Սամվել Ալեքսանյանից «վերցնո՞ւմ են» շաքարավազի մենաշնորհը

Իշխանության եւ ի մասնավորի Գործադիրի՝ կոռուպցիայի դեմ հայտարարած անողոք պայքարի շրջանակներում Կառավարության ղեկավար Հովիկ Աբրահամյանը խիզախ հայտարարություններ արեց ԱԺ ամբիոնից՝ կառավարություն-ԱԺ հարցուպատասխանի ժամանակ։ ՀՀ վարչապետը հայտարարեց, որ յուրաքանչյուր գործարար, ով ցանկություն ունի զբաղվել շաքարավազի բիզնեսով, կարող է զբաղվել և որևէ մեկի նկատմամբ չեն լինելու ինչ-որ առանձնակի մոտեցումներ: Վարչապետն ընդգծեց. «Այդ հարցը Հանրապետության Նախագահի հետ քննարկել եմ երեկ և այսօր էլ իրականացրել ենք խորհրդակցություն և հետևողական ենք լինելու և, այո՛, ամեն ինչ անելու ենք, որ այդ շուկայում գների նվազման երևույթ սկսի»,- նշեց վարչապետը: Ինչպես հայտնի է, արդեն տարիներ շարունակ շաքարավազի մենաշնորհը Սամվել Ալեքսանյանինն է։Նա է շուկայի 90 տոկոսը զբաղեցնում, նա է գին թելադրում եւ թեպետ Շիրակում շաքարի գործարան հիմնեց, բայց էժան շաքարավազը ներկրում է դրսից։ Հատկանշական է, որ այսօր լրատվամիջոցները լուր էին տարածել, թե Հայաստանում հայտնվել է շաքարավազ, որը կապ չունի Սամվել Ալեքսանյանի՝ Լֆիկի հետ և ներկրվում է այլ գործարարի կողմից։ Այս մասին հայտարարում են խանութպաններն իրենց հաճախորդներին։ Խանութպանների ասելով` այդ շաքարավազը ներկրում է Գագիկ Ծառուկյանը, որի մամուլի խոսնակ Իվետա Տոնոյանն իր հերթին «Հայկական ժամանակ» օրաթերթի հետ զրույցում հերքել է տարածված տեղեկատվության իրականությանը համապատասխան լինելու հանգամանքը: Այս լուրերի տարածքումից հետո առաջին տպավորությունն այն էր, որ նման լուրեր տարածքում է՝ ինքը գործարարը, որպեսզի իրեն փրկի հարազատ իշխանության՝ կոռուպցիայի ու մենաշնորհների դեմ սկսած անողոք «որսից», սակայն վարչապետի հայտարարությունը կարծես փոխում է ամեն բան։ Նա ասում է, որ ցանկացած մեկը կարող է զբաղվել շաքարավազի բիզնեսով, մինչդեռ բոլորին է հայտնի, որ Հայաստանում դա վերջին տարիներին գրեթե անհնար է եղել։ Ալեքսանյանը փակել է բոլորի ճանապարհը։ Բայց սա դեռ ամենը չէ, վարչապետը հայտարարում է, թե այդ հարցով նախագահի հետ քննարկում է իրականացրել։ Մի՞թե սա նշանակում է, որ վարչապետը դրել է Ալեքսանյանից շաքարավազի մոնոպոլիան խլելու հարցը եւ վստահ հայտարարում է, որ առաջիկայում շաքարավազի գները կնվազեն, իսկ դա հնարավոր է միայն մրցակցության դեպքում։ Հարցուպատասխանի ընթացքում Խաչատուր Քոքոբելյանի հարցին էլ, թե ինչու է Վրաստանում բենզինի ու դիզվառելիքի գինը մոտ 40 տոկոսով էժան, քան Հայաստանում, և արդյո՞ք սա հստակ մենաշնորհի հետ է կապված և արդյո՞ք այդ ոլորտի ազատականացման դեպքում գները կկարգավորվեն, Հովիկ Աբրահամյանը պատասխանել է, որ Վրաստանից Հայաստան տեղափոխելը նույն գինն է, ինչ Եվրոպայից Փոթի: ԱԺ «Հայ ազգային կոնգրես» խմբակցության ղեկավար Լևոն Զուրաբյանն էլ բարձրացրեց մենաշնորհների հարցը։ Մասնավորապես, դիզվառելիքի ոլորտից նա օրինակ բերեց մի հրապարակում, ըստ որի՝ «Ռուս-Արմ օյլ» ՍՊԸ-ի մոտ 46 տոննա դիզվառելիքով բեռնված մեքենաներին չեն թողնում Բագրատաշենի անցակետից Հայաստան մուտք գործել: Ըստ նրա՝ ընկերության ներկայացուցչի խոսքով՝ վարորդներին ասել են, թե այս ոլորտում մոնոպոլիա է, ուստի հարցրեց ՝ կառավարությունը հետաքրքրվե՞լ է միջադեպով և պարզվե՞լ է, թե ով և ինչ նպատակով է խոչընդոտել ներկրմանը: Պատգամավորի հարցին պատասխանեց ՀՀ վարչապետ Հովիկ Աբրահամյանը, ով ասաց, որ նամակ է ստացել և տվել է հանձնարարական միջադեպի ուսումնասիրության համար և շուտով իրեն կզեկուցեն: Նա վստահեցրեց , որ ոլորտում մենաշնորհ չկա։ Անի Սահակյան