Կախված է Ալիևի ադեկվատությունից

Վիեննայում մայիսի 16-ին կայացած ղարաբաղյան թեմայով հանդիպումից հետո բոլոր կողմերը այն գնահատելու փուլում են այս օրերին: Ղարաբաղյան գոտում և հայ-ադրբեջանական սահմանին համեմատաբար հանգիստ է եղել այս գիշեր: Որևէ մեկը որևէ երաշխիք չի կարող տալ, թե հարաբերական անդորրը որքան կշարունակվի, ու արդյոք սա հանդարտություն է ավելի մեծ վտանգից առաջ: Բայց, այնուամենայնիվ, փորձ արվեց ղարաբաղյան կարգավորումը բերել բանակցությունների դաշտ, այլ հարց է, թե երբ տեսանելի կլինեն արդյունքները, այն սկզբունքային հարցերը, որոնք տեղ գտան այդ հանդիպման արդյունքում տարածած հայտարարության մեջ: Իսկ այստեղ, պարզ է, որ ամեն ինչ կախված է Բաքվի պահվածքից, թե որքանով Ալիևը ադեկվատ կգտնվի: Իսկ մինչ այդ ղարաբաղյան թեման շարունակում է ուշադրության կենտրոնում մնալ: ՌԴ նախագահի մամլո քարտուղար Դմիտրի Պեսկովը հայտարարել է, որ կան հիմքեր՝ Ղարաբաղյան հակամարտության կարգավորման վերաբերյալ Հայաստանի ու Ադրբեջանի նախագահների հանդիպման արդյունքներով զուսպ լավատեսության համար, որը առավել կայուն փուլի շարունակման հնարավորություն կտա: ԱՄՆ-ի պետդեպարտամենտի պաշտոնական ներկայացուցիչ Ջոն Քիրբին ճեպազրույցում նշել է, որ երկու երկրների նախագահները ցուցաբերել են քաղաքական կամք՝ դուրս գալու ստատուս քվոյի շրջանակից և ընդունելու այն միջոցառումները, որոնք կարող են օգուտ տալ տարածաշրջանում բնակվող բոլոր մարդկանց։ Քիրբին ասել է, Հայաստանի և Ադրբեջանի նախագահները պարտավորվել են հարգել հրադադարը, ջանքեր գործադրել փոխվստահության ամրապնդման համար, ինչպես նաև վերսկսել բանակցությունները հաջորդ ամիս, որոնք կարող են տանել հակամարտության համապարփակ կարգավորման. «Այժմ յուրաքանչյուր ոք պետք է ծանր աշխատանք կատարի՝ իրենց ստանձնած պարտավորությունների իրագործման ուղղությամբ»: ԵԱՀԿ գործող նախագահ և Գերմանիայի ԱԳ նախարար Ֆրանկ-Վալտեր Շտայնմայերը, արձագանքելով Վիեննայում կայացած Սարգսյան-Ալիև հանդիպմանը, այսօր հայտարարել է, որ անհրաժեշտ է կրկնապատկել ջանքերը բանակցային փակուղուց դուրս գալու համար: «Ես ողջունում եմ ՌԴ-ի, ԱՄՆ-ի և Ֆրանսիայի իմ գործընկերների նախաձեռնությունը, ովքեր Հայաստանի և Ադրբեջանի նախագահների հետ մայիսի 16-ին հանդիպում անցկացրեցին: Ես ոգևորված եմ այն վերահաստատված հանձնառությամբ, որ երկու նախագահներն են արտահայտել հրադադարի և հակամարտության խաղաղ կարգավորման առնչությամբ, ինչպես նաև նրանց՝ հունիսին նոր բանակցություններ անցկացնելու պատրաստակամությամբ: Գերմանիան՝ որպես ԵԱՀԿ-ն նախագահող երկիր շարունակում է ամբողջովին աջակցել համանախագահների ջանքերին: Մենք ակտիվորեն պաշտպանում ենք հետաքննության մեխանիզմ հիմնելու ջանքերը: Մենք նաև կաշխատենք ԵԱՀԿ գործող նախագահի անձնական ներկայացուցիչ, դեսպան Անջեյ Կասպշիկի թիմը ընդլայնելու ուղղությամբ»,- ասել է Գերմանիայի արտաքին գործերի նախարարը: Ֆրանսիան ևս ողջունել է ԼՂ-ի հարցով Վիեննայում կայացած հանդիպման արդյունքները, որն, ըստ Ֆրանսիայի ԱԳՆ մամուլի խոսնակի, ապրիլի 2-ից 5-ի մահացու բախումներից հետո թույլ տվեց վերսկսել երկխոսությունը