարությունյանը։ ԱԺ նախագահ Գալուստ Սահակյանը հայտարարեց, ՀՀԿ-ականները նախապես էին իրենց հարցերը սպառել: «Զեկուցողը կարողանում էր ժամանակին պատասխանել, բնականաբար, որովհետև մեզանից ոչ բոլորն էին ֆինանսիստներ, փորձում էին դրսում ինչ-որ բան գրել և դրանով պայքարել բյուջեի համար: Սա ոչ թե վարկաբեկում եմ Ազգային ժողովին, այլ ուզում եմ ասել, որ մենք պիտի քաղաքական լուծում տանք»,- ասաց Գ.Սահակյանը:Ըստ նրա` բյուջեի կատարողականի հաշվետվությունը ցույց տվեց, որ հաջողությամբ դիմագրավել են մեր երկրի առջև ծառացած մարտահրավերներին և ապահովել բավարար երաշխիքներ խնդիրները լուծելու համար. «Հավատացնում եմ, որ իշխանություններն ունեն բավական քաղաքական կամք խնդիրները լուծելու համար»: Անի Սահակյան