Խփել են որովայնին ու դեմքին. ազատամարտիկի տղային ծեծել են ընդդիմադիր լինելու համար

«Հովհաննեսը մասնակցել է իրազեկող երթերի ու դա չի հերքել: Նա 9-րդ դասարանի աշակերտ է:  Հարվածներ են հասցրել դեմքին ու որովայնին…»,-Հայելի.am-ի թղթակցի հետ զրույցում ասաց  Հիմնադիր խորհրդարանի մամլո պատասխանատու Վարուժան Ավետիսյանը: Նշենք, որ  «Նոր Հայաստան»-ի անչափահաս համակիր Հովհաննես Հարությունյանին հրավիրվել են Ոստիկանության բաժին: Ավետիսյանը նշեց, որ ինքը որպես փաստաբան է ուղեկցել Հովհաննես Հարությունյանին:Վերջինս համապատասխանաբար հաղորդում է ներկայացրել հանցագործության մասին, ապա նրան տրամադրվել է դատաբժշկական փորձաքննություն անցնելու ուղեգիր: Պատանին արդեն գնացել է դատաբժշկական փորձաքննության: «Սպասում ենք արդյունքներին»,-ընդգծեց Վարուժան Ավետիսյանը: Վարուժան Ավետիսյանն ասաց, որ դեպքի առնչությամբ այլ մանրամասներ դեռ չկան: Հիշեցնենք, որ այսօր «Նոր Հայաստան» հանրային փրկության ճակատի «Ընդդիմության միասնական շտաբ»-ը հաղորդագրություն էր տարածել` հայտնելով, որ 2016 թ. հունվարի 12-ի ուշ երեկոյան երկու տղամարդ Երևանի Քանաքեռ թաղամասում գտնվող ոստիկանության բաժանմունքի մոտակայքում դարանակալել և ծեծել են «Նոր Հայաստան» հանրային փրկության ճակատի համակիր, 16-ամյա Հովհաննես Հարությունյանին՝ նրան պատճառելով մարմնական վնասվածքներ: Նկատենք, որ Հովհաննես Հարությունյանը ծանր պայմաններում ապրող ազատամարտիկի բազմազավակ ընտանիքի զավակ է: Նա  կյանքի դժվարությունների բերմամբ ժամանակից շուտ է հասունացել և ինքնուրույն մոտեցումներ ձևավորել հասարակական հարաբերությունների, իրավունքի ու արդարության վերաբերյալ: Աստղիկ Ավագյան