Էրդողանի նոր Թուրքիան ու Դավութօղլուի կնոջ` օդում մնացած ձեռքը
Դավութօղլուն հրաժարական ներկայացրեց, եկավ Բինալի Յըլդըրըմը Երեկ Անկարայում տեղի է ունեցել իշխող «Արդարություն և զարգացում» կուսակցության (ԱԶԿ) երկրորդ արտահերթ համագումարը, որի արդյունքներով կուսակցության երրորդ նախագահ է ընտրվել Իզմիրից ընտրված պատգամավոր, տրանսպորտի, նավագնացության ու հաղորդակցությունների նախարար Բինալի Յըլդըրըմը: Քվեարկությանը մասնակցել է 1470 պատվիրակներից 1411-ը, որոնցից 1405-ն իրենց քվեն տվել են Բինալի Յըլդըրըմի օգտին: Բինալի Յըլդըրըմը ԱԶԿ նախագահի պաշտոնում փոխարինում է Ահմեթ Դավութօղլուին: Իսկ Թուրքիայի նախագահ Ռեջեփ Էրդողանն Անկարայում գտնվող նախագահական նստավայրում ընդունել է վարչապետ Ահմեթ Դավութօղլուին: Հանդիպումը տևել է կես ժամ: Հանդիպումից հետո Թուրքիայի նախագահական ապարատը հայտարարություն է տարածել, որում նշել է, որ Դավութօղլուն հրաժարական է ներկայացրել, որն ընդունվել է Էրդողանի կողմից: Էրդողանը ցանկություն է հայտնել, որ Դավութօղլուն շարունակի պաշտոնավարել վարչապետի պաշտոնում, մինչև որ երկրում կձևավորվի նոր կառավարություն: Էրդողանը շնորհավորական հեռագիր է ուղարկել Բինալի Յըլդըրըմին, որը իշխող «Արդարություն և զարգացում» կուսակցության (ԱԶԿ) երկրորդ արտահերթ համագումարի արդյունքներով ընտրվել է ԱԶԿ երրորդ նախագահ: Էրդողանը Բինալի Յըլդըրըմին հանձնարարել է ձևավորել Թուրքիայի 65-րդ կառավարությունը: ԱԶԿ-ն Թայիփի կուսակցությունն է Թուրքիայի արդարադատության նախարար Բեքիր Բոզդաղը երեկ Անկարայում անցկացված իշխող «Արդարություն և զարգացում» կուսակցության (ԱԶԿ) երկրորդ արտահերթ համագումարի արդյունքներով ընտրվել է կուսակցության Բարձրագույն խորհրդի նախագահ: Իր ելույթում Բոզդաղը հայտարարել է, որ նախագահ Ռեջեփ Թայիփ Էրդողանը կուսակցության միակ առաջնորդն է, և որ կուսակցության ժողովրդական անվանումը «Թայիփի կուսակցություն» է: Բոզդաղն ընդգծել է, որ Էրդողանը բարոյապես իրենց հետ է, թեպետ ֆիզիկապես չի կարող լինել իրենց հետ (Թուրքիայի նախագահը չպետք է լինի կուսակցական): Թուրքիայում իշխող «Արդարություն և զարգացում» կուսակցության (ԱԶԿ) նախագահի և երկրի վարչապետի թեկնածու Բինալի Յըլդըրըմը խոստացել է շարունակել երկրում արգելված «Քրդստանի աշխատավորական» կուսակցության (PKK) դեմ պայքարը: Յըլդըրըմը հայտարարել է. «Մեզ հարցնում են, թե կավարտվի՞ հակաահաբեկչական գործողությունը (հարավ-արևելքում): Դրանք կշարունակվեն այնքան ժամանակ, քանի դեռ PKK-ն կունենա զենք, քանի դեռ ամբողջովին չի ապահովվել այդ շրջաններում բնակվողների անվտանգությունը: Մենք հազար տարի ապրել ենք որպես եղբայրներ և հետագայում նույնպես շարունակելու ենք ապրել այդպես: Մենք ահաբեկչական սպառնալիքը կհանենք Թուրքիայի օրակարգից: Մենք թույլ չենք տա մասնատել Թուրքիան, դա մեր հայրենիքի պահպանման հարցն է»: Ահազանգում է Գյուլը` Թուրքիան չի կարող ժամանակ կորցնել Ռեջեփ Էրդողանի և Բյուլենթ Արընչի հետ միասին 2001-ին ներկայիս իշխող «Արդարություն և զարգացում» կուսակցության երեք հիմնադիրներից Աբդուլլահ Գյուլը, որը նախկինում եղել է Թուրքիայի վարչապետ, արտգործնախարար և նախագահ, ուղերձ է հղել ԱԶԿ երկրորդ արտահերթ համագումարի մասնակիցներին: Իր ուղերձում նա նշել է, որ Թուրքիան անցավ իր պատմական ամենաբարդ ժամանակաշրջաններից մեկը: Գյուլն ընդգծել է, որ քաղաքական, տնտեսական ու սոցիալական խնդիրներ ունեցող Թուրքիան այլևս չի կարող ժամանակ կորցնել ահաբեկչության վրա: Գյուլը վստահություն է հայտնել, որ ԱԶԿ երկրորդ արտահերթ համագումարը ճանապարհ կհարթի առկա խնդիրների լուծման համար: Գյուլի ուղերձն ընթերցել են Էրդողանի ուղերձից հետո: Իսկ Դավութօղլուի կնոջն արդեն չեն ողջունում Թուրքական Cumhuriyet թերթն անդրադարձել է այսօր տեղի ունեցած՝ իշխող «Արդարություն և զարգացում» կուսակցության (ԱԶԿ) երկրորդ արտահերթ համագումարի ժամանակ էներգետիկայի նախարար Բերաթ Ալբայրաքի պահվածքին: Վերջինս օդում է թողել երկրի վարչապետի և ԱԶԿ նախագահի պաշտոններից հեռացող Ահմեթ Դավութօղլուի կնոջ` Սարե Դավութօղլուի ձեռքը, երբ նա հերթով ողջունում էր նախարարներին: Ընդդիմադիր թերթը հիշեցրել է, որ երկրի նախագահ Ռեջեփ Էրդողանի փեսա Բերաթ Ալբայրաքը նման պահվածք չէր դրսևորել 2015 թվականի սեպտեմբերի 12-ին տեղի ունեցած ԱԶԿ նախորդ համագումարի ժամանակ, երբ նա դեռ նախարար չէր: Այն ժամանակ Ալբայրաքը օդում չէր թողել Դավութօղլուի կնոջ ձեռքը: 2015 թվականի նոյեմբերի 1-ին Թուրքիայում անցկացված կրկնական ընտրությունների արդյունքներով ԱԶԿ-ին հաջողվեց ստանալ միակուսակցական կառավարություն ձևավորելու հնարավորություն, և դրանից 20 օր անց ձևավորված Ահմեթ Դավութօղլուի կառավարությունում Ալբայրաքը դարձել էր էներգետիկայի ու բնական պաշարների նախարար: Դավութօղլուն ցանկացել էր այդ պաշտոնին վերադարձնել այն տարիներ շարունակ զբաղեցրած Թաներ Յըլդըզին, սակայն Էրդողանը պնդել էր փեսայի թեկնածությունը: Ընդդիմադիր թերթն այժմ հեգնում է Էրդողանի փեսային` նշելով, թե 8 ամսում որտեղից ուր հասավ: Մետաքսյա Շալունց