Արժե՞ հավատալ Ալիևի «արցունքներին»

ԱՄՆ փոխնախագահ Ջոզեֆ Բայդենը հեռախոսազրույց է ունեցել Ադրբեջանի նախագահ Իլհամ Ալիևի հետ։ Հեռախոսազրույցի ժամանակ կողմերը քննարկել են երկու երկրների հարաբերությունների զարգացման հարցը, զարգացման հեռանկարները։ Ալիևը հիշեցրել է այս տարվա մարտի վերջին Վաշինգտոնում Բայդենի հետ հանդիպման մասին։ Նրանք ընդգծել են այդ հանդիպման ժամանակ արդյունավետ քննարկումներ անցկացնելը։ Միաժամանակ ընդգծվել է Վիեննայում ԱՄՆ նախաձեռնությամբ Հայաստանի ու Ադրբեջանի նախագահների հանդիպման կարևորությունը։ Ալիևն ընդգծել է Ղարաբաղյան հակամարտության շուտափույթ կարգավորման կարևորությունը՝ միջազգային իրավունքի նորմերին ու սկզբունքներին համապատասխան։ Իսկ Ադրբեջանի փոխարտգործնախարար Խալաֆ Խալաֆովը հանդիպել է Եվրոպական խորհրդարանի՝ անվտանգության ու պաշտպանության ենթակոմիտեի նախագահ, Լեհաստանի նախկին արտգործնախարար Աննա Ֆոտիգայի հետ։ Հանդիպմանը կողմերը քննարկել են Ադրբեջանի ու Եվրոպական խորհրդարանի, ինչպես նաև Եվրոպայի մյուս ինստիտուտների միջև համագործակցության ներկայիս իրավիճակը, Ղարաբաղյան հակամարտության կարգավորման հարցը։ Խալաֆովն անընդունելի է որակել առկա ստատուս քվոն և կարևորել է Ղարաբաղյան հակամարտությունը խաղաղ ճանապարհով կարգավորելը։ Խալաֆովը Եվրոպական կառույցներին կոչ է արել մեծացնել Ղարաբաղյան հակամարտության կարգավորմանն ուղղված ջանքերը։ Ապրիլյան քառօրյա պատերազմից հետո Ալիևն ու նրա վարչակազմը սկսել են խոսել ղարաբաղյան խաղաղ կարգավորումից: Նրանք փորձում են մնալ` ԵԱՀԿ Մինսկի խմբի գծած սահմաններում, արևմտյան գործիչների հետ հանդիպումներում կարևորում են ԼՂ խնդիրը խաղաղ ճանապարհով լուծելը: Բայց արժե՞ հավատալ Ալիևի «արցունքներին»... Երեկ Իլհամ Ալիևն ու նրա կին Մեհրիբան Ալիևան աշխատանքային այցով ժամանել են Թուրքիա: Ալիևը Ստամբուլում մասնակցելու է Համաշխարհային հումանիտար գագաթնաժողովին, որին մասնակցելու են բազում երկրների ղեկավարներ: Դեռ հարց է, թե ինչ քննարկումներ են ծավալվելու նրա ու Էրդողանի միջև, ինչ «մութ» պայմանավորվածությունների են նրանք գալու ԼՂ հարցով` միջազգային կառույցներին ճնշելու, ադրբեջանանպաստ որոշումներ պահանջելու հարցում ու կեղծիքներ տարածելու հարցում: Հայաստանի արտաքին քաղաքական գերատեսչությունը և առհասարակ, Հայաստանն ու Արցախը երբեք չպետք է հանգիստ շունչ քաշեն, համարելով, թե Ալիևը հետ է կանգնել ընդդեմ Արցախի ագրեսիա իրականացնելու մտքից` միջազգային ճնշման ներքո: Ալիևը շարունակելու է ժամանակ առ ժամանակ դիմել դիվերսիոն գործողությունների, ագրեսիայի, միայն այդպես է նա ի վիճակի ԼՂ խնդիրը «տաք» պահել` միջազգային հանրության աչքում: Թամար Բագրատունի