Կռճոնների կռիվը սկսված է

Քաղաքացիական պայմանագիր կուսակցության անդամ, ԱԺ պատգամավոր Նիկոլ Փաշինյանի հայտարարությունն իրարանցում է առաջացրել ԲՀԿ-ում։ Կիրակի օրը Ռ-Էվոլյուցիա հեղինակային հաղորդման ժամանակ Փաշինյանը քննադատեց ընդդիմությանը, հերթական անգամ կարեւորեց Հայաստանում մեկ ընդդիմության ամրագրման փաստը, իսկ այս համատեքստում դիտարկմանը, որ նորից կսկսեն իրեն մեղադրել իշխանության պրոյեկտ լինելու մեջ, Փաշինյանն ափերից դուրս եկավ ու առանց անուն տալու հիշեց ԲՀԿ-ին։ Ավելի կոնկրետ՝ խոսեց շաբաթներ առաջ ԱԺ նիստերից մեկի ժամանակ իր եւ ԲՀԿ խմբակցության ղեկավար Նաիրա Զոհրաբյանի հեռահար բանավեճի եւ դրան հաջորդած իրադարձությունների մասին. « Այդ «քննադատողներից» մեկն էլ ԱԺ ամբիոնից ասում էր, թե մենք գիտենք ձեր չափը, պայմանավորվածությունները, ձեզ կբամփեն, ձեզ սենց կանեն, նենց կանեն։ Նույն անձը երկու ժամ հետո զանգում է լրատվամիջոցների ղեկավարներին ձեռքերը դողալով ու խնդրում է չտարածել ելույթը, որովհետեւ կառավարությունը, կառավարության ղեկավարը, որի անձնական օգտագործման կուսակցության ղեկավարն է ինքը, զանգել է ու ոչ թե հրահանգել, այլեւ ամենավերջին հայհոյանքներով ասել ա՝ դու քո գիծը մի քանի կիլոմետր անցել ես։ Է՞դ մարդիկ ինձ պիտի մեղադրեն»,- հարց է հնչեցրել Նիկոլ Փաշինյանը։ Եւ ահա, պատասխան հարվածը ԲՀԿ-ից չուշացրեցին։ Վահե Էնֆիաջյանը լրատվամիջոցներին ի պատասխան Փաշինյանի քննադատությանն ասել է հետեւյալը. «Չերչիլը մի հայտնի խոսք ուներ. Եթե սկսես պատասխանել բոլոր զազրախոսներին և բանսարկուներին աշխատելու ժամանակ չի մնա: Ձեր նշած անձնավորության դեպքում հստակ և դիպուկ ասված խոսք է: Խորհրդարանային ընտրություններին շատ քիչ ժամանակ է մնացել և ընտրության արդյունքները ցույց կտան, թե ո՞վ է ներկայացնում ժողովրդին, իսկ ո՞վ՝ այս իշխանության լեգիտիմիզացիայի համար աշխատող պալատական ընդդիմություն»: Նախեւառաջ շատ հետաքրքիր է, թե այդ ի՞նչ «աշխատանք» է տանում ԲՀԿ-ն, ո՞րն է այդ աշխատանքի ՕԳԳ-ն հանրության, ՀՀ քաղաքացին համար։ Եթե ԲՀԿ-ն աշխատում է հերթական կերպարանափոխության համար, դա բոլորովին այլ հարց է, ճիշտ է անում, որ ժամանակը տնտեսում է, որովհետեւ իշխանությունից ընդդիմություն այս կուսակցությունն այնքան է կերպարանափոխվել, որ այլեւս նոր կերպար չի մնացել, որով կարելի կլինի հանրությանն ինչ-որ բան հավատացնել։ Հետեւաբար ԲՀԿ-ին տքնաջան աշխատանքներ են սպասվում։ Ոչ վաղ անցյալում թունդ ընդդիմադիրի կերպարի մեջ մտած, սահմանադրական բարեփոխումներն ու օրվա իշխանություններին քննադատող ԲՀԿ-ում հիմա կողմ են այդ գործընթացին, անկաշկանդ ելումուտ ունեն Սերժ Սարգսյանի նստավայր, երկու ձեռքով կողմ են քվեարկում իշխանությունների բյուջեին, Ընտրական օրենսգրքին, ժամանակին անխնա քննադատության թիրախ դարձրած կառավարության կաբինետի նկատմամբ էլ քար լռություն են պահպանում։ Թե այսքանից հետո ինչ աշխատանք է հնարավոր անել, կամ հանուն ինչի, միայն ԲՀԿ-ում կիմանան, բայց նեղանալ գործընկերներից իրենց քննադատելու համար մի տեսակ ազնիվ չէ։ Մյուս կողմից սիրուն չէ նաեւ Նիկոլ Փաշինյանի որդեգրած մարտավարությունը, հատկապես այն դեպքում, երբ ոչ միայն ԲՀԿ-ում, այլեւ այլ շրջանակներում նույնպես շոշափվում են Փաշինյանի ու նրա կուսակցության մասին «օդում կախված» լուրեր՝ սկսած կուսակցության ֆինանսավորման հարցից, վերջացրած քննադատությունների թիրախների ընտրությունից։ Եթե ինստիտուտցիոնալ ընդդիմություն կերտելու կես ճանապարհին ձախողված Փաշինյանը կայացման այլ ճանապարհ չի տեսնում, քան գործընկերներին քննադատելը, մանավանդ իր բնորոշմամբ «էդ» կարգի մարդկանց, գործիչներին քննադատելը, այլ հարց է։ Բայց հիմա հանրությունը նրանից այլ բան է պահանջում, բացատրություն, թե որն է ինստիտուտցիոնալ ընդդիմության առավելությունը, երբ Հրազդանում էլ հաղթանակը գրանցվեց իշխանության օգտին ու չիրականացավ Փաշինյանի կողմից այդքան թմբկահարվող վստահված անձանց ինստիտուտի գաղափարը։ Մի բան պարզ է, որ ընդդիմության դաշտում այս գզվռտոցը ձեռնտու է բացառապես իշխանություններին, որոնք այդ ամենի արդյունքում էլ ավելի բզկտված կտեսնեն դաշտը։ Իսկ մյուսների կռիվը բացառապես «կռճոնների» համար է, հաջորդ խորհրդարանում մի քանի տեղ ունենալու։ Անի Սահակյան