Վերջ տվեք այդ քանդելուն.Դավիթ Գասպարյան

«Վերջ  տվեք  այդ քանդելուն, բավական  է  քանդել, ավերել: Քանդեցիք Երիտասարդական  պալատը, ի՞նչ  դրեցիք  դրա  փոխարեն:Արդեն  տարիներ  շարունակ  ինչ -որ  նախագծեր  են քննարկում,  որոնք  չկան»,-Հայելի  ակումբում  լրագրողների  հետ  հանդիպման ժամանակ  իր մտահոգությունը  հայտնեց  գրականագետ  Դավիթ  Գասպարյանը: Գրականագետը  դեմ  է  «Զվարթնոց» օդանավակայանի  կլոր  մասնաշենքի  ապամոնտաժմանը և  առաջարկում է միասին  պայքարել  մշակութային  կառույցների  քանդման  դեմ: «Եթե  մի  բան  չի գործարկվելու  քանդելուց  հետո, ուրեմն  հինը  պետք  չէ  քանդել:Արդեն  30 տարի  է`  ինչ  քանդեցիք  «Սևան»  հյուրանոցը, ի՞նչ  կառուցեցիք՝ ոչինչ: Քանդեցիք  Հանրապետության  հրապարակի  աննման  հուշարձանը, վրայի  ուղևորը  պարզ  է, որ  պետք է  գնար, բայց  այդ  պատվանդանը  ի՞նչի  քանդեցիք»,-ցավով  հարցադրում արեց  Դավիթ  Գասպարյանը: «Բավական  է, ինչ -որ  մի  ձեռք  մեր  երկիրը  անընդհատ  քանդում  է, կարծես  դարձել  ենք  փորձատեղի: Մենք  պետք  է  թույլ  չտանք  այդ  ավերումները»,-հայտնեց  գրականագետը` նշելով, որ հիմա  հարկավոր է  ոչ  թե  հինը  քանդել, այլ հնի  կողքին  կառուցել  նաև  նորը: «Կա  քանդելու  ժամանակ, կա  կառուցելու  ժամանակ: Հիմա  կառուցելու  ժամանակն  է: Այսօր  մենք  մետրոպոլիտենի  32  կայարան  պետք  է  ունենայինք: Մենք  ճահճի  մեջ  ենք, որից  չենք  կարողանում  դուրս  գալ»,- ընդգծեց  գրականագետը, և խոսքը եզրափակելով, ասաց. «Մի  օր  էլ  մեկը  Հայաստանը  կգնի  և  իր  ուզած  ձևով կքանդի, ասելով, որ  ես  չեմ  ուզում դու  այստեղ  ապրես: Շատ  ծանր  վիճակ  է, և  պետք  է  ամուր  լինենք»:   Լուսինե  Միքաելյան