Ինչու է Բաքուն «անհամբեր» դարձել
Հայաստանի արտգործնախարար Էդվարդ Նալբանդյանը հունիսի 2-ին Փարիզում կհանդիպի ԵԱՀԿ Մինսկի խմբի համանախագահների հետ: Ադրբեջանի արտգործնախարար Էլմար Մամեդյարովն երեկ ավելի վաղ ելույթ էր ունեցել Հյուսիսատլյանտյան խորհրդում՝ Ադրբեջան-ՆԱՏՕ նիստի շրջանակներում, և հայտարարել, որ հունիսին ակնկալում են հերթական հանդիպում՝ «որի նպատակը ստատուս-քվոյի փոփոխության հարցում նշանակալի առաջընթացի հասնելն է»: Մամեդյարովի այս հայտարարության առնչությամբ ԱԳ մամուլի խոսնակը նշեց, որ ինչպես ավելի վաղ Ազգային ժողովում հայտարարել է արտգործնախարար Էդվարդ Նալբանդյանը՝ ընդամենը տեղի են ունենալու Հայաստանի և Ադրբեջանի արտգործնախարարների առանձին հանդիպումներ ԵԱՀԿ Մինսկի խմբի համանախագահների հետ: Արտգործնախարարը Ազգային ժողովում նաև հայտարարել էր, որ այդ հանդիպումների ժամանակ քննարկվելու են ղարաբաղյան բանակցությունները վերսկսելու հետ կապված հարցեր: Ընդ որում, Նալբանդյանը նշել էր, որ բանակցությունները վերսկսելու համար պետք է լիովին կատարվեն այն պայմանավորվածությունները, որոնք ձեռք են բերվել Վիեննայի գագաթնաժողովի ժամանակ՝ ստեղծվի հրադադարի խախտումների մշտադիտարկման հնարավորություն, ընդլայնվեն ԵԱՀԿ նախագահողի անձնական ներկայացուցչի գրասենյակի և թիմի կարողությունները, և բացառվեն այնպիսի զարգացումները, ինչպիսիք եղան ապրիլի սկզբին: Ակնհայտորեն, Ադրբեջանի իշխանությունները սկսել են շտապել... Բաքուն, կարծես, ապրիլյան պատերազմից հետո որոշել է տպավորություն ստեղծել, թե ամենևին էլ ինքը չի ագրեսիա սանձազերծել Արցախի ուղղությամբ ու հիմա էլ սրտատրոփ սպասում է բանակցությունների, սա այն դեպքում, երբ հատկապես վերջին տարիներին Բաքուն խուսափել է բանակցություններից, համարել է, որ քսանամյա բանակցությունները որևէ օգուտ չեն տվել և որ ԵԱՀԿ Մինսկի խմբի աշխատանքն անարդյունավետ է: Հիմա պատկերը, փաստորեն, փոխվել է... Ադրբեջանի արտգործնախարար Էլմար Մամեդյարովը երեկ ելույթ է ունեցել Հյուսիսատլյանտյան խորհրդում՝ Ադրբեջան-ՆԱՏՕ նիստի շրջանակներում, որում անդրադարձել է նաև ղարաբաղյան հակամարտության հարցին: «Հակամարտության կարգավորման համար հայկական զորամիավորումները պետք է դուրս գան Ադրբեջանի օկուպացված տարածքներից: Մայիսի 16-ին ԵԱՀԿ Մինսկի խմբի անդամ-երկրների արտգործնախարարների մասնակցությամբ Վիեննայում տեղի ունեցավ Ադրբեջանի և Հայաստանի նախագահների հանդիպումը: Մենք ակնկալում ենք, որ հունիսին տեղի կունենա հերթական հանդիպում, որի նպատակը ստատուս-քվոյի փոփոխության հարցում նշանակալի առաջընթացի հասնելն է», - ասել է նա: Մամեդյարովը իր ելույթում միջազգային հանրությանը կոչ է արել «Հայաստանից պահանջել հարգել իր միջազգային պարտականությունները, այդ թվում նաև Ադրբեջանի տարածքային ամբողջականությունը»: Թե հունիսին ինչ հերթական հանդիպման մասին է խոսում` Մամեդյարովը պարզ չէ: Հայաստանի ԱԳՆ-ից երեկ հայտնեցին, որ Նալբանդյանը հունիսի 2-ին Փարիզում հանդիպելու է ԵԱՀԿ Մինսկի խմբի համանախագահների հետ: Իսկ նախագահների ֆորմատով հանդիպման կազմակերպման մասին, առայժմ, ոչինչ հայտնի է: Հետևաբար, Բաքվի հայտարարությունները, թե հունիսի հանդիպման նպատակը` «ստատուս քվոյի փոփոխման հարցում զգալի առաջընթացի հասնելն է», պարզապես խոսքեր են «օդի մեջ», որոնց նպատակը միջազգային հանրությանը ցույց տալն է, որ Ադրբեջանը պատրաստ է կառուցողական բանակցությունների: Թամար Բագրատունի
Հետևեք մեզ Viber-ում
