Հայաստանը փոխո՞ւմ է ուղղությունը, թե «ատամ» է ցույց տալիս
Մայիսի 3-ին Եվրոպական ուսումնասիրությունների կենտրոնի Ռոբերտ Շումանի անվան սրահում տեղի է ունեցել Եվրոպական ակումբի բացումն ու առաջին քննարկումը: Եվրոպական ակումբը ստեղծվել է Երևանի պետական համալսարանի Եվրոպական ուսումնասիրությունների կենտրոնի և Հայաստանում ԵՄ պատվիրակության հետ համատեղ: «Եվրոպական ակումբի նպատակն է համախմբել հայկական և եվրոպական համալսարանների և հետազոտական կենտրոնների գիտնականներին և փորձագետներին՝ մասնավորապես Հայաստանում միջազգային և տարածաշրջանային քաղաքականությունների, ինչպես նաև ԵՄ քաղաքականության վերաբերյալ առողջ քննարկումներն և բանավեճերը խթանելու և անցկացնելու նպատակով: Որպես բանախոսներ՝ քննարկումներին հրավիրվելու են հայտնի փորձագետներ: Քննարկումները տեղի են ունենալու «Չատամ Հաուսի» կանոններով՝ փակ քննարկման ձևաչափով»,- ասվում է ակումբի մասին տարածված հաղորդագրությունում: Հայաստանում ԵՄ պատվիրակության ղեկավար, դեսպան Պյոտր Սվիտալսկին ողջունել է Եվրոպական ակումբի ստեղծումը. «Ես ցանկանում եմ շնորհակալություն հայտնել ու շնորհավորել Եվրոպական ուսումնասիրությունների կենտրոնին այս գաղափարն առաջ տանելու ու ակումբը հիմնելու համար: ԵՄ-ն կաջակցի ձեզ, և մենք լիահույս ենք, որ այս նախաձեռնությունը կտա իր իրական արդյունքները: Դա վերաբերում է ոչ միայն մասնակիցներին, մասնավորապես երիտասարդներին, այլև հայ փորձագետներին ու հասարակությանը: Մենք հույս ունենք, որ սա կդառնա ազատ քննարկումների լավ հարթակ: Այստեղ մենք կխուսափենք էմոցիաներից, պրոպագանդայից և կխոսենք ռեալ և ռացիոնալ փաստարկներով: Ակումբն իր մեկնարկը տվեց ոչ հեշտ թեմայի քննարկմամբ, որը նվիրված է Ռուսաստանին և ԵՄ-ին: Այս հարցը հավելյալ նշանակություն ունի Հայաստանի համար, սակայն, կարծում եմ, որ նման մեկնարկը շատ լավ է»: Ակումբը պլանավորում է այս տարի ունենալ 7 նիստ, ասել է թե՝ ամիսը մեկ անգամ։ Ինչպես տեսնում ենք «Եվրոպական ակումբը» ամբողջությամբ Գրիբոյեդովի ակումբի այլընտրանք է ներկայանում։ «Գրիբոյեդով» ակումբը, որի հիմնադիրը Կրեմլի քաղաքականության քարոզչության թիվ 1 հրապարակային դեմքն է՝ հայտնի հեռուստամեկնաբան Դմիտրի Կիսելյովը, հիշեցնենք, որ Հայաստանում գործում է 2014-ից։ Այս ակումբի հավաքները եւս տեղի են ունենում ամիսը մեկ անգամ, երևանյան տարբեր էլիտար ռեստորաններում, որոնք հավաքների ժամանակ փակվում են։ Այդ հավաքներին մասնակցելու համար ամեն ամիս Հայաստան է ժամանում անձամբ Դմիտրի Կիսելյովը, ով էլ յուրաքանչյուր անգամ մեծ-մեծ հաշիվներ է փակում էլիտար այդ ռեստորաններում ակումբի մասնակիցների ընթրիքից հետո։ Ընթրիքներն ընթանում են հարցուպատասխանի ֆորմատով, տեղացիների հարցերին պատասխանում են ՌԴ-ից հրավիրված հյուրերը, որոնք փոփոխվում են։ Ակումբի նպատակը եվրասիականությամբ քողարկվող պուտինյան իմպերիալիզմի համար Հայաստանում համապատասխան ֆոն ապահովելն էր։ Սակայն վերջին ամիսներին այս ակումբի գործունեության մասին քար լռություն է պահպանվում, նիստերն էլ ամենամսյա հաճախականությամբ չեն անցկացվում։ Քանի որ ռուսական էմիսարների հայնտի պահվածից առաջացած հանրային վրդովմունքն այնքան աճեց, որ այլեւս քարոզելու խնդիր չմնաց։ «Եվրոպական ակումբի» ձեւավորման ժամանակն էլ անչափ ուշագրավ է։ Արդյոք նոր իրավիճակ է՞ ստեղծվել ոչ միայն Ղարաբաղի հարցում։ Մասնավորապես, Վիեննայի հանդիպումը ցույց տվեց, որ ԱՄՆ-ն Ռուսաստանից վերցրել է կարգավորման «մենաշնորհը» եւ կարգավորման դիվանագիտության մեջ կտրուկ աճել է Արեւմուտքի ազդեցությունը, այլեւ առհասարակ Հայաստանի արտաքին քաղաքական վեկտորն է նոր ուղղություն բռնել եւ այդ ուղղությունը դեպի Եվրոպան է, ցույց կտա ժամանակը։ Կամ էլ Հայաստանն էլ ավելի է ամրապնդում եւ-եւ-ի իր քաղաքականությունը՝ ապրիլյան պատերազմից հետո ատամ ցույց տալով ռազմավարական դաշնակից Ռուսաստանին։ Անի Սահակյան