Ինչո՞ւ. Արտավազդ Բայաթյանը ցավում է

11:05 - 19/հունվարի/2016

«Ես շատ եմ ափսոսում ու շատ եմ ցավում, որ քանդում են մեր մշակութային արժեքները: Երիտասարդական պալատի քանդումը եղավ ու այդ պատմությունը դեռ չենք մարսել: Սա մեր քաղաքի պատմությունն է»,-Հայելի.am-ի թղթակցի հետ զրույցում, անդրադառնալով Զվարթնոց օդանավակայանի հին ուղևորային համալիրի էստակադան քանդելու վերաբերյալ որոշմանը, ասաց երգիչ, երգահան Արտավազդ Բայաթյանը: Բայաթյանը նշեց, որ այս իրողությունը մեկ նախադասությամբ` պատմություն ջնջել է: Երաժիշտը փաստեց, որ քաղաքը իր պատմությունը ունի և ճարտարապետական ինքնատիպ կառույցները այդ պատմության մասնիկն են: «Կարծում եմ, որ այդ կառույցը կարելի էր պահպանել: Պարտադիր չէր օգտագործել իր նպատակով: Այս կառույցը շատ հետաքրքիր լուծում ունի և եզակի է և չեմ կարծում, որ այդպիսի կառույցները այնքան շատ են աշխարհի երեսին, որ քանդվեն: Մի խոսքով ցավ եմ զգում»,-ընդգծեց Արտավազդ Բայաթյանը: Բայաթյանը ուղղորդում է երևույթներին նայել նաև հոգու և հիշողության աչքերով, քանի որ քաղաքի մասին երգ գրելիս երգահանները նաև որոշ կառույցների «այլ» աչքերով են նայում: «Առհասարակ, շատ բան է քանդվել: Օրինակ` Աբովյան փողոցը իր տեսքից ընկավ ու լրիվ ուրիշ բան է դարձել: Ո՞ւմ են պետք այդ բարձրահարկ շենքերը: Ես չեմ հասկանում: Ամեն մեկը մի քառակուսի առնում է և ուզում է շատ բան կառուցի: Ուզում են մի փոքր հատվածից շատ փող առնեն, բայց ամեն ինչը` չպետք է շահով հաշվել: Քաղաքում վայրեր են եղել, ուր արվեստագետները իրենց անկյունն են գտել: Հիմա այդպես չէ….»: Լուսինե Ղազարյան