Ադրբեջանի տնտեսությունը 2004 թվականից 300 տոկոսով աճել է. Իլհամ Ալիև
APA գործակալության հաղորդմամբ՝ Ադրբեջանի նախագահ Իլհամ Ալիևը Բեռլինում Ադրբեջանա-գերմանական տնտեսական ֆորումի ժամանակ, անդրադառնալով Ադրբեջանի տնտեսական նվաճումներին, հայտարարել է, որ անկախության 25 տարիները եղել են «քաղաքական ու տնտեսական վերափոխումների տարի»: «Այդ տարիները դարձան քաղաքական ու տնտեսական վերափոխման տարիներ: 2004 թվականից Ադրբեջանի տնտեսությունը 300 տոկոսով աճել է: Մեզ հաջողվեց զգալիորեն կրճատել աղքատության ու գործազրկության մակարդակը: Ներկայումս այդ երկու ցուցանիշներն էլ մոտ են 5 տոկոսին: Մեր տնտեսության մրցունակությունն աճել է, քանի որ նավթի վաճառքից ստացված եկամուտները մենք ներդրել ենք ոչ նավթային սեկտորում: Ներկայում եվրոպական մի շարք երկրներ իրենց նավթի մոտ 30 տոկոսը գնում են Ադրբեջանից: Մենք այժմ մեր գործընկերների հետ իրագործում ենք Հարավային գազային միջանցքի նախագիծը: Ադրբեջանում գազի ապացուցված պաշարները կազմում են 2.6 տրիլիոն խորանարդ մետր: Վստահ եմ, որ հետախուզական նոր աշխատանքների շնորհիվ մենք դեռ անպայմանորեն կմեծացնենք այդ ցուցանիշները: Հարավային գազային միջանցքի նախագծի արժեքը կազմում է 45 միլիարդ դոլար: Մեր տվյալներով՝ այդ գումարի մեկ քառորդի չափով ստորագրվել են պայմանագրեր»,- հայտարարել է Ալիևը:
Հետևեք մեզ Viber-ում