Հայաստանի և Ադրբեջանի միջև: «Նախագահներ Սարգսյանը և Ալիևը, Եվրոպական հարցերի պետքարտուղար Արլեմ Դեզիրի, ԱՄՆ-ի պետքարտուղար Ջոն Քերրիի և ՌԴ-ի ԱԳ նախարար Սերգեյ Լավրովի ներկայությամբ վերահաստատեցին, որ կողմ են հրադադարի ռեժիմի պահպանմանը, ինչպես նաև հակամարտության խաղաղ կարգավորմանը: Կողմերը նաև ընդունեցին վստահության միջոցառումների, այդ թվում նաև միջադեպերի հետաքննության մեխանիզմի ներդրումը: Սրանք շատ կարևոր հանձնառություններ են: Ֆրանսիան կոչ է անում կողմերին իրագործել դրանք, և որպես Մինսկի խմբի համանախագահ, իր ամերիկացի և ռուս գործընկերների հետ կշարունակի միջնորդի իր դերակատարությունը», - ասված է Ֆրանսիայի արտգործնախարարության մամուլի խոսնակի հաղորդագրությունում: Ինչ վերաբերում է հակամարտության կողմերին, ապա երեկ ուշագրավ հայտարարություն է արել Ադրբեջանի ԱԳ նախարարը: «Համաձայն եմ Ռուսաստանի ԱԳ նախարար Սերգեյ Լավրովի գնահատականի հետ, որ երեկվա բանակցությունները լավ հնարավորություն են ստեղծում հակամարտության կարգավորման վերաբերյալ քաջ հայտնի փուլային մոտեցման հիման վրա բովանդակային բանակցություններ սկսելու համար: Այդ բանակցությունները պետք է անցկացվեն հնարավորինս արագ և արդարացնեն տարածաշրջանում ապրող մարդկանց և միջազգային հանրության ակնկալիքները՝ կապված էական արդյունքների հետ»,- ասել է Էլմար Մամեդյարովը: Իսկ Ադրբեջանի նախագահի աշխատակազմի ղեկավարի տեղակալ Նովրուզ Մամեդովը նշել է. «Վիեննայում կայացած հանդիպման ընթացքում մենք մեր համաձայնությունն ենք տվել կրակի դադարեցման ռեժիմի ամրապնդման և հետագա բանակցությունների շարունակման վերաբերյալ։ Ամենակարևորն է, որ առաջին հերթին պահպանվի հրադադարի ռեժիմը, չլինեն սադրանքներ և հունիսին սկսենք բանակցությունները»։ Պաշտոնական Ստեփանակերտում Վիեննայի հանդիպման արդյունքներից գոհ են: ԼՂՀ նախագահի աշխատակազմի ղեկավարի տեղակալ Դավիթ Բաբայանի խոսքով, հանդիպումը ղարաբաղյան հակամարտության շուրջ բանակցային գործընթացը վերակենդանացնելու հնարավորություն է տալիս: Ստեփանակերտում կարևորում են նաև այն փաստը, որ կողմերը վերահաստատել են՝ 1994թ. հրադադարի համաձայնագիրը պետք է պահպանվի: «Ի դեպ՝ այդ պայմանագրերին 1994-95թթ., որպես լիարժեք կողմ մասնակցում է նաև Արցախը: Սա նշանակում է, որ և՛ ուղղակի, և՛ անուղղակի ձևով միջազգային հանրությունը ճանաչում է նաև Արցախի Հանրապետությանը, որպես հակամարտության կողմ: Չափազանց կարևոր է, իհարկե, նաև այն, որ առանձնակի շեշտ է դրվում խաղաղության և կայունության պահպանման վրա», - «Ազատության» հետ զրույցում նշել է Բաբայանը: ԼՂ նախագահի աշխատակազմի ղեկավարի տեղակալը կարևորում է նաև սահմանային միջադեպերի հետաքննության մեխանիզմների ստեղծումը. «Եթե, օրինակ, այս մեխանիզմները սկսեն մշակվել և ներդրվել, առանց Արցախի մասնակցության անհնարին է դա իրականացնել: Ի վերջո, այդ սարքավորումները, որ պետք է դրվեն, ո՞վ պիտի դա իրականացնի: Մեր տեղը չի կարող դա իրականացնել Շվեյցարիան կամ Զիմբաբվեն: Հետևաբար, ուզում է դա Ադրբեջանը, թե չի ուզում՝ այդ գործընթացին Արցախը մասնակից է լինելու»: Թամար Բագրատունի