Ալիևի առաջին դրժումը

Ադրբեջանի նախագահի աշխատակազմի ղեկավարի տեղակալ, արտաքին կապերի բաժնի պետ Նովրուզ Մամեդովը մեկնաբանելով Վիեննայում Հայաստանի և Ադրբեջանի նախագահների հանդիպման արդյունքները: «Մենք Վիեննայի հանդիպման ժամանակ համաձայնություն տվեցինք հրադադարի ռեժիմի ամրապնդմանը՝ ապագա բանակցությունները շարունակման համար: Ամենագլխավորն այն է, որ այսուհետ պահպանվի հրադադարի ռեժիմը, և որ մենք հունիսին սկսենք բանակցային գործընթաց»,- ասել է նա: Այնուհետև մեկնաբանելով ԵԱՀԿ գործող նախագահի անձնական ներկայացուցիչ Անջեյ Կասպրշիկի լիազորությունների ընդլայնման մասին համանախագահների հայտարարությունը՝ Մամեդովը հայտարարել է. «Անջեյ Կասպրշիկի լիազորությունների հարցում չեն կարող լինել էական փոփոխություններ: Այնտեղ նշվածը Մինսկի խմբի դիրքորոշումն է, մենք այդ կապակցությամբ պարտավորություններ չենք ստանձնել»: Սա, ըստ էության, Վիեննայի հանդիպումից հետո պաշտոնական Բաքվի առաջին դրժումն է` ձեռք բերված պայմանավորվածություններից հետո: Մինչդեռ պաշտոնական Երևանը երկու օր էր, ինչ հույս էր հայտնում, թե պաշտոնական Բաքուն այս անգամ չի խորտակի: Ալիևի պահվածքը բոլորովին էլ զարմանալի չէ: Ի՞նչ սպասես մի երկրի առաջնորդից, որը գերտերությունների պաշտոնյաների աչքերին նայում է ու ասում, որ Հայաստանն է սկսել ապրիլյան պատերազմը... Ալիևի առաջին դրժման պատճառներն էլ հասկանալի են. նա վարժվել է կեղծիքին, ռազմատենչ հայտարարություններով աշխարհին իր մասին հիշեցնելու քաղաքականությանը, քաղական շանտաժին: Ավելին` Ալիևի քաղաքականությունը համարժեք արձագանքի ու քննադատության չի արժանացել միջազգային հանրության կողմից: Իսկ այսօր, ունենք այն, ինչ ունենք: Մի օր Ալիևը նայում է ԵԱՀԿ Մինսկի խմբի համանախագահող երկրների ղեկավարների աչքերի մեջ ու ստում, որովհետև որևէ մեկը նրան չի սաստել ու չի արգելել կեղծել: Հետևաբար, ի՞նչն է նրան խանգարում Վիեննայից Բաքու վերադառնալուց մի քանի ժամ հետո հետ կանգնել ձեռքբերված պայմանավորվածություններից: Նա գիտի, որ հասցեական քննադատություն չի հնչելու նույնիսկ հիմա, երբ նա հրաժարվում է Վիեննայում ձեռքբերված համաձայնություններից: Ծանր դեպք է: Բայց այլ ելք պետք է փնտրել: Այսպես հնարավոր չէ երկար հանդուրժել: Թամար Բագրատունի