ԴԱԻՇ-ը փոքր թշնամի է, գլխավոր թշնամիներն ԱՄՆ-ն ու Իսրայելն են

Իրանական Press TV հեռուստաալիքի փոխանցմամբ` Իրանի ցամաքային զորքերի հրամանատար, բրիգադի գեներալ Ահմեդ Ռեզա Պուրդաստանը մայիսի 22-ին Սպահան նահանգում մեկնարկած «Բեյթ օլ Մողադդաս-28» զորավարժությունների ժամանակ հայտարարել է զինված ուժերն ամրապնդելու անհրաժեշտության մասին: Պուրդաստանը հայտարարել է, որ Իրանը իր գլխավոր թշնամիներ է համարում ԱՄՆ-ին ու Իսրայելին: «Թշնամիները սպառնում են Իսլամական հանրապետության գոյատևմանը: Սակայն մենք երբեք թույլ չենք տա ոչնչացնել երկիրը` շնորհիվ մեր զինված ուժերի ամրապնդման ու մեծ մարտունակության: Իրանի աճող ռազմական պոտենցիալն ԱՄՆ-ին հարկադրեց փոխել Իրանի հանդեպ նպատակներին հասնելու ռազմավարությունը` իսլամական ահաբեկչական խմբավորումներն ամրապնդելու ճանապարհով, որոնց ֆինանսապես աջակցում են նաև Մերձավոր Արևելքի մի շարք այլ երկրներ: ԴԱԻՇ-ն ու իսլամական մյուս խմբավորումները մեր փոքր թշնամիներն են, իսկ ԱՄՆ-ն ու իսրայելական վարչակարգը մեր գլխավոր թշնամիներն են»: