Ղարաբաղի հարցը տանում են ԱՊՀ ու ԵՏՄ, որ ի՞նչ անեն
Ալիևի մտերիմներով «հիվանդությունները բուժելու» կարիք չկա Բելառուսի նախագահ Ալեքսանդր Լուկաշենկոն մայիսի 19-ին ԱՊՀ անդամ երկրների անվտանգության մարմինների և հատուկ ծառայությունների ղեկավարների խորհրդի նիստում՝ պատվիրակությունների ղեկավարների հետ հանդիպմանը, հայտարարել է, որ հարկավոր է ավելի ակտիվորեն զբաղվել Մերձդնեստրի, Լեռնային Ղարաբաղի և համագործակցության համար մյուս արդիական հարցերով: Այս տարի Բելառուսը հյուրընկալում է ԱՊՀ անդամ երկրների անվտանգության մարմինների և հատուկ ծառայությունների ղեկավարների խորհրդի 40-րդ նիստը: Լուկաշենկոյի կարծիքով՝ դա հնարավորություն է տալիս ավելի բաց քննարկել խնդիրները, որոնցով այսօր «հիվանդ է» ԱՊՀ-ն՝ Մերձդնեստրում, Լեռնային Ղարաբաղում, Ուկրաինայում ստեղծված վիճակը: «Եթե մենք չտեսնենք, չբուժենք այդ հիվանդությունները, մենք դրանք ավելի կխորացնենք»,- նախազգուշացրել է Լուկաշենկոն: Նա ընդգծել է, որ ԱՊՀ-ին հարկավոր է ձգտել երկխոսության այդ և այլ սուր հարցերի ուղղությամբ: «Հարկավոր է պայմանավորվել: Մենք ոչ մի տեղ չենք փախչի: Մենք մեկ նավակում ենք, ոչ ոք մեզ այնտեղ՝ այլ ափերում, առանձնապես չի սպասում: Հարկավոր է դասավորել սեփական կյանքը»,- ասել է նա: Բելառուսի նախագահի կարծիքով՝ դրան կօգնի նպաստել այն, որ ԱՊՀ երկրների ժողովուրդների մենթալիտետն իրար նման է: «Մենք ճանաչում ենք միմյանց և գիտենք՝ ինչպես դասավորել այդ կյանքը»,- ասել է նա: Ապրիլյան քառօրյա պատերազմից հետո, իհարկե, միջազգային տարբեր կառույցներ են հանդես եկել` կողմերին հանդարտության կոչեր անելով: Ավելին, ԵԱՀԿ Մինսկի խումբը համանախագահող երկրները ստիպված եղան բավական բարձր մակարդակով կողմերի միջև հանդիպում կազմակերպել: Բայց ի՞նչ կարող է անել Ղարաբաղի խնդրի համար ԱՊՀ-ն կամ ԵՏՄ... Այս կառույցներն առավելապես սպասարկում են Ադրբեջանի շահերը, քան` Հայաստանի: Հիշենք, թե ինչպես էր Նազարբաևը ընթերցում Ալիևի նամակը, կամ` Լուկաշենկոն սատարում Ալիևին: Եվրասիական տնտեսական միության անդամ պետությունների ղեկավարների հերթական հանդիպումը նախատեսված է մայիսի 31-ին, Ղազախստանի մայրաքաղաք Աստանայում: Թե ԱՊՀ-ի, թե ԵՏՄ-ի շրջանակներ` ԼՂ խնդրի տեղափոխումը, թեկուզ` քննարկման տեսքով, բացարձակ անթույլատրելի է: ԱՊՀ-ն ու ԵՏՄ-ն ցույց են տվել, որ Հայաստանի համար ծանր օրերին` ոչինչ չեն տեսնում, ոչինչ չեն լսում, հետևաբար հիմա քառօրյա պատերազմից հետո Ալիևի մտերիմներով «հիվանդությունները բուժելու» կարիք ամենևին էլ չկա: Իսկ գուցե ԱՊՀ-ական, ԵՏՄ-ական գործընկերներն այլ նպատակներ ունե՞ն... Ռոգոզինին կրկին Բաքու էին գործուղել Ադրբեջանի նախագահ Իլհամ Ալիևը երեկ ընդունել է ՌԴ փոխվարչապետ Դմիտրի Ռոգոզինին: Հանդիպմանը կողմերը քննարկել են ապրանքաշրջանառությունը ու երկու երկրների հարաբերությունները: Ըստ Ալիևի մամուլի ծառայության` Ալիևը հայտարարել է, որ երկու երկրների առևտրաշրջանառության ընդլայնման համար առկա է մեծ պոտենցիալ, ինչպես նաև իր գոհունակությունն է հայտնել երկկողմ հարաբերությունների զարգացման առնչությամբ: Ռոգոզինը բարձր է գնահատել ռուս-ադրբեջանական հարաբերությունների զարգացումը ու նշել, որ Մոսկվան մեծ նշանակություն է տալիս Ադրբեջանի հետ հարաբերություններին բոլոր ոլորտներում: ՌԴ փոխվարչապետը հայտնել է, որ Բաքուն ու Մոսկվան բանակցություններ են վարում մեքենաշինության ոլորտում համատեղ նախագիծ սկսելու ուղղությամբ: Նրա խոսքով՝ տվյալ նախագիծը հետաքրքիր է ու հեռանկարային երկու երկրների համար: Այսինքն, Մոսկվան այս օրերին Բաքու է գործուղել ռազմարդյունաբերական համալիրը համակարգող փոխվարչապետ Դմիտրի Ռոգոզինին: Կողմերը, դատելով Ադրբեջանի նախագահի աշխատակազմի տարածած հաղորդագրությունից, հիմնականում անդրադարձել են երկկողմ համագործակցության հետագա խորացմանը: Այս հաղորդագրության մեջ առկա թերևս միակ նորությունը Բաքվի և Մոսկվայի միջև մեքենաշինության ասպարեզում մեկնարկող նոր ծրագրի հիշատակումն է, որի մանրամասները, սակայն, չեն բացահայտվում: Հետաքրքիր է նաև, որ Ռուսաստանի փոխվարչապետը, իր վաղեմի սովորությանը հակառակ, Բաքու կատարած այցի մասին որևէ տեղեկություն չի տարածել Twitter-ի անձնական էջի միջոցով: Սա Ռոգոզինի թվով երրորդ այցն է Ադրբեջան վերջին երեք ամիսների ընթացքում: Մարտի սկզբին Ռոգոզինը Բաքվում քննարկում էր Ադրբեջանին վաճառված ռուսաստանյան զենքի խմբաքանակի դիմաց վճարումների ուշացման հարցը: Ապրիլին արդեն` քառօրյա պատերազմից մի քանի օր անց, Բաքվում Ռոգոզինը հայտարարեց, թե Մոսկվան չի պատրաստվում հրաժարվել Ադրբեջանին սպառազինությունների վաճառքի գաղափարից: «Հայաստանը ՀԱՊԿ-ի անդամ է և մեր դաշնակիցն է, իսկ Ադրբեջանը` վճարունակ գործընկեր», - ապրիլին «Էխո Մոսկվի» ռադիոկայանին տված հարցազրույցում նշում էր Ռոգոզինը: Հայաստանցի մի քանի լրագրողներ այս օրերին ՌԴ մայրաքաղաք Մոսկվայում են գտնվում ԶԼՄ-ների համագործակցության «Նոր հայացք» ծրագրի շրջանակներում: Ըստ Aravot.am-ի` ռուսաստանցի լրագրող, հեռուստատեսային և ռադիո հաղորդավար Վլադիմիր Սոլովյովն անդրադառնալով Ռոգոզինի հայտարարություններին, ասել է, որ դա խորությամբ չմտածված, պահի ազդեցության տակ արված հայտարարություն էր և վստահեցրել է, որ իր այդ հայտարարության համար Ռոգոզինը «ստացել» է: «Ուղղեք փողկապը»,- ըստ Սոլովյովի, Ռոգոզինին ասել է ՌԴ նախագահ Վլադիմիր Պուտինը: Հիշեցնենք, ապրիլյան քառօրյա պատերազմի օրերին, անդրադառնալով Երևանում և Բաքվում առաջացած անհանգստություններին, որ ՌԴ-ն տարիներ շարունակ զենք է վաճառել կողմերին, ՌԴ փոխվարչապետ Դմիտրի Ռոգոզինն ասել էր. «Այնտեղ դեմագոգիա է սկսվել ահավոր: Չեմ ուզում մատնացույց անել, բայց որոշ քաղաքացիներ իրենց լավ չպահեցին: Պատերազմը սառնասրտություն է պահանջում, ոչ թե ինչ-որ լղոզված քարոզչական փսլինքներ»: Թամար Բագրատունի