ԻԼԻՊ-ը արհեստականորեն ստեղծված կառույց է. նրա դեմ պայքարը խաղ է

Ռուսական «Свободная Пресса» պարբերականը գրում է, որ Թուրքիայի ղեկավար Ռեջեփ Թաիփ Էրդողանը հայտարարել է, թե շատերը ցանկանում են վրեժ լուծել թուրքերից 1453թ-ին Բյուզանդական կայսրության մայրաքաղաք Կոստանդնուպոլիսը գրավելու համար: «Այդուհանդերձ, ոչ մեկ ի զորու չի քանդել մեր երկիրը: Ստամբուլի գրավումից հետո թուրքերը հաստատվել են Անատոլիայում և Թրակիայում ու չեն պատրաստվում հեռանալ այդ հողերից»,-հայտարարել է Էրդողանը Կոստանդնուպոլիսի գրավման 563-րդ տարելիցի առթիվ կազմակերպված տոնական միջոցառումների ժամանակ, հայտնում է panorama.am-ը: Միաժամանակ Թուրքիայի նախագահը տրամաբանական զուգահեռներ է անցկացրել վաղուց կատարված իրադարձությունների և ոչ վաղ անցյալում տեղի ունեցած իրադարձությունների միջև: «Ի՞նչ գործ ունեն Իրանն ու Ռուսաստանը Սիրիայում: Ի՞նչ է նրանց պետք այնտեղ: Ի՞նչ գործ ունեն ամերիկացի զինվորականները Սիրիայում՝ ահաբեկիչների տարբերանշանները կրող համազգեստներով: «ԻԼԻՊ»՝ սա արհեստականորեն ստեղծված կառույց է, և նրա դեմ պայքարելու պատճառաբանությամբ ձևավորվում են  որոշակի խաղեր, որոնց նպատակը չափազանց ակնհայտ է, այն է՝կտրել Թուրքիայի պատմական կապը Մերձավոր Արևելքից ու Հյուսիսային Աֆրիկայից»,-հայտարարել է Էրդողանը: Այսպիսով Թուրքիայի նախագահը քննադատել է և՛ Իրանին, և՛ Ռուսաստանին, և՛ Արևմուտքին: