Ինչն է զսպել Մանվել Գրիգորյանին

Ազգային ժողովի հերթական քառօրյայի մեկնարկը բուռն դարձրեց նախկին ԲՀԿ-ական պատգամավոր Տիգրան Ուրիխանյանը,։ Նիստը սկսելուն պես նա ԱԺ նախագահությանը հարց ուղղեց՝ինչո՞ւ է հայ-ռուսական միջխորհրդարանական կոմիտեի նիստին մասնակցողների ցանկից ինքը դուրս մնացել: «Մեկը ես պլանավորել էի երկրիս շահը հնարավորինս ներկայացնել»,- ասաց Ուրիխանյանը: Գալուստ Սահակյանն էլ պատասխանեց, որ հրավիրվել է 13 հոգի, բայց խումբը 27 հոգի է: «Նույն պատճառով, ինչ մնացած 14 հոգին, այնպես էլ՝ դուք: Գնացել են այն մարդիկ, ովքեր նախապատրաստվել են, շատ լավ հայտարարություններ են այնտեղ արել: Երբ գիտեք, որ խմբերը գնում են, դուք անձամբ դիմեք, որ ուզում եք գնաք: Ովքեր դիմել են, նրանք էլ գնացել են: Այս անգամ որևէ մեկը չի դիմել»,- ասաց Գալուստ Սահակյանը:Տիգրան Ուրիխանյանը հայտարարեց, որ օգտվելով առիթից՝ պաշտոնապես հայտարարում է՝ բոլոր ձևաչափերի պատվիրակություններից դուրս է գալիս, քանի որ կիրառվում է հստակ խտրականություն:ԱԺ նախագահն ասաց, որ իրենց բյուջեն այնքան մեծ չէ, որ բոլորին կարողանան ուղարկել գործուղման: «Խորհուրդ չեմ տա հրաժարվեք պատվիրակություններից, կարծում եմ՝ մի քիչ պետք է սփոփիչ նայեք իրավիճակին: Առաջիկայում, եթե որևէ բան լինի, կանխավ դիմեք, ես կարծում եմ, որ կգնաք»,- ասաց ԱԺ նախագահը: Մինչ Ուրիխանյանը փորձում էր իր իրավունքները պաշտպանել՝ ակնարկելով, որ գործուղումներից դուրս է մնում, քանի որ ԲՀԿ-ում են նման որոշում կայացրել, միջանցքում նորաթուխ դեսպան Մանվել Բադեյանն էլ պաշտպանում էր Հայաստանի թիվ մեկ մոնոպոլիստին՝ Սամվել Ալեքսանյանին։ Քուվեյթում Հայաստանի դեսպան նշանակված Մանվել Բադեյանը Ազգային ժողովում վստահեցրեց, որ շաքարավազի ներկրումը պետք է լինի հենց մենաշնորհ. «Որովհետեւ Ալեքսանյանը նավերով է բերում շաքարավազը, մյուսները չեն կարող պարկերով բերել»: Ըստ Մանվել Բադեյանի՝ այլ հարց է, որ պետությունը պետք է այնպես անի, որպեսզի այդ բիզնեսը ավելի շահութաբեր չլինի, ինքը պետք է սահմանափակում ներդնի՝ ինչպես դա առաջարկում է Արծվիկ Մինասյանը:Իսկ Արծվիկ Մինասյանն առաջարկում էր դիտարկել մենաշնորհներն օրենքով սահմանելու հարցը։ Ինքը՝ Սամվել Ալեքսանյանը (Լֆիկ) այսօր խորհրդարանում լրագրողների հարցերին պատասխանելու համար դարձյալ 500 եվրո պահանջեց, նա գրեթե վազում էր միջանցով, որպեսզի իրեն րոպե առաջ շուտ գցի ՀՀԿ խմբակցություն՝ պրծնելով լրագրողների ճիրաններից։ Հարցերին, թե արդյոք շաքարավազի ոլորտի մենաշնորհն օրենքո՞վ է տրվելու իրեն, դա ինչի՞ կհանգեցնի, նա խուսափեց պատասխանել: «500 եվրո տվեք, բոլորիդ հարցերին կպատասխանեմ, 500 եվրո»,- ԱԺ միջանցքներում կրկնում էր Ալեքսանյանը: Պասիվ էին նաեւ գեներալիտետը, Շմայսը լռության ուխտ էր արել ու ոչ մի կերպ չպատասխանեց Սամվել Բաբայանի եւ իր հարաբերությունների մասին հարցերին։ Իսկ գեներալ պատգամավոր Մանվել Գրիգորյանն աննախադեպ զուսպ էր։ Լրագրողների հետ զրույցում անդրադարձավ Սամվել Բաբայանի՝ ԼՂՀ պաշտպանության նախարար նշանակվելու մասին հայտարարություններին: “Իրա ուզելով չի, էտի նշանակովի պաշտոն ա, պտի նշանակող ըլնի, որ ինքն էլ ուզենա: Ընչի, պաշտոններն ուզելով ու հավաքներով են նշանակո՞ւմ”,- ասաց Մանվել Գրիգորյանը, մինչդեռ անցած շաբաթ նա Սամվել Բաբայանի մասին նետում էր, թե չի ճանաչում նման մարդու։ Գրիգորյանն ասաց նաեւ, ԼՂՀ ներկայիս պաշտպանության նախարարը լավ է աշխատում: Անի Սահակյան