ԱԱԾ-ն նեղն է ընկել
«Ազգային անվտանգության մարմիններում ծառայության մասին» Հայաստանի Հանրապետության օրենքում լրացում կատարելու մասին» նախագծի քննարկումն առանց էմոցիաների չանցավ: Կատարվող փոփոխության համաձայն` գեներալ-մայոր և գեներալ-լեյտենանտ կոչում ունեցող անձանց ծառայության սահմանային տարիքը` 60, հավասարեցվում է գեներալ-գնդապետ կոչում ունեցողների ծառայության տարիքին` 65, ԱԱԾ ուսումնական հաստատության դասախոսական կազմինը` 10 տարի: Առաջարկվող փոփոխություններով` ԱԱԾ-ում ծառայության կարող են անցնել նաև ոստիկանության, ԴԱՀԿ-ի, ՔԿՀ-ի, արդարադատության պետական ծառայողները, դատախազներ, ԱԱԾ նախկին ծառայողներ, նաև կկարողանան ծառայության անցնել գիտական աստիճան ունեցող և զինապարտությունից ազատված անձինք: Նախագիծն օրենսդիրին զեկուցեց ԱԱԾ պետի տեղակալ Արզուման Հարությունյանը: ԲՀԿ խմբակցության ղեկավար Նաիրա Զոհրաբյանը հայտարարեց, որ ոչ միայն ազգային անվտանգության ոլոտում, այլև բազմաթիվ կարևորագույն ռազմավարական ոլորտներում ունենք մասնագետների պակաս: Նա համաձայնեց՝ գիտնականներ պետք է լինեն, բայց ինչո՞ւ դա պետք է լինի բանակ չգնալու հաշվին.«Մենք բոլորս էլ գիտենք, ովքեր չեն ծառայում բանակում, դրանք պատգամավորների, նախարարների, օլիգարխների, տարբեր բարձրաստիճան պաշտոնյաների զավակներն են, ովքեր ասպիրանտուրայի քողի տակ զբաղվում են դեզերտիրությամբ: Մտավախություն չունե՞ք, որ դրանով ազգային անվտանգության համակարգը կդարձնենք կադրերի բյուրո, ահա էդպիսի գիտնականների համար, որոնց գիտնական համարելն անպարկեշտություն կլինի: Եվ այս անհավասար մրցակցության պայմաններում՝ բանակում ծառայած և գիտական գործունեությամբ զբաղվողները դուրս կմնան»: Հարությունյանը բացատրեց, որ օրենքի փոփոխությունները սահմանափակում չեն մտցրել նրանց համար, ովքեր գիտական աստիճան ունեն և ծառայում են բանակում, գիտական կոչում ունեցող գիտնականներ պետք են տարբեր բնագավառներում, իսկ Ազգային անվտանգության մարմիններում կադրերի ընտրությունը կատարում են կոնկրետ խնդիրներ լուծելու համար: Ըստ նրա` ուսումնասիրություն է կատարվում, թե ինչպես է կատարվել գիտական թեզի պաշտպանությունը, անգամ բարեկամներն ովքեր են: ԱԱԾ համակարգում, ըստ բանախոսի, միջնորդությամբ ընդունելություններ չեն լինում: «Բերեք էդ քառակուսի բաներից դուրս գանք,- հորդորեց ԱԺ փոխխոսնակ Էդուարդ Շարմազանովը` հավելելով, որ պաշտոնյաների երեխաներն էլ կարող են արժանավոր լինել,- Կրա՞կն են ընկել, որ պատգամավորի երեխաներ են»: Ն.Զոհրաբյանը վրդովվեց Շարմազանովի «քառակուսի» արտահայտությունից և բորբոքված հակադարձեց նրան ու պնդեց իր տեսակետը: «Ես տանձից եմ խոսում, դուք՝ խնձորից»,- նկատեց Շարմազանովը: Նիկոլ Փաշինյանը հարցրեց՝ արդյոք փոփոխությունները պայմանավորված են ԱԱԾ-ից կադրային արտահոսքով. «ԱԱԾ-ում արտահոսք չկա, ես չէի օգտագործի այդ բառը, քանի որ արտահոսք չկա: Երիտասարդ կադրերի առաջընթացին մենք խոչընդոտ չենք հադիսանում»: Փաշինյանը հետաքրքրվեց նաև 2012 թվականին Ազգային անվտանգության խորհրդի նիստերից մեկի ժամանակ Սերժ Սարգսյանի հանձնարարականից. «Ազգային անվտանգության խորհրդի նիստի ավարտին Սերժ Սարգսյանը Գորիկ Հակոբյանին ասաց, որ պարոն Հակոբյան, կգաք ինձ մոտ, հատուկ հանձնարարություն ունեմ Ձեզ տալու: ԱԱԾ-ն այդ հատուկ հանձնարարությունն ի վիճակի եղե՞լ է կատարել, թե՝ ոչ»: Նա նաև հետաքրքրվեց, թե ԱԱԾ պատերը շարունակո՞ւմ են զարդարել Ֆելիքս Դերժինսկու նկարները: «Թույլ տվեք չպատասխանել հանձնարարականի վերաբերյալ հարցին, դա քննարկվող հարցին չի վերաբերվում»,- ասաց Հարությունյանը: Ինչ վերաբերվում է Դերժինսկու նկարներին, Հարությունյանը կտրականապես հերքեց. «Ո՛չ կիսանդրին, ո՛չ էլ նկարը չկան: Դա միգուցե 88 թվականին էր, հիմա չկա»: ՀԱԿ պատգամավոր Գագիկ Ջհանգիրյանը հարցրեց՝ կա՞ կադրային խնդիր համակարգում, ի պատասխան պարզվեց՝ կա, համակարգը լուրջ խնդիրներ ունի կիբեռանվտանգության ոլորտում և կարիք ունի գիտակ կադրերով համալրվելու: «Մենք ոչ թե փոխարինող չունենք, այլ ուզում ենք ավելի արդյունավետ օգտագործենք փորձառու կադրերի փորձը»: «Եզակի մարդկանց մասին է խոսքը, անգամ ոչ թե իրենք են ուզում, այլ մենք ենք խնդրում, որ մնան ծառայության»,- հավելեց ԱԱԾ պետի տեղակալը: Մինչդեռ ակնհայտ է, որ այստեղ կադրային «սով» կա, քանի որ ոչ բոլորին է հաջողվում աշխատել այդ փակ համակարգում։ Անի Սահակյան