Հաղթանակն այս անգամ չի վաճառվում

Գեներալ Մանվել Գրիգորյանի եւ նրա շքախմբի ղարաբաղյան պահվածքի վերաբերյալ ծավալված աղմկոտ թեման նորանոր դրսեւորումներ է ստանում: Խնդրին անդրադարձել է  ԼՂՀ վարչապետի խոսնակ Արտակ Բեգլարյանը՝ հայտարարելով, որ միջադեպով պետք է զբաղվեն համապատասխան մարմիները։ Sputnik Արմենիայի հետ զրույցում  Արտակ Բեգլարյանը ասել է, որ, թեև միջադեպի մանրամասներին տեղյակ չէ, բայց դատապարտելի է համարում ցանկացած նման արարք ցանկացած մեկի կողմից։ «Ով ուզում է լինի` Մանվել Գրիգորյանը լինի, թե Արտակ Բեգլարյանը, պետք է իրեն կոռեկտ պահի։ Ու կապ չունի նաև` Հայաստանում, թե Ղարաբաղում` ամենուր»,- ասել է Արտակ Բեգլարյանը։ Հիշեցնենք, որ Аravot.am կայքում հրապարակված տեղեկատվության համաձայն` ԼՂՀ այցելած ԵԿՄ վարչության նախագահ Մանվել Գրիգորյանը հայհոյել է ԼՂ ՊԲ զինվորներին` իր ճանապարհը փակելու համար։ Լրագրող Սուրեն Սարգսյանը, որն այդ օրերին եղել է Ղարաբաղում, նույնպես հավաստիացնում է, որ մայիսի 9-ին Հադրութում նման միջադեպ է եղել։ «Այդ օրը ես այնտեղ էի, հանդիպեցի զինվորներին, որոնց հայհոյել էր Մանվել Գրիգորյանը»: Այն, որ Մանվել Գրիգորյանի սովորական խոսքը հայհոյանքից չի վեր չի բարձրանում, ողջ հայ ազգը համոզվել է վերջին տարիներին՝  գեներալ Գրիգորյանի հրապարակային հարթակներում հայտնվելու օրվանից: Ուստի նրանից ակնկալել հարգալից վերաբերմունք թեկուզ մեր ժամանակների իրական հերոսների՝ սահմանը պահող 18-20 տարեկան զինվորների նկատմամբ, անհույս  երեւակայություն է: Այնպես որ սա թերեւս այն դեպքը չէ, որ  որեւէ մեկն ունի  հերոսական անցյալ ու  դա նրան  ազատում է բանակային եւ պետական կարգին հստակ եւ միարժեք ենթակայությունից: Որեւէ մեկի հերոսական անցյալը նրան  շնորհում է  չգրված արտոնություններ ինչպես խաղաղության, այնպես էլ  պատերազմի ընթացքում: Խնդիրն ընդամենը վարվեցողության տարրական նորմերի չիմացության հետեւանք է,  հետեւապես  միջադեպը թեժացնել ու բարձրացնել  համազգային խնդրի մակարդակի անթույլատրելի է մի պարզ պատճառով, որ նախեւառաջ չեզոքացված չէ պատերազմի վտանգը, իսկ  թիրախում բանակի գեներալ է, Արցախի պատերազմում առանցքային դերակատարում եւ անձնուրաց պայքար մղած հերոս: Ինչ խոսք Մանվել Գրիգորյանի հասարակական-քաղաքական կյանքն այնքան խոցելի է, որ կարելի է նրան քննադատել ամեն վայրկյան,ցանկացած հարցում, բայց ներկայումս, երբ նա սահմանում է, ուրեմն  կատարում է բանակի ու Պաշտպանության նախարարության հրահանգը, կնշանակի պետությունն ունի նրա կարիքը, վտանգավոր այս ժամանակներում լծվել հերոսներին վարկաբեկելու գործին, կնշանակի տալ նոր պատերազմի համազարկ: Հայտնի փաստ է, որ մարդկանց իրական նկարագիրը բացահայտվում է դժվարին ու ծայրահեղ իրավիճակներում: Հիմա այդպիսի օրեր ենք ապրում բոլորս՝ փորձում ենք հաղթահարել դժվարությունները, չեզոքացնել վտանգները, հաղթել չարիքը և միաժամանակ ճանաչում ենք մեկս մյուսին: Վատ չէ մեկ առիթով եւս ճանաչելը, թե ով ով է, բայց հարցեր լուծելու համար ճիշտ վայր ընտրված չէ: Հատկապես, որ մյուս կողմում էլ հերոս հրամանատար է ու ոչ պակաս խոցելի, որքան Մանվել Գրիգորյանը: Բադասյանն էլ Արցախի արտոնյալ հրամանատարների շարքում է,նրա ընդդիմադիր  կարգավիճակը չի խանգարում մի շարք բիզնեսներ տնօրինելու հարցում, նա   բանակի գլխավոր մատակարարներից մեկն է, հաց է մատակարարում: Մամուլում նրա մասին կան բազմաթիվ աղմկոտ հրապարակումներ, վերջիններից մեկն էլ այն մասին էր, որ Բադասյանը թեպետ հայտարարել էր Քեսաբի ազատագրմանը մասնակցելու մասին, բայց Քեսաբ չէր հասել, Բեյրութից այն կողմ չէր անցել: Այնպես որ անթույլատրելի է նոր պատերազմի <ընձեռած> նոր շանսը օգտագործելով փորձել դիվիդենտներ շահել՝ դիմացինին վարկաբեկելով, այդ ամենը բումերանգի պես կարող է վերադառնալ: Այլ հարց է, որ այդ ամենն իրականացվում է վերին ատյանների հատուկ կարգադրությամբ՝ նախապես կանխելով ապրիլյան պատերազմում դրսեւորված հերոսների հերթական սակարումը եւ իշխանություններից արժանի փոխհատուցման պահանջը, ինչպես եղել է  90-ականներից հետո եւ ճարպիկ գեներալները կարողացել էն պատերազմի հաղթանակը թանկ գնով վաճառել իշխանություններին՝ նրանցից ստանալով բազում օբյեկտներ: Անի Սահակյան